କେନ୍ଦୁଝର,୧୯।୪ (ସ୍ବ.ପ୍ର.): କେନ୍ଦୁଝର ସଦର ମହଦେଈଯୋଡ଼ାର ଦୁଇ ସାଙ୍ଗ ଚୋରି କରିବାକୁ ଆସି ଧରାପଡ଼ିଛନ୍ତି। ସେମାନେ ଛାଡ଼ି ଯାଇଥିବା ଗାଡ଼ି ନେବାକୁ ଆସିଥିବା ବେଳେ ସ୍ଥାନୀୟ ଲୋକେ ସେମାନଙ୍କୁ ଧରି ପୋଲିସ ଜିମା ଦେଇଛନ୍ତି। ଟାଉନ ପୋଲିସ ଏକ ମାମଲା(ନଂ.୧୫୬/୨୩) ରୁଜୁ କରି ଉଭୟଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଦ୍ୱୟ ହେଲେ ବିପିନି ମୁଣ୍ଡା ଓ ଲିଟୁ ମୁଣ୍ଡା।
ସୂଚନା ଅନୁଯାୟୀ, ବିପିନି କିଛି ଦିନ ହେବ କେନ୍ଦୁଝର ସହର ପାଖ ବାଇପାସ ରାସ୍ତା ବାଦାମପଟି ଗଁାର ପ୍ରକାଶ ମହାନ୍ତଙ୍କ ଟାୟାର ଦୋକାନରେ କାମ କରି ପରେ କାମ ଛାଡି ଦେଇଥିଲେ। ତାଙ୍କ ସାଙ୍ଗ ଲିଟୁ ମଧ୍ୟ ସେଠାକୁ ଆସିବା ସହ ଉଭୟ ସାଙ୍ଗ ହୋଇ ବୁଲନ୍ତି। ତେବେ କିଛି ଦିନ ହେବ ବାଇପାସ ପାଖ ବିଭିନ୍ନ ଦୋକାନରୁ ରାତିରେ ଚୋରି ହେଉଥିଲା। ପ୍ରକାଶ ମହାନ୍ତ ଓ ତାଙ୍କ ଘର ମାଲିକ ଜ୍ୟୋତି ପ୍ରକାଶ ଗିରିଙ୍କ ଘରୁ ମଧ୍ୟ ଚୋରି ହୋଇଥିଲା। ବ୍ୟତିବ୍ୟସ୍ତ ହୋଇ ପ୍ରକାଶ ନିଜ ଟାୟାର ଦୋକାନରେ ରାତିରେ ଜଗି ରହିଥିଲେ। ଭୋର ସମୟରେ ବିପିନ ଓ ଲିଟୁ ଚୋରି କଲା ବେଳେ ପ୍ରକାଶ ଉଠି ପଡ଼ିବାରୁ ୨ଜଣ ଦୌଡି ପଳାଇଥିଲେ। ଘର ମାଲିକ ଜ୍ୟୋତି ଗିରିଙ୍କ ସହ ଗଁା ଲୋକେ ଖୋଜାଖୋଜି କରିବାରୁ ବୁଦା ଭିତରେ ଗୋଟେ ହିରୋ ପ୍ଲେଜର ଗାଡ଼ି ପାଇଥିଲେ। ସେମାନେ ଗାଡ଼ିକୁ ଉଦ୍ଧାର କରି ଟାଉନ ଥାନାକୁ ଖବର ଦେଇଥିଲେ। ଏହାପରେ ଛାଡିଯାଇଥିବା ଗାଡ଼ିକୁ ନେବାକୁ ଆସିଥିବା ବେଳେ ବିପିନି ଓ ଲିଟୁଙ୍କ କାରନାମା ଧରା ପଡ଼ିଥିଲା। ସେମାନେ ମିଶି ମହୁଲି ଖାଇବାକୁ ଚୋରି କରୁଥିଲେ ବୋଲି ମାନିଥିଲେ।
