ପରଜଙ୍ଗ, ୧୧ା୨(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ଥାନା ୫୩ ନଂ. ଜାତୀୟ ରାଜପଥର ମୁଣ୍ଡେଇଲୋ ଗଁା ଛକ ନିକଟରେ ଗୁରୁବାର ପୂର୍ବାହ୍ନରେ ଏକ ହୃଦୟ ବିଦାରକ ଦୁର୍ଘଟଣା ଘଟିଛି। ଏକ ବାଇକ୍ ଉପରେ କୋଇଲା ବୋଝେଇ ଟ୍ରକ୍ (ନଂ. ଓଡ଼ି ୧୯ ଏଚ୍ ୪୦୮୨) ମାଡ଼ିଯିବାରୁ ସରାଙ୍ଗସ୍ଥିତ ମୋନାଲିସା ପେଟ୍ରୋଲ୍ ପମ୍ପ କର୍ମଚାରୀ ମାମୁଦ ସାହୁ (୪୫) ଏବଂ ଆଠଗଡ଼ ଧାଈପୁର ଗ୍ରାମର ଅଶୋକ ମହାରଣା (୩୫)ଙ୍କ ମୃତ୍ୟୁ ଘଟିଛି।
ପରଜଙ୍ଗ ଥାନା କନ୍ତୋର ଗ୍ରାମର ମାମୁଦ ପୂର୍ବାହ୍ନରେ ଫିଲିଂ ଷ୍ଟେଶନକୁ ଯିବା ଲାଗି ଗାଡ଼ିକୁ ଅପେକ୍ଷା କରିଥିଲେ। ଏହି ସମୟରେ ଆଠଗଡ଼ ଧାଈପୁର ଗ୍ରାମର ଅଶୋକ ବାଇକ୍ରେ ତାଳଚେର ଆଡ଼କୁ ଯାଉଥିବାବେଳେ ତାଙ୍କୁ ମାମୁଦ ଲିଫ୍ଟ ମାଗିଥିଲେ। ଉଭୟେ ଗନ୍ତବ୍ୟ ପଥରେ ଯାଉଥିବାବେଳେ ତାଳଚେର ପାର୍ଶ୍ୱରୁ ଦ୍ରୁତଗତିରେ ଆସୁଥିବା ଉକ୍ତ କୋଇଲା ବୋଝେଇ ଟ୍ରକ୍ ଧକ୍କା ଦେଇଥିଲା। ଏଥିରେ ଉଭୟଙ୍କ ଗୋଡ଼ ଛିଣ୍ଡିଯାଇଥିଲା। ସ୍ଥାନୀୟ ବାସିନ୍ଦା ସେମାନଙ୍କୁ ଉଦ୍ଧାର କରି କାମାକ୍ଷାନଗର ମେଡିକାଲରେ ଭର୍ତ୍ତି କରିଥିବାବେଳେ ଡାକ୍ତର ମୃତ ଘୋଷଣା କରିଥିଲେ। ଅନ୍ୟପଟେ ଦୁର୍ଘଟଣା ଘଟାଇ ଟ୍ରକ୍ଟି ଫେରାର ହୋଇଯାଉଥିବାବେଳେ ପୋଲିସ ପିଛା କରି ଏହାକୁ ଧରିଥିଲା। ଡ୍ରାଇଭରଙ୍କୁ ଗିରଫ କରାଯାଇଛି। ଏ ସଂକ୍ରାନ୍ତରେ ପରଜଙ୍ଗ ଥାନାରେ ଏକ ମାମଲା ରୁଜୁ ହୋଇଛି।
ମୃତ ମାମୁଦଙ୍କ ସ୍ତ୍ରୀ ଏବଂ ଦେଢ଼ବର୍ଷର ପୁଅ ଅଛନ୍ତି। ଲିଫ୍ଟ ମାଗି ଗନ୍ତବ୍ୟସ୍ଥଳକୁ ଯିବା ସମୟରେ ତାଙ୍କର ଏଭଳି ମୃତ୍ୟୁରେ ପରିବାର ଲୋକେ ଭାଙ୍ଗି ପଡ଼ିଛନ୍ତି। ଏହି ଘଟଣା ଅଞ୍ଚଳରେ ଶୋକର ଛାୟା ଖେଳାଇଦେଇଛି।