ଟିଟିଲାଗଡ଼,୧୮ା୯(ଡି.ଏନ.ଏ): ବଲାଙ୍ଗୀର ଜିଲା ଟିଟିଲାଗଡ଼ ବ୍ଲକ ଅଦାବାହାଲ ପଞ୍ଚାୟତ ଅଧୀନ ଡୁଙ୍ଗରିଗୁଡା ଗ୍ରାମରେ ରବିବାର ଏକ ଅଭାବନୀୟ ଘଟଣା ଘଟିଛି । ଚାଷଜମିକୁ ପାଣି ମଡାଇବା ପାଇଁ ପୋଖରୀ ହିଡ଼ ଖୋଳିବା ବେଳେ ମାଟି ଧସିବାରୁ ତଳେ ଚାପି ହୋଇ ୨ ଚାଷୀଙ୍କ ଜୀବନ ଯାଇଛି। ମୃତକ ହେଲେ ଜମି ମାଲିକ ଗଣେଶ ବାଗ (୫୦ )ଓ ଶ୍ରମିକ ପରଦେଶୀ ଭୋଇ (୨୫ )।
ପ୍ରକାଶ ଯେ, ଚାଷ ଜମିରେ ପାଣି ନ ଥିବାରୁ ଗତ କିଛି ଦିନ ହେବ ଗଣେଶ ଓ ପରଦେଶୀ ଉକ୍ତ ପୋଖରୀ ହିଡକୁ କାଟିବା ପାଇଁ ଯାଉଥିଲେ। ରବିବାର ଉଭୟ ଯାଇଥିବା ବେଳେ ଅପରାହ୍ନରେ ଘରକୁ ଖାଇବା ପାଇଁ ନ ଆସିବାରୁ ପରିବାର ଲୋକେ ଘଟଣାସ୍ଥଳକୁ ଯାଇ ଖୋଜାଖୋଜି କରିଥିଲେ। ସେମାନଙ୍କ ପତ୍ତା ନ ମିଳିବାରୁ ଖୋଲାନ ସରପଞ୍ଚ ନରେଶ ଅଗ୍ରୱାଲଙ୍କୁ ଫୋନ ଯୋଗେ ଜଣାଇଥିଲେ । ସରପଞ୍ଚ ଅଗ୍ରୱାଲଙ୍କଠାରୁ ଖବର ପାଇ ଅଗ୍ନିଶମ ବାହିନୀ ପହଞ୍ଚି ମାଟି ତଳୁ ଦୁଇ ଜଣଙ୍କ ମୃତଦେହ ଉଦ୍ଧାର କରିଥିଲେ। ଏନେଇ ସିନ୍ଧେକେଲା ପୋଲିସ ଏକ ଅପମୃତ୍ୟୁ ମାମଲା(ନଂ.୪/୨୦୨୨) ରୁଜୁ କରି ତଦନ୍ତ ଚଳାଇଛି। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଟିଟିଲାଗଡ ଉପଖଣ୍ଡ ଡାକ୍ତରଖାନା ପଠାଯାଇଛି ।