ଭୁବନେଶ୍ବର,୨୮।୯(ବ୍ୟୁରୋ): ରାଜ୍ୟରେ ଏବେ ରାଜନୈତିକ ଲଢ଼େଇ ଧୀରେ ଧୀରେ ବଢ଼ିବା ଆରମ୍ଭ କରିଛି। ଅନେକ ଦିନ ହେବ ରାଜ୍ୟର ୩ ପ୍ରମୁଖ ରାଜନୈତିକ ଦଳ ନିଜର କାର୍ଯ୍ୟକ୍ରମକୁ ସାମାନ୍ୟ ଶିଥିଳ ରଖିଥିବା ବେଳେ ୨୦୨୪ ନିର୍ବାଚନକୁ ଦୃଷ୍ଟିରେ ରଖି ଏଥିଲାଗି ପ୍ରସ୍ତୁତି ଆରମ୍ଭ କରିଛନ୍ତି। ଆସନ୍ତା ୨୯ ଏବଂ ୩୦ରେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡାଙ୍କ ଓଡ଼ିଶା ଗସ୍ତ କାର୍ଯ୍ୟକ୍ରମ ରହିଛି। ନଡ୍ଡାଙ୍କ ଗସ୍ତକୁ ସଫଳକରି ଏଥିରୁ ବଡ଼ ରାଜନୈତିକ ଫାଇଦା ଉଠାଇବା ସକାଶେ ଭାଜପାର ରାଜ୍ୟ ନେତୃବୃନ୍ଦ ଜୋର୍ଦାର କସରତ ଚଳାଇଛନ୍ତି। ଜନତା ମଇଦାନଠାରେ ୨୫ ହଜାର କାର୍ଯ୍ୟକର୍ତ୍ତାଙ୍କୁ ଏକାଠି କରାଇବାକୁ ଭାଜପା ପକ୍ଷରୁ ଜୋରଦାର ଉଦ୍ୟମ ଚାଲିଛି। ଅପରପକ୍ଷେ ଭାଜପା କାର୍ଯ୍ୟକ୍ରମକୁ କାଉଣ୍ଟର କରିବ ବିଜେଡି। ଏଥିଲାଗି ଶାସକ ଦଳ ନିଜର ନକ୍ସା ତିଆରି କରିଛି। ୨୯ରେ ଯୁବ ଓ ଛାତ୍ରଙ୍କ ଏକ କାର୍ଯ୍ୟକ୍ରମ କରିବାକୁ ସ୍ଥିର କରିଥିବା ବେଳେ ୩୦ରେ ବରମୁଣ୍ଡା ପଡ଼ିଆରେ ପଞ୍ଚାୟତ ପ୍ରତିନିଧିଙ୍କୁ ନେଇ ଏକ କାର୍ଯ୍ୟକ୍ରମ ଲାଗି ଦଳ ନିଷ୍ପତ୍ତି ନେଇଛି।
ବିଜେଡି ଯୁବ କାର୍ଯ୍ୟାଳୟଠାରେ ଖବରଦାତା ସମ୍ମିଳନୀ ଜରିଆରେ ଦଳୀୟ କାର୍ଯ୍ୟକ୍ରମ ନେଇ ବିସ୍ତୃତ ସୂଚନା ଦିଆଯାଇଛି। ଏହି ଅବସରରେ ବିଧାୟକ ଅରୁଣ ସାହୁ କହିଛନ୍ତି, ୨୯ରେ ବରମୁଣ୍ଡା ପଡ଼ିଆରେ ଆୟୋଜନ ହେବାକୁ ଥିବା ବୈଠକରେ ସମସ୍ତ ଏମ୍ପି, ବିଧାୟକ ଏବଂ ଏମ୍ପି ଓ ଏମ୍ଏଲ୍ଏ ପ୍ରାର୍ଥୀ, ସମସ୍ତ ରାଜ୍ୟ ଯୁବ, ଛାତ୍ର ଓ ମହିଳା କମିଟିର ସଦସ୍ୟ, ଯୁବ, ଛାତ୍ର ଓ ମହିଳା ଜୋନ୍, ବ୍ଲକ, ଜିଲା ଏବଂ ୟୁଏଲ୍ବି ସଭାପତି ଏବଂ ଭୁବନେଶ୍ୱର ଓ କଟକର ବିସିଜେଡି କ୍ୟାମ୍ପସ୍ କମିଟି ସଦସ୍ୟ ଯୋଗଦେବେ। ସେହିପରି ୩୦ରେ ସକାଳ ୮ଟା ୩୦ରେ ଏମ୍ପି, ଏମ୍ଏଲ୍ଏ ଏବଂ ବିଧାୟକ ଓ ଏମ୍ପି ପ୍ରାର୍ଥୀ, ରାଜ୍ୟ ଅଫିସ ବିଅରର, ଜିଲା ସଭାପତି, ବ୍ଲକ ଏବଂ ୟୁଏଲ୍ବି ସଭାପତି, ଜିଲା ପରିଷଦ ଅଧ୍ୟକ୍ଷ ଓ ଉପାଧ୍ୟକ୍ଷ, ଜିଲା ପରିଷଦ ସଦସ୍ୟ, ସମସ୍ତ ବ୍ଲକ ବିଜେଡି ଅଧ୍ୟକ୍ଷ ଏବଂ ଉପାଧ୍ୟକ୍ଷ, ଭୁବନେଶ୍ୱର, କଟକ ଓ ବ୍ରହ୍ମପୁର ମେୟରଙ୍କ ସମେତ ସମସ୍ତ କର୍ପୋରେଟରଙ୍କୁ ନେଇ ବୈଠକ ଅନୁଷ୍ଠିତ ହେବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ବୋଧନ ଦେବା କାର୍ଯ୍ୟକ୍ରମ ରହିଛି ବୋଲି ଅରୁଣ କହିଛନ୍ତି। ସେହିପରି ବିଧାୟକ ଦେବୀ ପ୍ରସାଦ ମିଶ୍ର କହିଛନ୍ତି, ବିଜେଡି ଲୋକଙ୍କ ବଳ। ଗାନ୍ଧୀ ଜୟନ୍ତୀରୁ ଜନସମ୍ପର୍କ ପଦଯାତ୍ରା ଦଳ ଆରମ୍ଭ କରିବ। ଅକ୍ଟୋବର ୨ରୁ ମାସେବ୍ୟାପୀ ଏହି କାର୍ଯ୍ୟକ୍ରମ ହେବ ବୋଲି ସେ ସୂଚିତ କରିଛନ୍ତି।