ଆନନ୍ଦପୁର,୨୪ା୫(ସୁଶାନ୍ତ କୁମାର ସାହୁ): ଓଡ଼ିଶାରେ ଆସନ୍ତାକାଲି ଅର୍ଥାତ୍ ଶନିବାର ତୃତୀୟ ପର୍ଯ୍ୟାୟ ମତଦାନ ଉଭୟ ଆନନ୍ଦପୁର ଏବଂ ଘସିପୁରା ନିର୍ବାଚନ ମଣ୍ଡଳୀରେ ଅନୁଷ୍ଠିତ ହେବ। ଆନନ୍ଦପୁର ନିର୍ବାଚନମଣ୍ଡଳୀରେ ୨ ଲକ୍ଷ ୩୩ ହଜାର ୨୦୩ ଭୋଟରଙ୍କ ମତଦାନ ପାଇଁ ୨୯୧ଟି ମତଦାନ କେନ୍ଦ୍ର ବ୍ୟବସ୍ଥା ରହିଛି। ନିର୍ବାଚନମଣ୍ଡଳୀରେ ୧ ଲକ୍ଷ ୧୭ ହଜାର ୬୮୮ ଜଣ ପୁରୁଷ ଭୋଟର ରହିଥିବା ବେଳେ ୧ ଲକ୍ଷ ୧୫ ହଜାର ୫୦୬ ଜଣ ମହିଳା ଭୋଟର ଅଛନ୍ତି। ଅନ୍ୟାନ୍ୟ ୯ ଜଣ ଭୋଟର ଅଛନ୍ତି। ନିର୍ବାଚନ ମଣ୍ଡଳୀରେ ୩୩ଟି ବୁଥ୍ ଅତି ସମ୍ବେଦନଶୀଳ ବୁଥ୍ ରହିଥିବାବେଳେ ୩୦ଟି ବୁଥ୍ର ବ୍ୟବସ୍ଥା ରହିଛି। ନିର୍ବାଚନକୁ ଶାନ୍ତିଶୃଙ୍ଖଳାର ସହିତ ପରିଚାଳନା ପାଇଁ ଜଣେ ଅତିରିକ୍ତ ଆରକ୍ଷୀ ଅଧୀକ୍ଷକ ରହିଥିବାବେଳେ ଦୁଇ ଜଣ ଡିଏସ୍ପି, ୬ ଜଣ ଇନ୍ସପେକ୍ଟର, ୫୩ ଜଣ ଏସ୍ଆଇ ଓ ଏଏସ୍ଆଇ, ୨୪୨ ଜଣ କନଷ୍ଟେବଳ, ୧୮୨ ହୋମଗାର୍ଡ ୪୬ ଜଣ ଗ୍ରାମରକ୍ଷୀ ରହିଛନ୍ତି।
ସେହିପରି ଘସିପୁରା ନିର୍ବାଚନମଣ୍ଡଳୀରେ ୨ ଲକ୍ଷ ୨୮ ହଜାର ୩୯୯ ଭୋଟର ରହିଥିବା ବେଳେ ୧ ଲକ୍ଷ ୧୪ ହଜାର ୩୪୬ ପୁରୁଷ ଭୋଟର ଓ ୧ ଲକ୍ଷ ୧୩ ହଜାର ୯୯୩ ଜଣ ମହିଳା ଭୋଟର ଏବଂ ୬୦ ଜଣ ଅନ୍ୟାନ୍ୟ ଭୋଟର ରହିଛନ୍ତି। ମତଦାନ ପାଇଁ ନିର୍ବାଚନମଣ୍ଡଳୀରେ ୩୦୦ ବୁଥ୍ର ବ୍ୟବସ୍ଥା ରହିଥିବା ବେଳେ ସେଥିମଧ୍ୟରୁ ୪୭ଟି ଅତିସମ୍ବେଦନଶୀଳ ବୁଥ୍ ରହିଛି। ନିର୍ବାଚନମଣ୍ଡଳୀରେ ୧୦ଟି ପିଙ୍କ୍ ବୁଥ୍ର ବ୍ୟବସ୍ଥା ଗ୍ରହଣ କରାଯାଇଛି। ନିର୍ବାଚନକୁ ଶାନ୍ତିଶୃଙ୍ଖଳାର ସହିତ ପରିଚାଳନା ପାଇଁ ଜଣେ ଅତିରିକ୍ତ ଆରକ୍ଷୀ ଅଧୀକ୍ଷକ ରହିଥିବାବେଳେ ଦୁଇ ଜଣ ଡିଏସ୍ପି ୬ ଜଣ ଇନ୍ସପେକ୍ଟର, ୫୯ ଜଣ ଏସ୍ଆଇ ଓ ଏଏସ୍ଆଇ, ୨୪୫ ଜଣ କନଷ୍ଟେବଳ,୧୯୭ ହୋମଗାର୍ଡ, ୩୫ ଜଣ ଗ୍ରାମରକ୍ଷୀ ରହିଛନ୍ତି। ନିରପେକ୍ଷ ଓ ଶାନ୍ତିଶୃଙ୍ଖଳାର ମତଦାନ ପାଇଁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଥିବା ଆନନ୍ଦପୁର ଉପଜିଲାପାଳ ତଥା ନିର୍ବାଚନ ଅଧିକାରୀ ଫାଲଗୁନୀ ମାଝି ପ୍ରକାଶ କରିଛନ୍ତି। ଏପରିକି ଗଣତନ୍ତ୍ରର ଏହି ମହାନ ପର୍ବରେ ସମସ୍ତେ ସାମିଲ ହୋଇ ବିନା ଚାପରେ ମତଦାନ ସାବ୍ୟସ୍ତ କରିବା ପାଇଁ ଗଣମାଧ୍ୟମ ଜରିଆରେ ପ୍ରକାଶ କରିଛନ୍ତି। ଉଭୟ ଆନନ୍ଦପୁର ଓ ଘସିପୁରା ନିର୍ବାଚନମଣ୍ଡଳୀର ସମସ୍ତ ବୁଥ୍ରେ ଓ୍ବେବ୍କାଷ୍ଟିଂର ବ୍ୟବସ୍ଥା ଗ୍ରହଣ କରାଯାଇଛି। ଯାହାର ନିୟନ୍ତ୍ରଣ ଆମ ନିକଟରେ ଓ ମୁଖ୍ୟ ନିର୍ବାଚନ କମିଶନ ଓଡ଼ିଶାଙ୍କ ନିକଟରେ ରହିଥିବାରୁ ସମସ୍ତ ଭୋଟର ନିଜକୁ ସୁରକ୍ଷିତ ନିଜର ବହୁମୂଲ୍ୟ ମତ ସାବ୍ୟସ୍ତ କରିବାକୁ ଉପଜିଲାପାଳ କହିଛନ୍ତି।
