ଭୁବନେଶ୍ୱର,୧୭।୪(ବ୍ୟୁରୋ): ଓଡ଼ିଶାରୁ କୋଟି କୋଟି ଟଙ୍କାର ଫେରୋକ୍ରୋମ ଚୋରି କରାଯାଇ ବାହାର ରାଜ୍ୟକୁ ଚାଲାଣ ହେଉଛି। ଏଥିରେ ସମ୍ପୃକ୍ତ ଏକ ଆନ୍ତଃରାଜ୍ୟ ର଼୍ୟାକେଟକୁ କ୍ରାଇମବ୍ରାଞ୍ଚ ଏସ୍ଟିଏଫ୍ ଧରିଛି। କଟକର ଟାଙ୍ଗୀ, ମଙ୍ଗୁଳି ସମେତ ବିଭିନ୍ନ ସ୍ଥାନରେ ଚଢାଉ କରି ବିପୁଳ ପରିମାଣର ଫେରୋକ୍ରୋମ ଜବତ କରିବା ସହ ୩ ମାମଲା ରୁଜୁ କରି ୬ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ, ଅଜିତ୍ ଗୁପ୍ତା, ସନ୍ତୋଷ କୁମାର ବର୍ମା, ବବଲି ଗୁପ୍ତା, କୁଣ୍ଡନ ପଶୱାନ୍, ନନ୍ଦ କିଶୋର ସିଂହ ଏବଂ ରାଧେଶ୍ୟାମ ଗୁପ୍ତା। ସେମାନଙ୍କ ନିକଟରୁ ପ୍ରାୟ ୨୧୪ ଟନ୍ର ଚୋରା ଫେରୋକ୍ରୋମ ଜବତ କରାଯାଇଛି। ଏହାର ଆନୁମାନିକ ବଜାର ମୂଲ୍ୟ ପ୍ରାୟ ୨କୋଟି ଟଙ୍କା ହେବ। ସେହିଭଳି ଏହି କାରବାରରେ ବ୍ୟବହୃତ ତିନୋଟି ଟ୍ରକ୍, ଜେନେରେଟର୍ ସେଟ୍, ଇଲେକ୍ଟ୍ରି ସିୟୁଇଙ୍ଗ୍ ମେଶିନ ଆଦି ଜବତ କରାଯାଇଛି। ଏହି ର଼୍ୟାକେଟର ଚେର ଆନ୍ଧ୍ରପଦେଶ, କୋଲକାତା ଓ ଝାଡଖଣ୍ଡକୁ ଲମ୍ବିଥିବା ସେମାନଙ୍କୁ ପଚରାଉଚରାବେଳେ ଜଣାପଡିଛି। ତେବେ ଏହି ର଼୍ୟାକେଟରେ ଆଉ କେଉଁମାନେ ସମ୍ପୃକ୍ତ ଅଛନ୍ତି ତାହା ଜାଣିବାକୁ ତଦନ୍ତ ଜାରି ରହିଥିବା ଏସ୍ଟିଏଫ୍ ପକ୍ଷରୁ କୁହାଯାଇଛି।
ସୂଚନା ଅନୁଯାୟୀ, ରାଜ୍ୟର ବିଭିନ୍ନ ବନ୍ଦର ଦେଇ ଦେଶ ବାହାରକୁ ଫେରୋକ୍ରୋମ୍ ରପ୍ତାନୀ କରାଯାଉଛି। ମୁଖ୍ୟତଃ ଜାପାନ, କୋରିଆ ଆଦି ଦେଶକୁ ଓଡ଼ିଶାରୁ ଯାଉଥିବା ଫେରୋକ୍ରୋମକୁ ଟ୍ରକ୍ ମାଧ୍ୟମରେ ବନ୍ଦରରେ ପହଞ୍ଚାଯାଉଛି। ହେଲେ ର଼୍ୟାକେଟରେ ସମ୍ପୃକ୍ତ ଅଭିଯୁକ୍ତମାନେ ଅଧା ରାସ୍ତାରୁ ଟ୍ରକ୍ରୁ ଫେରୋକ୍ରମ ଚୋରି କରିନେବା ପରେ ନିଜ ଟ୍ରକ୍ରେ ରାଜ୍ୟ ବାହାରକୁ ପଠାଇଥାନ୍ତି। ଏଥିରୁ ବହୁ କୋଟି ଟଙ୍କା ରୋଜଗାର କରିଥାନ୍ତି। କିଛିଦିନ ତଳେ ଏସ୍ଟିଏଫ୍ ଏହି ଏହି ର଼୍ୟାକେଟ ସମ୍ପର୍କରେ ଜାଣିବାକୁ ପାଇବା ପରେ ଏହା ଉପରେ ନଜର ରଖିଥିଲା। ଗତ ଦୁଇଦିନ ଧରି ଏସ୍ଟିଏଫ୍ ଟିମ୍ କଟକର ଟାଙ୍ଗୀ ଓ ମୁଙ୍ଗୁଳି ଅଞ୍ଚଳରେ ଚଢାଉ ଆରମ୍ଭ କରିଥିଲା।