ସ୍ବିଜରଲାଣ୍ଡର ଟ୍ରେନ୍ ଯାତ୍ରା ବେଶ୍ ମନୋରମ। ନିକଟରେ ଏହି ରେଳସେବା ୧୭୫ ବର୍ଷ ପୂରଣ କରିଛି। ଆଉ ଏହି ଅବସରରେ ଏଠାକାର ରେଳ କମ୍ପାନୀ ତିଆରି କରିଛି ପୃଥିବୀର ସବୁଠାରୁ ଲମ୍ବା ଟ୍ରେନ୍। ସ୍ବିସ୍ ଟ୍ରାନ୍ସପୋର୍ଟ କମ୍ପାନୀ ରେହଟିଶିୟନ ରେଲଓ୍ବେ ଓ ସ୍ବିସ୍ ଟ୍ରେନ୍ ନିର୍ମାତା କମ୍ପାନୀ ଷ୍ଟେଡଲର୍ ଏକତ୍ର ମିଶି ଏହି ଟ୍ରେନ୍ ନିର୍ମାଣ କରିଛନ୍ତି। ଉକ୍ତ ଟ୍ରେନ୍କୁ ୨୫ଟି ଟ୍ରେନ୍ ମିଶାଇ କରାଯାଇଛି, ଯେଉଁଥିରେ ଅଛି ୧୦୦ଟି ବଗି। ଆଉ ଏହାର ଲମ୍ବ ୨ କି.ମି। ଉକ୍ତ ଲମ୍ବା ଟ୍ରେନ୍ ୨୫ କି.ମି. ଯାତ୍ରା କରିଥିଲା। ଆଉ ସେଥିରେ ୩୦୦୦ ଯାତ୍ରୀ ଯାତ୍ରା କରିଥିଲେ। ଏହି ଯାତ୍ରାକୁ ଟିଭିରେ ସମସ୍ତଙ୍କୁ ଦେଖାଇବା ଲାଗି ୧୯ଟି କ୍ୟାମେରାକୁ ଡ୍ରୋନ ଓ ହେଲିକପ୍ଟରରେ ଫିଟ୍ କରାଯାଇଥିଲା। ଯେଉଁ ରୁଟ୍ରେ ଟ୍ରେନ୍ଟି ଗଲା ତାହାକୁ ଏଲବୁଲା ଲାଇନ୍ କୁହାଯାଏ। ଆଉ ତାହା ୟୁନେସ୍କୋର ଓ୍ବର୍ଲଡ ହେରିଟେଜ୍ ଅନ୍ତର୍ଗତ ଅଟେ। ଏହି ଲାଇନ୍ ପୂର୍ବ ସ୍ବିଜରଲାଣ୍ଡର ପ୍ରେଡାରୁ ଏଲଓ୍ବାନ୍ୟୁ ପର୍ଯ୍ୟନ୍ତ ଯାଇଛି। ଆଲ୍ପସ ପର୍ବତମାଳା ମଧ୍ୟ ଦେଇ ଯାଇଥିବା ଉକ୍ତ ରେଳ ଲାଇନ୍ରେ ଟ୍ରେନ ଚଳାଇବା ବହୁତ କଷ୍ଟକର। କାରଣ ଯେଉଁଠି ସାଧାରଣ ନ୍ୟାରୋଗେଜ୍ ୧.୪ ମିଟରର ହୋଇଥାଏ, ଏହାର ରେଳଧାରଣାର ଚଉଡା କିନ୍ତୁ ମାତ୍ର ୧ ମିଟର ଅଟେ। ତା’ଛଡା ରାସ୍ତାରେ ୨୨ଟି ଟନେଲ, ୪୮ଟି ବ୍ରିଜ୍ ପଡିଥାଏ। ଆଉ ରେଳ ଲାଇନ୍ର ଉଭୟ ପାର୍ଶ୍ୱରେ ଗଭୀର ଘାଇ ଅଛି। ରେଳଧାରଣ ଅଙ୍କା ବଙ୍କା ତେଣୁ ଟ୍ରେନକୁ ଦ୍ରୁତଗତିରେ ଚଳାଇ ହୁଏନା। ୭ଜଣ ଡ୍ରାଇଭର୍ଙ୍କ ଉପରେ ଏହି ଟ୍ରେନ୍ ଚଳାଇବା ଦାୟିତ୍ୱ ଥିଲା। ଟ୍ରେନ୍ର ଗତି ସାମାନ୍ୟ ବଢିଲେ ବି ରେଳଧାରଣ ଉପରେ ଚାପ ପଡି ବଡ ଦୁର୍ଘଟଣା ହେବାର ବି ଆଶଙ୍କା ଥିଲା। ତେଣୁ ୨୫ କି.ମି. ଯାତ୍ରାକୁ ଘଣ୍ଟା ପ୍ରତି ମାତ୍ର ୩୫ କି.ମି ବେଗରେ ଚଳାଇ ୧ ଘଣ୍ଟାରେ ଟ୍ରେନ୍କୁ ଗନ୍ତବ୍ୟ ସ୍ଥଳରେ ପହଞ୍ଚାଯାଇଥିଲା।