ଶିଲିଂ, ୨୬।୯: ମେଘାଳୟରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ଏକ ମର୍ମନ୍ତୁଦ ଦୁର୍ଘଟଣାରେ ୨ ଜଣ ମହିଳା କ୍ରିକେଟର୍ଙ୍କ ବିୟୋଗ ଘଟିଛି, ଯାହାକି କ୍ରୀଡ଼ାଜଗତକୁ ସ୍ତବ୍ଧ କରିଦେଇଛି।
ଘଟଣା ମେଘାଳୟର ପୂର୍ବ ଖାସି ପାର୍ବତ୍ୟାଞ୍ଚଳରେ ଘଟିଛି। ଶୁକ୍ରବାର ଏଠାରେ ପ୍ରବଳ ବର୍ଷା ଯୋଗୁ ଭୂସ୍ଖଳନ ଘଟି ଅନେକ ଘର ମାଟିତଳେ ପୋତି ହୋଇଯାଇଛି। ଯେଉଁଥିରେ ୨ ଜଣ ମହିଳା କ୍ରିକେଟର୍ଙ୍କ ମୃତ୍ୟୁ ହୋଇଥିବାବେଳେ ୩ ଜଣ ନିଖୋଜ ରହିଛନ୍ତି। ଜାତୀୟସ୍ତରରେ ମେଘାଳୟ ପକ୍ଷରୁ ପ୍ରତିନିଧିତ୍ୱ କରିସାରିଥିବା ୩୦ ବର୍ଷୀୟା ରାଜିଆ ଅହମ୍ମଦ ଓ ସ୍ଥାନୀୟ ଖେଳାଳି ଫିରୋଜିଆ ଖାନଙ୍କ ଶବ ଉଦ୍ଧାର କରାଯାଇଛି। ମେଘାଳୟ କ୍ରିକେଟ୍ ସଂଘର ସାଧାରଣ ସମ୍ପାଦକ ଗିଡିୟୋନ ଖାରକଙ୍ଗୋର କହିଛନ୍ତି, ୨୦୧୧-୧୨ରୁ ରାଜିଆ ବିଭିନ୍ନ ଜାତୀୟସ୍ତରୀୟ ପ୍ରତିଯୋଗିତାରେ ରାଜ୍ୟ ପକ୍ଷରୁ ପ୍ରତିନିଧିତ୍ୱ କରିଆସୁଛନ୍ତି। ଗତବର୍ଷ ବିସିସିଆଇ ଆନୁକୂଲ୍ୟରେ ଆୟୋଜିତ ଏକ ଟୁର୍ନାମେଣ୍ଟରେ ମଧ୍ୟ ସେ ମେଘାଳୟ ପକ୍ଷରୁ ଖେଳିଥିଲେ।