ସେମିଳିଗୁଡ଼ା/ସୁନାବେଡ଼ା,୧୯।୫ (ସ୍ବ.ପ୍ର.): ପୂର୍ତ୍ତ ବିଭାଗ ଅଧୀନରେ ଥିବା ସେମିଳିଗୁଡ଼ା-ନନ୍ଦପୁର ରାସ୍ତା ଅବସ୍ଥା ଶୋଚନୀୟ। ସେମିଳିଗୁଡ଼ା ଟ୍ରାଫିକ ଛକରୁ କୋଡ଼ିଗାଁ ଛକ ପର୍ଯ୍ୟନ୍ତ ପ୍ରାୟ ୨କି.ମି. ରାସ୍ତାର ଅବସ୍ଥା ୨ବର୍ଷ ହେବ ଶୋଚନୀୟ ହୋଇପଡ଼ିଛି। ବିପଦସଙ୍କୁଳଭାବେ ଲୋକେ ଯାତାୟାତ କରୁଛନ୍ତି। କେବେ ଏହି ରାସ୍ତା ଅବସ୍ଥା ବଦଳିବ ବୋଲି ଲୋକେ ପ୍ରଶ୍ନ କରିଛନ୍ତି।
ଏହି ରାସ୍ତା ଉପରେ ବହୁ ସରକାରୀ କାର୍ଯ୍ୟାଳୟ ସହିତ ଥାନା, ଆର୍ଆଇ ଅଫିସ, ଗ୍ରାମୀଣ ନ୍ୟାୟାଳୟ, କୋର୍ଟ, ବନ ବିଭାଗ କାର୍ଯ୍ୟାଳୟ ଏବଂ ମେଡିକାଲକୁ ଆସୁଥିବା ଶହ ଶହ ଲୋକ ନିର୍ଭର କରୁଥିଲେ ସୁଦ୍ଧା ଏହାର ମରାମତି ଦିଗରେ ଧ୍ୟାନ ଦିଆଯାଉ ନ ଥିବା ବାରମ୍ବାର ଅଭିଯୋଗ ହୋଇ ଆସୁଛି। ଏନେଇ ବହୁବାର ଖବର ପ୍ରକାଶ ପରେ ମଧ୍ୟ ଚେତୁନାହିଁ ପ୍ରଶାସନ। ଅପରପକ୍ଷରେ ପୂର୍ତ୍ତ ବିଭାଗ ପକ୍ଷରୁ ବୁଶ୍ କଟିଂ ନାଁରେ ଜାଲ୍ ବିଲ୍ କରି କିଛି ନ୍ୟସ୍ତସ୍ବାର୍ଥ ଅଧିକାରୀ ଓ ଠିକାଦାର ଲକ୍ଷ ଲକ୍ଷ ଟଙ୍କା ଆତ୍ମସାତ୍ କରିଥିବା ଅଭିଯୋଗ ମଧ୍ୟ ହେଉଛି। ହେଲେ ରାସ୍ତା ପ୍ରତି କେହି ଜଣେ ବି ଧ୍ୟାନ ଦେଉନାହାନ୍ତି ଯାହା କ୍ଷୋଭର ବିଷୟ ପାଲଟିଛି। ସେହି ରାସ୍ତାର ବିଲେଇଗୁଡ଼ା ଛକ ନିକଟରେ ବିଭାଗ ପକ୍ଷରୁ ତିଆରି ଚାଲିଥିବା ଏକ କଲଭର୍ଟ କାମକୁ ୫ ମାସରୁ ଊଦ୍ଧର୍ବ ସମୟ ବିତିଯାଇଥିଲେ ମଧ୍ୟ ତାହା ସମ୍ପୂର୍ଣ୍ଣ ହୋଇପାରୁ ନାହିଁ। ଫଳରେ ଯିବା ଆସିବା କରୁଥିବା ଲୋକମାନେ ବିଭିନ୍ନ ସମୟରେ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ଆର୍ ଆଣ୍ଡ ବି ପଟ୍ଟାଙ୍ଗି ସବ୍ଡିଭିଜନ ଏସ୍ଡିଓ କୃଷ୍ଣଚନ୍ଦ୍ର ସାହୁଙ୍କୁ ପଚାରିବାରୁ କଲଭର୍ଟ କାମଟି ଜରୁରିକାଳୀନ ପାଣ୍ଠିରୁ କରାଯାଉଛି। କାମ ଦିଆଯାଇଥିବା ଠିକାସଂସ୍ଥା ଅନ୍ୟ ଏକ ଠିକା ସଂସ୍ଥାକୁ କାମଟିକୁ ବିକିଦେଇଛି। ଫଳରେ କାମ ଅଧାପନ୍ତରିଆ ହୋଇ ପଡ଼ିରହିଥିବା ସେ କହିଛନ୍ତି। ରାସ୍ତା କାମ ପାଇଁ ପାଣ୍ଠିର ଅଭାବ ରହିଛି। ତେଣୁ କାମ ହୋଇ ପାରୁନାହିଁ ବୋଲି ସେ କହିଛନ୍ତି। ପ୍ରଥମ ଠିକା ସଂସ୍ଥାକୁ କଳା ତାଲିକାଭୁକ୍ତ କରିବାକୁ ବୁଦ୍ଧିଜୀବୀ ଦାବି କରିଛନ୍ତି। ରାସ୍ତା ମରାମତି କିମ୍ବା ନିର୍ମାଣ ପାଇଁ ବିଭାଗରେ ପାଣ୍ଠି ନାହିଁ । ତେବେ ବୁଶ୍୍ କଟିଂ ଓ ପଟ୍ ହୋଲ୍ ପାଇଁ ଖର୍ଚ୍ଚ ହେଉଥିବା ଲକ୍ଷାଧିକ ଟଙ୍କା କେଉଁଠୁ ଆସୁଛି ବୋଲି ପ୍ରଶ୍ନ ଉଠୁଛି। ଏଥିପ୍ରତି ଜିଲା ପ୍ରଶାସନ ଦୃଷ୍ଟିଦେବାକୁ ବୁଦ୍ଧିଜୀବୀ ଦାବି କରିଛନ୍ତି।
