ନୂଆଦିଲ୍ଲୀ,୮ା୧୧: ଦିଲ୍ଲୀକୁ ଲାଗିଥିବା ସାଇବର ସିଟି ଗୁରୁଗ୍ରାମରେ ଏକ ଚଳନ୍ତା ବସରେ ନିଆଁ ଲାଗି ଯାଇଛି। ଘଟଣା ଏତେ ଭୟଙ୍କର ଥିଲା ଯେ, ଏଥିରେ ଦୁଇ ଜଣ ଲୋକେ ପ୍ରାଣ ହରାଇଥିବା ବେଳେ ଅନେକ ଆହତ ହୋଇଛନ୍ତି। ଆହତ ମାନଙ୍କୁ ତୁରନ୍ତ ସ୍ଥାନୀୟ ସରକାରୀ ମେଡିକାଲରେ ଭର୍ତି କରାଯାଇଛି।
ପ୍ରାରମ୍ଭିକ ସୂଚନା ଅନୁଯାୟୀ ଜୀବନ ବଞ୍ଚାଇବା ପାଇଁ ୧୦ରୁ ୧୨ ଲୋକେ ବସ୍ ଝରକାରୁ ଡେଇଁ ପଡ଼ିଥିଲେ। ସୂଚନା ପାଇ ସ୍ଥାନୀୟ ପ୍ରଶାସନ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲା। ଭିତରେ ଫସିଥିବା ଲୋକମାନଙ୍କୁ ତୁରନ୍ତ ବସରୁ ବାହାର କରାଯାଇଥିଲା। ତେବେ ଘଟଣାରେ ବସ୍ ଟି ଜଳି ସମ୍ପୂର୍ଣ୍ଣ ନଷ୍ଟ ହୋଇଯାଇଛି।
ବସରେ ନିଆଁ ଲାଗିବାର କାରଣ ଜଣା ପଡ଼ିନାହିଁ। ଏହି ଘଟଣା ପ୍ରାୟ ରାତି ୯ଟା ୩୨ ମିନିଟରେ ଘଟିଥିବା କୁହାଯାଉଛି। ଗୁରୁଗ୍ରାମ ପୋଲିସ ସୋସିଆଲ ମିଡିଆରେ ସୂଚନା ଦେଇଛି ଯେ, ଜାତୀୟ ରାଜପଥ-୪୮, ଗୁଗୁଲ କମ୍ପାନୀ ନିକଟରେ ଏକ ବସରେ ନିଆଁ ଲାଗିଥିବାର ସୂଚନା ମିଳିବା ମାତ୍ରେ ପୋଲିସ ଏବଂ ଅଗ୍ନିଶମ ବାହିନୀ ଟିମ୍ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଆହତ ମାନଙ୍କୁ ମେଡିକାଲରେ ଭର୍ତ୍ତି କରି ଦିଆଯାଇଛି, ସ୍ଥିତି ବର୍ତ୍ତମାନ ସମ୍ପୂର୍ଣ୍ଣ ନିୟନ୍ତ୍ରଣରେ ରହିଛି।