ଜୁନାଗଡ଼,୧୨।୯(ଡି.ଏନ୍.ଏ.)-କଳାହାଣ୍ଡି ଜିଲାର ଜୁନାଗଡ଼ ସହରରେ କରୋନା ପଜିଟିଭ୍ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଫଳରେ ସୁରକ୍ଷା ଦୃଷ୍ଟିରୁ କଳାହାଣ୍ଡି ଜିଲାପାଳ ଡ଼ା. ଗାଭାଲି ପରାଗ ହର୍ଷଦ ସହରକୁ ୧୨ ଓ ୧୩ ତାରିଖ ଶଟ୍ଡାଉନ ଘୋଷଣା କରିଥିଲେ । ବୁଧବାରଠାରୁ ଏହି ଅବଧି ଆରମ୍ଭ ହୋଇଛି। ଏହି ସମୟରେ ସହରର ୧୨ ୱାର୍ଡର ୧୯ ହଜାର ୬୫୬ ଜଣଙ୍କୁ ସର୍ଭେ କରିବା ସହ ସ୍କ୍ରିନିଂ କରାଯିବ। ଏଥିରେ ୧୨୯ ଜଣ ଶିକ୍ଷକ, ଆଶା ଓ ଅଙ୍ଗନୱାଡି କର୍ମୀଙ୍କୁ ମିଶାଇ ୪୩ ଟିମ୍ ଗଠନ କରାଯାଇଛି । ୪ ଟି ସ୍ବାବ କଲେକ୍ସନ ସେଣ୍ଟର କରାଯାଇଥିବା ବେଳେ ଚିହ୍ନଟ ହୋଇଥିବା ଲୋକଙ୍କୁ ନେବା ପାଇଁ ୪ଟି ଆମ୍ବୁଲାନ୍ସର ବ୍ୟବସ୍ଥା କରାଯାଇଛି। ସେହିଭଳି ୭ ଟି ରିପୋଟିଂ ସେଣ୍ଟର କରାଯାଇଛି । ଏଥିରେ ଜୁନାଗଡ଼ ତହସିଲଦାର ଉପେନ୍ଦ୍ର ଲୁହାଙ୍କ ସମେତ ଜିଲାର ଅନ୍ୟ ତହସିଲର ୫ ଜଣ ତହସିଲଦାରଙ୍କୁ ପର୍ଯ୍ୟବେକ୍ଷକ ଭାବେ ଦାୟିତ୍ୱ ପ୍ରଦାନ କରାଯାଇଛି । ସେହିପରି ଜୁନାଗଡ଼ ଏନ୍ଏସିର ସମସ୍ତ କର୍ମଚାରୀଙ୍କୁ ନିୟୋଜିତ କରାଯାଇଛି । ବୁଧବାର ଘରକୁ ଘରକୁ ଯାଇ ଲୋକଙ୍କ ସ୍କ୍ରିନିଂ କରାଯାଉଛି। ସମସ୍ତ କାର୍ଯ୍ୟର ତଦାରଖ କରିବା ପାଇଁ ଧର୍ମଗଡ଼ ଉପଜିଲାପାଳ ଦିବାକର ଟିଏସ୍ଙ୍କୁ ଜିଲାପାଳ ନିର୍ଦ୍ଦେଶ ଦେଇଥିବା ସୂଚନା ମିଳିଛି।