କେନ୍ଦୁଝର,୧୧ା୫(ସ୍ବ.ପ୍ର.): ମୟୂରଭଞ୍ଜ ଜିଲା କାଞ୍ଜିପାଣି ଥାନା ଅନ୍ତର୍ଗତ ନିପୋ ଗ୍ରାମ ନିକଟସ୍ଥ କାଞ୍ଜିପାଣି ଘାଟି ଏନ୍ଏଚ୍ ୪୯ରେ ସଡ଼କ ଦୁର୍ଘଟଣାରେ ଜଣେ କେନ୍ଦୁ ବିକାଳିଙ୍କ ସମେତ ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୪ ଜଣ ଆହତ ହୋଇଥିବା ଜଣାପଡ଼ିଛି। ମୃତ କେନ୍ଦୁ ବିକାଳି ସ୍ଥାନୀୟ ଅଞ୍ଚଳର ନିଆଳି ମନ୍ତ୍ରୀ (୬୦) ବୋଲି ଜଣାପଡ଼ିଛି। ଅନ୍ୟ ମୃତ ଗାଡ଼ି ଚାଳକଙ୍କ ନାମ ଜଣାପଡ଼ିନାହିଁ ା ଦୁର୍ଘଟଣାର ସଠିକ୍ କାରଣ ଜଣାପଡ଼ିନାହିଁ।
ନିଆଳି ସବୁଦିନ ଭଳି ଆଜି ରାସ୍ତାକଡ଼ରେ କେନ୍ଦୁ ବିକ୍ରି କରୁଥିଲେ ା ଏହି ସମୟରେ ଏକ ଟ୍ରାକ୍ଟର ଆସି ଠିଆ ହୋଇଥିଲା। ଟ୍ରାକ୍ଟର ଚାଳକ କେନ୍ଦୁ କିଣିବାକୁ ଓହ୍ଲାଇଥିଲେ। ଅନ୍ୟ କେତେଜଣ ମଧ୍ୟ ସେଠାରେ କେନ୍ଦୁ ପାଇଁ ଠିଆ ହୋଇଥିଲେ ା ଏହି ସମୟରେ ଏକ ଟ୍ରକ ଦ୍ରୁତଗତିରେ ଆସି ପଛପଟୁ ଧକ୍କା ଦେଇଥିଲା ା ଫଳରେ ସେମାନଙ୍କ ଉପରେ ଚଢ଼ିଯିବାରୁ ଘଟଣାସ୍ଥଳରେ ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟମାନେ ଆହତ ହୋଇଥିଲେ। ଖବର ପାଇ ସ୍ଥାନୀୟ ପୋଲିସ ପହଞ୍ଚି ଆହତମାନଙ୍କୁ ଉଦ୍ଧାର କରି ମେଡିକାଲ ପଠାଇଥିଲା। ଏହାକୁ ନେଇ ଚାପା ଉତ୍ତେଜନା ପ୍ରକାଶ ପାଇଛି। ତେବେ କେଉଁ ଗାଡ଼ି ଚାପାରେ ଏଭଳି ଦୁର୍ଘଟଣା ଘଟିଲା ତାହାର ତଦନ୍ତ ପରେ ଜଣାପଡ଼ିବ। ଆହତମାନଙ୍କୁ ଜିଲା ମୁଖ୍ୟ ଡାକ୍ତରଖାନାକୁ ଚିକିତ୍ସା ପାଇଁ ପଠାଯାଇଥିବା ଥାନାଧିକାରୀ ବିକ୍ରମ କୁମାର ଭୂୟାଁ କହିଛନ୍ତି।