ବ୍ରହ୍ମପୁର ଅଫିସ,୧୬ା୩: ଗଞ୍ଜାମ ଜିଲା ଫୁଲଟା ଗାଁରେ ୨ଜଣଙ୍କ ଘର ଉପରକୁ ବୋମାମାଡ ହୋଇଛି। କୋଠଘର ଦାୟିତ୍ୱ ହସ୍ତାନ୍ତରକୁ ନେଇ ଗୋଷ୍ଠୀ ବିବାଦରୁ ଏଭଳି ଘଟଣା ଘଟିଛି। ୧୫ରୁ ୧୬ଜଣ ଯୁବକ ସଂଘବଦ୍ଧ ଭାବେ ବିଭିନ୍ନ ମାରଣାସ୍ତ୍ର ଧରି କୋଠଘର ପୂର୍ବତନ ସଭାପତି ସତ୍ୟ ନାରାୟଣ ପ୍ରଧାନ ଏବଂ ଗାଁ ମୁଖିଆ ରାମ ଶାସମଲଙ୍କ ଘର ଉପରକୁ ବୋମା ପକାଇ ଆତଙ୍କ ଖେଳାଇଥିଲେ। ଏଥିରେ କେହି ମୃତାହତ ହୋଇନାହାନ୍ତି। ଦୁହିଁଙ୍କ ଅଭିଯୋଗକୁ ନେଇ ନିମଖଣ୍ଡି ଥାନାରେ ଦୁଇଟି ପୃଥକ୍ ମାମାଲା (ନଂ. ୮୩/୨୩ ଓ ୮୪/୨୩) ରୁଜୁ ହୋଇଛି। ପୋଲିସ ଘଟଣାର ତଦନ୍ତ କରି ୫ଜଣ ଯୁବକଙ୍କୁ ଗିରଫ କରିଛି। ସେମାନେ ହେଲେ ପୁଲଟା ଗ୍ରାମ ଚର୍ଚ୍ଚା ସାହିର ପିଙ୍କୁ ପ୍ରଧାନ(୨୭), ଗଙ୍ଗା ସାସମଲ (୨୫), ଲିଙ୍ଗରାଜ ସାସମଲ (୩୦), ଗଣେଶ ଚର୍ଚ୍ଚା (୨୨), ପପୁ ପ୍ରଧାନ (୨୯)। ଗୁରୁବାର ସେମାନଙ୍କୁ ମାମଲା ନମ୍ବର ୮୩/୨୩ ରେ କୋର୍ଟଚାଲାଣ କରାଯାଇଛି। ଘଟଣାସ୍ଥଳରୁ ୪ଟି ଅଫୁଟା ବୋମା, ଗୋଟିଏ ବାଇକ୍, ଫୁଟିଯାଇଥିବା ବୋମାର ଅଂଶ ପୋଲିସ ଜବତ କରିଥିଲା।
ସେହିପରି ଦ୍ୱିତୀୟ ମାମଲାରେ ପୋଲିସ ସେମାନଙ୍କ ବିରୋଧରେ କୋର୍ଟରେ ରିମାଣ୍ଡ ରିପୋର୍ଟ ଦାଖଲ କରିବ ବୋଲି କହିଛି। ଘଟଣାସ୍ଥଳରେ ଏବେବି ଚାପା ଉତ୍ତେଜନା ଲାଗି ରହିଛି। ସେଠାରେ ୨ପ୍ଲାଟୁନ୍ ଫୋର୍ସ ପଇଁତରା ମାରୁଛନ୍ତି।