ରାୟଗଡ଼ା,୧୩।୬(ଆଶିଷ ରଞ୍ଜନ ପଣ୍ଡା): ଏକ ଟ୍ୟାଙ୍କର ମାଡ଼ିଯିବାରୁ ୨ ସ୍କୁଟି ଆରୋହୀଙ୍କ ମୃତ୍ୟୁ ଘଟିଛି। ରାୟଗଡା ଜିଲା ଚାନ୍ଦିଲି ଥାନା ଅଧୀନ ଭାକୁରଗୁଡା ଗାଁ ନିକଟରେ ଗୁରୁବାର ରାତି ପ୍ରାୟ ୯ଟାରେ ଏହି ଦୁର୍ଘଟଣା ଘଟିଛି। ମୃତକ ଦ୍ୱୟ ହେଲେ ପୁରେନ୍ଦ୍ର ମହାନନ୍ଦିଆ (୨୯) ଏବଂ ମନୀଷା ବେଗରାଇ। ପୁରେନ୍ଦ୍ରଙ୍କ ଘର କଲ୍ୟାଣସିଂହପୁର ବ୍ଲକ କରପା ପଞ୍ଚାୟତ ଅନ୍ତର୍ଗତ ପାଣ୍ଡ୍ରାପଡା ଗ୍ରାମରେ ହୋଇଥିବା ବେଳେ ମନୀଷାଙ୍କ ଘର କୋରାପୁଟ ଜିଲା ବୋରିଗୁମ୍ମା ମାଣିକେଶ୍ୱରୀ ସାହିରେ।
ପୋଲିସ ସୂଚନା ଅନୁଯାୟୀ, ମନୀଷା ସିକରପାଇରେ ଥିବା ହର୍ଷା ଟ୍ରଷ୍ଟ ଏନଜିଓରେ କାମ କରୁଥିଲେ। ପୁରେନ୍ଦ୍ର ଏବଂ ମନୀଷା ସ୍କୁଟି ଯୋଗେ ଜେକେପୁରରୁ ରାୟଗଡ଼ା ଆସୁଥିଲେ। ଭାକୁରଗୁଡା ଗାଁ ନିକଟରେ ସ୍କୁଟି ଡିଭାଇଡର ସହ ପିଟି ହୋଇଯିବାରୁ ଉଭୟ ରାସ୍ତା ଉପରେ ଛିଟକି ପଡ଼ିଥିଲେ। ଏହି ସମୟରେ ପଛରୁ ଆସୁଥିବା ଏକ ଟ୍ୟାଙ୍କର ନମ୍ବର (ଓଡି-୧୪-ଏବି-୨୭୨୨) ସେମାନଙ୍କ ଉପରେ ମାଡି ଯାଇଥିଲା। ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ହେଲେ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଛନ୍ତି। ଖବରପାଇ ଚାନ୍ଦିଲି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହିତ ଦୁର୍ଘଟଣାଗ୍ରସ୍ତ ଟ୍ୟାଙ୍କରକୁ ଅଟକ ରଖିଛି।