ବରୀ,୧୭।୧୧(ଡି.ଏନ.ଏ.): ରାଜ୍ୟ ଓ କେନ୍ଦ୍ର ସରକାର ବିଭିନ୍ନ ଯୋଜନା ପ୍ରଣୟନ କରିଛନ୍ତି। ସେଥି ମଧ୍ୟରୁ ଆବାସ ଯୋଜନା ଅନ୍ୟତମ। କେନ୍ଦ୍ର ସରକାର ପ୍ରଧାନମନ୍ତ୍ରୀ ଆବାସ ଯୋଜନା ଓ ରାଜ୍ୟ ସରକାରଙ୍କ ବିଜୁ ପକ୍କା ଘର ଯୋଜନା କାର୍ଯ୍ୟକାରୀ କରୁଛନ୍ତି। ହେଲେ ପ୍ରକୃତ ହିତାଧିକାରୀ ଏହି ଯୋଜନାରୁ ବଞ୍ଚତ୍ତ ହୋଇଛନ୍ତି। ବିଶେଷ କରି ପ୍ରଶାସନିକ ଅଧିକାରୀମାନେ ଏଥିରେ ପ୍ରତିବନ୍ଧକ ସାଜିଥିବା ଅଭିଯୋଗ ହୋଇଛି। ଫଳରେ ସେହି ହିତାଧିକାରୀମାନେ କେବଳ ଭାଗ୍ୟ, ଭଗବାନଙ୍କୁ ଏଥିପାଇଁ ଦାୟୀ କରି ଖୋଲା ଆକାଶ ତଳେ ପଡି ରହିଛନ୍ତି।
ସୂଚନା ଅନୁଯାୟୀ, ଯାଜପୁର ଜିଲା ବରୀ ବ୍ଲକ୍ ଅଧୀନ କଳାମାଟିଆ ପଞ୍ଚାୟତ ଉପରକାଇପଡ଼ା ଗ୍ରାମ ୭ନଂ. ଓ୍ବାର୍ଡର ପର୍ଶୁରାମ ସେଠୀ ଓ ଶୁଭ୍ରଦୀପ ରାୟଙ୍କୁ ଏଠାରେ ଉଦାହରଣ ଭାବେ ନିଆଯାଇପାରେ। ୧୯୯୯ ମହାବାତ୍ୟାରେ ଦିବ୍ୟାଙ୍ଗ ଶୁଭ୍ରଦୀପଙ୍କ ଘର ସମ୍ପୂର୍ଣ୍ଣ ଭାଙ୍ଗି ଯାଇଥିଲା। ସେଦିନଠାରୁ ତାଙ୍କ ପରିବାର ଖୋଲା ଆକାଶ ତଳେ ପଡି ରହିଛନ୍ତି। ଅପରପକ୍ଷେ ପର୍ଶୁରାମଙ୍କ ନାମ ପ୍ରଧାନମନ୍ତ୍ରୀ ଆବାସ ଯୋଜନାରେ ତାଲିକାଭୁକ୍ତ ଥିବା ବେଳେ ତଦନ୍ତ ଦାୟିତ୍ୱରେ ଥିବା କେତେଜଣ ଅଧିକାରୀଙ୍କ ଲାଞ୍ଚଖୋର ମନୋଭାବ ଯୋଗୁ ଆଜି ପର୍ଯ୍ୟନ୍ତ ପ୍ରଧାନମନ୍ତ୍ରୀ ଆବାସ ଯୋଜନାରେ ଆମେ ସାମିଲ ହୋଇପାରିଲୁ ନାହିଁ ବୋଲି କୋହଭରା କଣ୍ଠରେ ପର୍ଶୁରାମ କହିଛନ୍ତି। ଯଦି ଦିବ୍ୟାଙ୍ଗ ପର୍ଶୁରାମ ଓ ଶୂଭ୍ରଦୀପଙ୍କ ନାମ ପ୍ରଧାନମନ୍ତ୍ରୀ ଆବାସ ଯୋଜନାର ତାଲିକାଭୁକ୍ତ ହୋଇଥିଲା ତା’ହେଲେ ସେମାନେ ବାଦ୍ ପଡିଲେ କେମିତି। କେଉଁ କାରଣରୁ ତାଙ୍କ ନାମକୁ ବାଦ୍ ଦିଆଗଲା ବୋଲି ପ୍ରଶ୍ନ ଉଠିଛି। ଉଭୟ ଦିବ୍ୟାଙ୍ଗ ପରିବାର ଜିଲାପାଳଙ୍କ ଅଭିଯୋଗ ଶୁଣାଣି, ବରୀ ମଣ୍ଡଳ ଉନ୍ନୟନ ଅଧିକାରୀଙ୍କ ନିକଟରେ ବାରମ୍ବାର ଲିଖିତ ଅଭିଯୋଗ କରିଥିଲେ ମଧ୍ୟ ସେମାନଙ୍କ କଥାକୁ ଗୁରୁତ୍ୱ ଦିଆ ନ ଯିବା ଘଟଣା ବିବାଦ ସୃଷ୍ଟି କରିଛି। ଏହି ଦୁଇ ଦିବ୍ୟାଙ୍ଗ ପରିବାରକୁ ତୁରନ୍ତ ଉକ୍ତ ଯୋଜନାରେ ସାମିଲ କରାଯାଇ ବାସଗୃହ ଯୋଗାଇ ଦେବାକୁ ସାଧାରଣରେ ଦାବି ହେଉଛି।