ଯୋଡ଼ା,୨୬।୬(ଡି.ଏନ.ଏ.): କେନ୍ଦୁଝର ଜିଲା ଯୋଡ଼ା ସହରରେ ଶନିବାର ପୂର୍ବାହ୍ନରେ ଦୁଇ ଘଣ୍ଟା ଧରି ପ୍ରବଳ ବର୍ଷା ହେବାରୁ ଯୋଡ଼ାରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି ଜନସାଧାରଣ । ବର୍ଷା ଜଳ ନିଷ୍କାସନ ହୋଇ ନ ପାରି ସମଗ୍ର ରାସ୍ତା,ଜଳମଗ୍ନ ହୋଇ ଘର ଭିତରେ ବର୍ଷା ଜଳ ଲହଡ଼ି ମାରିଥିଲା। ଯୋଡ଼ା ସହରରେ ବିଭିନ୍ନ ଶିଳ୍ପ ସଂସ୍ଥା ଦ୍ୱାରା ଖୋଳା ଯାଉଥିବା ଖଣିଜ ସ୍ଲରି ପାଇପ ଲାଇନ ହେତୁ ଏହି କୃତ୍ରିମ ବନ୍ୟା ସହରର ଜନଜୀବନକୁ ଅସ୍ତବ୍ୟସ୍ତ କରିଦେଇଛି।
ସହରରେ ନିର୍ମାଣାଧୀନ ଫ୍ଲାଏ ଓଭର ପାଇଁ ବର୍ଷା ଜଳ ନିଷ୍କାସନ ହୋଇପାରି ନ ଥିଲା। ଯୋଡ଼ା ମଙ୍ଗଳା ମନ୍ଦିର, ମହାବୀର ଛକ, ସିଂଘାନିଆ ଟାୱାର ଛକ, କମାର ସାହି, ବସ୍ ଷ୍ଟାଣ୍ଡ, ହନୁମାନ ହଟିଂ ପ୍ରଭୃତି ବହୁ ସ୍ଥାନରେ ୱାଟର ଲଗିଂ ହେତୁ ବାସଗୃହ, ଦୋକାନ, ହୋଟେଲ ପ୍ରଭୃତିରେ ବର୍ଷାଜଳ ଆଣ୍ଠୁଏ ଉଚ୍ଚରେ ପ୍ରବାହିତ ହୋଇଥିଲା। ପାଇପ ଲାଇନ ଖୋଳା ହେବା ହେତୁ ଏହିପରି ବାରମ୍ବାର ଅସୁବିଧା ହେଉଥିବା ବ୍ୟବସାୟୀ ସନାତନ ମହଲ।, ହେମନ୍ତ ମହାନ୍ତି, ନିର୍ମଳ ସିଂ ପ୍ରମୁଖ ଅଭିଯୋଗ କରିଥିଲେ। ଏନେଇ କେତେକ ବସ୍ତିବାସୀନ୍ଦା ଅଭିଯୋଗ କରିଥିଲେ ଯେ, ବର୍ଷାଜଳ ନିଷ୍କାସନ ପାଇଁ ପୌରପାଳିକା ପକ୍ଷରୁ କୌଣସି ବ୍ୟବସ୍ଥା କରାଯାଇ ନାହିଁ। ସ୍ଲରୀ ପାଇପ୍ ଲାଇନ ଖୋଳ। ହେବା ଫଳରେ ଯୋଡ଼ା ସହରର ବାଂଶପାଣି ଅଞ୍ଚଳରେ ପାନୀୟ ଜଳ ଯୋଗାଣ ପାଇପ ଲାଇନ ଫାଟି ଯାଇଥିବା ଅଭିଯୋଗ କରିଛନ୍ତି। ପୌରପାଳିକା ଜନସାଧାରଣଙ୍କ ଅସୁବିଧାକୁ ଉପେକ୍ଷା କରି ପାଇପ୍ ଲାଇନ ଖୋଳୁଥିବା କମ୍ପାନୀଠାରୁ ରାଜସ୍ବ ନେଇ କମ୍ପାନୀକୁ ଖୋଳିବାକୁ ଅନୁମତି ଦେଇଥିବା ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଯୋଡ଼ା ପୌରଧ୍ୟକ୍ଷ ଜଗଦୀଶ ପ୍ରସାଦ ସାହୁ କହିଛନ୍ତି ଯେ, ଜନସାଧାରଣଙ୍କ ସାମୂହିକ ସ୍ବାର୍ଥକୁ ପ୍ରଥମେ ଗୁରୁତ୍ୱ ଦିଆଯିବ। ଆବଶ୍ୟକ ପଡିଲେ ବର୍ଷାଦିନ ପାଇଁ ସ୍ଲରି ପାଇପ ଲାଇନ ଖୋଳାକୁ ସ୍ଥଗିତ ରଖାଯିବ।
