ରାଇବଣିଆ, ୩୧।୫: ବାଲେଶ୍ୱର ଜିଲା ଜଳେଶ୍ୱର ବ୍ଲକ ରାଇବଣିଆ ଆଦିବାସୀ ଅଞ୍ଚଳରେ ଥିବା ୩୦ଶଯ୍ୟା ବିଶିଷ୍ଟ ହାତୀଗଡ଼ ସ୍ବାସ୍ଥ୍ୟକେନ୍ଦ୍ର ଏବେ ନାନା ଅବ୍ୟବସ୍ଥା ମଧ୍ୟରେ ଚାଲିଛି। ଏଠାରେ ୧୦ ସ୍ଥାନରେ ଅଛନ୍ତି ମାତ୍ର ୨ ଡାକ୍ତର। ଏହାର ଅଧୀନରେ ୪ଟି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓଲମରା, ଶାଳବଣୀ, ଖୁଆଡ଼, ଶିଖରପୁର ରହିଛି। କୌଣସି ବି ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ଡାକ୍ତର ନାହାନ୍ତି। ଫଳରେ ସାଧାରଣ ରୋଗ ହେଲେ ମଧ୍ୟ ସ୍ଥାନୀୟ ଅଞ୍ଚଳବାସୀ ହାତୀଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଧାଇଁ ଆସିଥାନ୍ତି। ଏଠାରେ ମଧ୍ୟ ଆବଶ୍ୟକ ଚିକିତ୍ସା ସୁବିଧା ମିଳୁ ନ ଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ମାତ୍ର ହାତୀଗଡ଼ ସ୍ବାସ୍ଥ୍ୟକେନ୍ଦ୍ରରେ ଦୀର୍ଘ ୭ ବର୍ଷ ହେଲାଣି ଭେଷଜ ବିଭାଗ, ଶିଶୁ ରୋଗ ବିଶେଷଜ୍ଞ, ଶଲ୍ୟ ଚିକିତ୍ସା ବିଭାଗ, ଜଣେ ଏମବିବିଏସ୍ ଡାକ୍ତର, ଜଣେ ହସ୍ପିଟାଲ ଇନଚାର୍ଜ, ଜଣେ ପ୍ରୋଗ୍ରାମିଂ ଇନଚାର୍ଜ ପଦବୀ, ୬ଜଣ ନର୍ସ ଓ ଏଏନ୍ଏମ୍ ପଦବୀ ଫାଙ୍କା ପଡ଼ିଛି। ଏହା ଉପରେ ପାଖାପାଖି ୧୪ ପଞ୍ଚାୟତର ଲୋକ ସହିତ ପଶ୍ଚିମବଙ୍ଗର ଲୋକ ମଧ୍ୟ ନିର୍ଭର କରିଥାନ୍ତି। ପ୍ରତ୍ୟେକ ଦିନ ଏଠାକୁ ଶହେରୁ ଦୁଇ ଶହ ରୋଗୀ ଆସିଥାନ୍ତି। ଏହି ମେଡିକାଲ୍ ଉପରେ ପାଖାପାଖି ୧ ଲକ୍ଷ ଲୋକ ନିର୍ଭର କରନ୍ତି। ଏଠାରେ ବର୍ତ୍ତମାନ ୨ଟି ଆମ୍ବୁଲାନ୍ସ ରହିଛି। ଯାହାକି ଦୁଇଟିରେ ସେବା ଯୋଗାଇବାରେ ଅସମ୍ଭବ ହୋଇପଡ଼ିଛି। ଫଳରେ ଲୋକେ ବହୁତ ହଇରାଣ ହେଉଛନ୍ତି। ଯେକୌଣସି ଛୋଟ କାରଣ ହେଲେ ମଧ୍ୟ ୮୦ କି.ମି. ଦୂର ବାଲେଶ୍ୱରର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଉଛି। ତେଣୁ ତୁରନ୍ତ ଏଠାରେ ଏକ ମେଡିସିନ ବିଭାଗର ଡାକ୍ତର ସହିତ ଏବଂ ସମସ୍ତ ପଦବୀ ପୂରଣ କରାଯାଉ ବୋଲି ପୂର୍ବତନ ସମିତିସଭ୍ୟ ଦିଗାମ୍ବର ଦାସଙ୍କ ସହ ଅନେକ ବୁଦ୍ଧିଜୀବୀ ଦାବି କରିଛନ୍ତି। ଏନେଇ ଆମେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଦୁଲାଲସେନ ଜଗଦେବଙ୍କୁ ଯୋଗାଯୋଗ କରାଯିବାରୁ ସେ କହିଥିଲେ ଯେ, ସରକାର ଏନେଇ ଖୁବ୍ ତତ୍ପର। ଦରଖାସ୍ତ ଦିଆଯାଇଛି, ଖୁବ୍ଶୀଘ୍ର ଡାକ୍ତର ପଦବର ପୂରଣ ହେବ।