ହିଞ୍ଜିଳିକାଟୁ,୪ା୫(ଡି.ଏନ୍.ଏ.): ଗଞ୍ଜାମ ଜିଲା ଶେରଗଡ଼ ବ୍ଲକ ଖାସପା ଗ୍ରାମରେ ଗତ ୪ ଦିନ ଧରି ଝାଡ଼ାବାନ୍ତିରେ ଆକ୍ରାନ୍ତ ହୋଇ ଗ୍ରାମର ୨ ଜଣଙ୍କ ମୃତ୍ୟୁ ହୋଇଥିବା ବେଳେ ୩ରୁ ଊର୍ଦ୍ଧ୍ୱ ବ୍ୟକ୍ତି ଗୁରୁତର ହୋଇଥିବା ଅଭିଯୋଗ ହୋଇଛି। ମୃତ ବ୍ୟକ୍ତିମାନେ ହେଲେ ଖାସପା ଗାଁ ବଡ଼ଦାଣ୍ଡ ସାହିର ଚିତ୍ରସେନ ସ୍ବାଇଁ(୩୯) ଓ ସ୍ବପ୍ନେଶ୍ୱର ସାହିର ଚମ୍ପା ଦଳେଇ(୫୮)। ଚମ୍ପାଙ୍କ ରବିବାର ମୃତ୍ୟୁ ହୋଇଥିବା ବେଳେ ମଙ୍ଗଳବାର ଚିତ୍ରସେନଙ୍କ ମୃତ୍ୟୁ ଘଟିଛି। ଉକ୍ତ ଗ୍ରାମର ହରିଜନ ସାହିର ବସନ୍ତ ନାଇକ(୨୭) ଓ ମହେଶ୍ୱର ବିଶ୍ୱାଳ(୨୫) ଝାଡ଼ାବାନ୍ତିରେ ଗୁରୁତର ଅବସ୍ଥାରେ ବୁଧବାର ହିଞ୍ଜିଳିକାଟୁ ଉପଖଣ୍ଡ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ସ୍ବପ୍ନେଶ୍ୱର ସାହିର ବାବୁ ମହାରଣା ଓ ଉକ୍ତ ପଞ୍ଚାୟତ ଅନ୍ତର୍ଗତ ଠୁରୁବୁରାଇ ଗାଁର ସନ୍ଦୀପ ଆଚାରୀ ଗୁରୁତର ଅବସ୍ଥାରେ ଉଭୟ ବ୍ରହ୍ମପୁର ବଡ଼ ମେଡିକାଲରେ ଚିକିତ୍ସିତ ହେଉଥିବା ସୂଚନା ମିଳିଛି। ଗ୍ରାମ୍ୟ ଜଳ ଯୋଗାଣ ପାଇପ ଜରିଆରେ ପିଇବା ପାଣି ଗାଁରେ ଯୋଗାଣ ହୋଇଛି। ପିଇବା ପାଣିରେ କୌଣସି ସମସ୍ୟା ନାହିଁ ତେବେ ପ୍ରାୟ ୪ ଦିନ ତଳେ ଖାସପା ଗ୍ରାମରେ ଆୟୋଜିତ ଏକ ବିବାହ ଭୋଜି ଖାଇ ବହୁ ଲୋକ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିବା ଖାସପା ଗ୍ରାମର ଗୋପବନ୍ଧୁ ନାହାକ କହିଛନ୍ତି।
ବୁଧବାର ଗାଁରେ ଝାଡ଼ାବାନ୍ତି ବ୍ୟାପିବା ନେଇ ପ୍ରଚାର ପରେ ଶେରଗଡ଼ ଡାକ୍ତରଖାନାର ଏକ ଟିମ୍ ଆସି ଗାଁରେ ପହଞ୍ଚି ଓଆରଏସ ଓ ଅନ୍ୟାନ୍ୟ ଔଷଧ ବଣ୍ଟନ କରିଛନ୍ତି। ପରିସ୍ଥିତି ଦିନକୁ ଦିନ ଅଣାୟତ୍ତ ହେବାରେ ଲାଗିଛି। ଗାଁକୁ ଉଚ୍ଚସ୍ତରର ଡାକ୍ତରୀ ଦଳ ପଠାଇ ଘରକୁ ଘର ବୁଲି ସ୍ବାସ୍ଥ୍ୟ ଯାଞ୍ଚ ସହ ଆକ୍ରାନ୍ତଙ୍କୁ ଉନ୍ନତମାନର ଚିକିତ୍ସା ପ୍ରଦାନ କରିବାକୁ ଗ୍ରାମର ଅଖିଳ ସ୍ବାଇଁ, ଦୂତିକୃଷ୍ଣ ସ୍ବାଇଁ, ସୀତାରାମ ସାହୁ ଓ ସୁଦାମ ସ୍ବାଇଁ ପ୍ରମୁଖ ଦାବି କରିଛନ୍ତି।