ଖୁଣ୍ଟା,୧୫ା୧୦(ଡି.ଏନ.ଏ.): ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟରୁ ଗୁରୁବାର ରାତିରେ ବନ ବିଭାଗ ୨ ଶିକାରୀଙ୍କୁ ଗିରଫ କରିଛି। ସେମାନଙ୍କଠାରୁ ଗୁଳିଭର୍ତ୍ତି ୨ ଦେଶୀ ବନ୍ଧୁକ ଓ ବିସ୍ଫୋରକ ସାମଗ୍ରୀ ଜବତ ହୋଇଛି। ଗିରଫ ଅଭିଯୁକ୍ତ ଦ୍ୱୟ ହେଲେ ସପନଚୁଆ ପଞ୍ଚାୟତ ଅଧୀନ ଜୁରାଡିହି ଗ୍ରାମର ନନ୍ଦ ସିଂ (୫୫) ଓ ଭୀମ ସିଂ (୧୮)। ଡୁକୁରା ବନ୍ୟପ୍ରାଣୀ ବନାଞ୍ଚଳ ଅଧୀନରେ ଥିବା ଶିମିଳିପାଳ ଅଭୟାରଣ୍ୟରେ ଗୁରୁବାର ରାତିରେ ସେମାନେ ଶିକାର ଉଦ୍ଦେଶ୍ୟରେ ପ୍ରବେଶ କରିଥିଲେ। ତେବେ ରାତ୍ରି ପାଟ୍ରୋଲିଂରେ ଥିବା ବହଳଦା ଓ ସପନଚୁଆ ବନ୍ୟପ୍ରାଣୀ ଫରେଷ୍ଟ ବିଟର କର୍ମଚାରୀମାନେ ଅଭୟାରଣ୍ୟର କମ୍ପାଟମେଣ୍ଟ -୫ ନିକଟରେ ଉଭୟଙ୍କୁ କାବୁ କରିଥିଲେ। ଶୁକ୍ରବାର ଅଭିଯୁକ୍ତ ଦ୍ୱୟଙ୍କୁ କୋର୍ଟ ଚାଲାଣ କରାଯାଇଛି।