କୁଜଙ୍ଗ, ୨୩।୪: (ଡି.ଏନ୍.ଏ) ପାରାଦୀପ ତୈଳ ବିଶୋଧନାଗାର ପ୍ରକଳ୍ପର ନିଷିଦ୍ଧାଞ୍ଚଳକୁ ନକଲି ଏମ୍ପ୍ଲଇ କାର୍ଡରେ ପ୍ରବେଶ କରି ଆଲ୍କାଲାଇଟ୍ ଚୋରି କରିବାକୁ ଯୋଜନା କରିବା ଅଭିଯୋଗରେ ୨ କନିଷ୍ଠ ଯନ୍ତ୍ରୀ ଓ ଜଣେ ଅସ୍ଥାୟୀ କର୍ମଚାରୀଙ୍କୁ ଗିରଫ ପରେ ଶନିବାର କୋର୍ଟ ଚାଲାଣ କରାଯାଇଛି। ସେମାନେ ହେଲେ ମେସର୍ସ ବ୍ଲେଣ୍ଡିଂ କମ୍ପାନୀରେ କାର୍ଯ୍ୟରତ ଅସ୍ଥାୟୀ କର୍ମଚାରୀ ବିଶ୍ୱଜିତ୍ ଗୁରୁ, ବିଶୋଧନାଗାର ପ୍ରକଳ୍ପରେ କାର୍ଯ୍ୟରତ କନିଷ୍ଠଯନ୍ତ୍ରୀ ମୃଣ୍ମୟ କୁମାର ବାଇ ଓ କାଠିଆ ଦେହୁରୀ। ବିଶ୍ୱଜିତ୍ଙ୍କ ଘର ନୟାଗଡ଼ ଜିଲା ଇଟାମାଟି ଥାନା ଅନ୍ତର୍ଗତ ସାନ ପାଣ୍ଡୁସର ଗ୍ରାମରେ ହୋଇଥିବାବେଳେ କାଠିଆ କେନ୍ଦୁଝର ଜିଲା ଆନନ୍ଦପୁର ଥାନା ଅନ୍ତର୍ଗତ ଖଡିପାଳ ଗ୍ରାମର ବୋଲି ଜଣାପଡ଼ିଛି। ସେହିପରି ମୃଣ୍ମୟଙ୍କ ଘର ତିର୍ତ୍ତୋଲ ଥାନା ଅନ୍ତର୍ଗତ ବଣିତୋ ଗ୍ରାମରେ ବୋଲି ଜଣାପଡ଼ିଛି। ସେମାନଙ୍କ ନିକଟରୁ ଗୋଟିଏ କାର ୮ଟି ଖାଲି ଜାର୍କିନ ଜବତ ହୋଇଛି। ଅଭିଯୁକ୍ତମାନଙ୍କ ଜାମିନ ନାମଞ୍ଜୁର ହେବାରୁ ବିଚାର ବିଭାଗୀୟ ଜେଲ ହାଜତକୁ ପଠାଇ ଦିଆଯାଇଛି।
ଯେ, ଶୁକ୍ରବାର ପୂର୍ବାହ୍ନ ୯ଟା ସମୟରେ କେନ୍ଦ୍ରୀୟ ଶିଳ୍ପ ନିରାପତ୍ତା ବାହିନୀ ପକ୍ଷରୁ ନିୟମିତ ଯାଞ୍ଚ ଚାଲିଥିଲା। ଏହି ସମୟରେ (ଓଡି-୦୬ଡି-୪୨୧୨) ନମ୍ବର ଯୁକ୍ତ ଏକ ମାରୁତି କାର ଆଇଓଟିଏଲ୍ ନିକଟସ୍ଥ ମେସର୍ସ ବ୍ଲେଣ୍ଡିଂ ସାଇଟ୍ରେ ଅପେକ୍ଷା କରିଥିଲା। ନିରାପତ୍ତା ବାହିନୀ ପକ୍ଷରୁ ଯାଞ୍ଚ ସମୟରେ ଉକ୍ତ ଗାଡ଼ିରୁ ୩୦ ଲିଟରିଆ ଜାର୍କିନ୍ଗୁଡ଼ିକ ମିଳିଥିଲା। ଏହି ସମୟରେ ଗାଡ଼ି ଚାଳକ ବିଶ୍ୱଜିତ୍ ବିଶୋଧନାଗାର ପ୍ରକଳ୍ପରେ କନିଷ୍ଠଯନ୍ତ୍ରୀ ରୂପେ କାର୍ଯ୍ୟରତ ମୃଣ୍ମୟଙ୍କ ନକଲି ଏମ୍ପ୍ଲଇ କାର୍ଡ ଦେଖାଇଥିଲେ। ସନ୍ଦେହ ହେବାରୁ କେନ୍ଦ୍ରୀୟ ଶିଳ୍ପ ନିରାପତ୍ତା ବାହିନୀର ସବ୍ଇନ୍ସପେକ୍ଟର ଆଶିଷ ଜୋଶୀ ତାଙ୍କୁ ଘଟଣା ସମ୍ପର୍କରେ ଜେରା କରିଥିଲେ। ଏହାପରେ ବିଶ୍ୱଜିତ୍ ଆଇଓସିଏଲ୍ରେ କାର୍ଯ୍ୟରତ କନିଷ୍ଠ ଯନ୍ତ୍ରୀ କାଠିଆ ଓ ମୃଣ୍ମୟଙ୍କ ସହ ମିଶି ନିଷିଦ୍ଧାଞ୍ଚଳରୁ ଆଲକ୍ଲାଇଟ ଆଣି ବାହାରେ ବିକ୍ରି କରିବାର ଯୋଜନା କରିଥିବା କହିଥିଲେ। ଏନେଇ ଶିଳ୍ପ ନିରାପତ୍ତା ବାହିନୀ ୩ ଅଭିଯୁକ୍ତଙ୍କୁ ଅଟକ ରଖି ଅଭୟଚାନ୍ଦପୁର ଥାନାରେ ଲିଖିତ ଅଭିଯୋଗ କରାଯାଇଥିଲା। ଏହାକୁ ଭିତ୍ତିକରି ପୋଲିସ ଥାନାରେ ମାମଲା (ନଂ. ୧୦୫/୨୩) ରୁଜୁ କରିଛି। ସୂଚନାଯୋଗ୍ୟ, ଉନ୍ନତ ମାନର ପେଟ୍ରୋଲ ଶୋଧନ ନିମନ୍ତେ ଆଲ୍କାଲାଇଟ୍ ବ୍ୟବହାର କରାଯାଏ।