ନୂଆଦିଲ୍ଲୀ,୧୧।୪: ଦେଶରେ ଦିନକୁ ଦିନ ବିଭିନ୍ନ ପ୍ରକାର ଠକେଇ ସାମ୍ନାକୁ ଆସୁଛି। ଏହାକୁ ପ୍ରତିହତ କରିବା ପାଇଁ ସରକାର ମଧ୍ୟ ବିଭିନ୍ନ ସଂସ୍ଥା ସହ ବିଚାରବିମର୍ଶ ସହ ସମାଧାନର ବାଟ ଖୋଜୁଛନ୍ତି। ବର୍ତ୍ତମାନ ସମୟରେ ଏପରିକି ସାଧାରଣ ଜନତାଙ୍କଠାରୁ ଆରମ୍ଭକରି ସରକାରଙ୍କ ପର୍ଯ୍ୟନ୍ତ ବିଭିନ୍ନ ସମୟରେ ଅର୍ଥ କାରବାର ଓ ବ୍ୟାଙ୍କିଙ୍ଗ୍ ସେବା ମାଧ୍ୟମରେ ଠକେଇ ଓ ଅର୍ଥ ଲୁଟର ଶିକାର ହେଉଛନ୍ତି। ଏହିସବୁ ଘଟଣାର ସାମାଧାନ ପାଇଁ କେବଳ ସର୍ତକତା ଜରୁରୀ ବୋଲି ବିଶେଷଜ୍ଞମାନେ ମତବ୍ୟକ୍ତ କରିଥିବା ବେଳେ କିଛି ସଂସ୍ଥା ଓ ଆଇଟି ବିଶେଷଜ୍ଞମାନେ ସରକାରଙ୍କୁ ଡିଜିଟାଲ କାରବାର ବୃଦ୍ଧି ସମ୍ପର୍କରେ ପ୍ରସ୍ତାବ ଦେଇଛନ୍ତି। ବିଭିନ୍ନ ପ୍ରସ୍ତାବକୁ ଅନୁଧ୍ୟାନକରି ସରକାର ମଧ୍ୟ ନଗଦ କାରବାରକୁ ହ୍ରାସ କରାଇବାକୁ ରିଜର୍ଭ ବ୍ୟାଙ୍କ ଆବଶ୍ୟକ ପଦକ୍ଷେପ ଗ୍ରହଣ କରୁ ବୋଲି ମତବ୍ୟକ୍ତ କରିଛନ୍ତି। ରିଜର୍ଭ ବ୍ୟାଙ୍କ ଦ୍ବାରା ଘୋଷିତ ମୁଦ୍ରାନୀତି ସମୀକ୍ଷାରେ ସୁଧହାର ଅପରିବର୍ତ୍ତିତ ରଖାଯିବା ସହ ଆଉ କେତେକ ଗୁରୁତ୍ୱପୂର୍ଣ୍ଣ ବିଷୟରେ ଘୋଷଣା କରାଯାଇଛି। ସମୀକ୍ଷା ବୈଠକ ସମୟରେ ଦେଶର ବିଭିନ୍ନ ବିଷୟ ଉପରେ ଆଲୋଚନା ହୋଇଥିଲା ବେଳେ ପେମେଣ୍ଟ ବ୍ୟାଙ୍କ ବା ଡିଜିଟାଲ ଓ୍ବାଲେଟର ବ୍ୟବହାର ଓ ସର୍ବାଧିକ ବାଲାନ୍ସ ରାଶି ବୃଦ୍ଧି ଏବଂ ଅଣବ୍ୟାଙ୍କିଙ୍ଗ୍ ପେମେଣ୍ଟ ସଂସ୍ଥାଗୁଡ଼ିକୁୁ ଆର୍ଟିଜିଏସ୍ ଓ ଏନ୍ଇଏଫ୍ଟି ଭଳି ସେବା ପ୍ରଦାନ ପାଇଁ ଅନୁମତି ଦେବାକୁ ବୈଠକରେ ନିଷ୍ପତ୍ତି ହୋଇଥିବା ସୂଚନା ମିଳିଛି। ଏହି ପରିପ୍ରେକ୍ଷୀରେ ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସଙ୍କ ଘୋଷଣା ଅନୁସାରେ ବର୍ତ୍ତମାନ ଡିଜିଟାଲ ବ୍ୟାଙ୍କିଙ୍ଗ୍ ବ୍ୟବହାରକାରୀ ଗ୍ରାହକମାନେ ପେମେଣ୍ଟ ବ୍ୟାଙ୍କ ଓ୍ବାଲେଟରେ ସର୍ବାଧିକ ୨ଲକ୍ଷ ଟଙ୍କା ପର୍ଯ୍ୟନ୍ତ ବାଲାନ୍ସ ରଖିପାରିବେ। ଏହା ପୂର୍ବରୁ ଏହି ସୀମା ୧ଲକ୍ଷ ଟଙ୍କା ରହିଥିଲା। ଦେଶରେ କାରବାର କରୁଥିବା ଅଗ୍ରଣୀ ପେମେଣ୍ଟ ବ୍ୟାଙ୍କ ଯଥା ପେଟିଏମ୍, ଏୟାରଟେଲ ପେମେଣ୍ଟ ବ୍ୟାଙ୍କ, ଇଣ୍ଡିଆ ପୋଷ୍ଟ ପେମେଣ୍ଟ ବ୍ୟାଙ୍କ, ଏନ୍ଏସ୍ଡିଏଲ୍, ଜିଓ ପେମେଣ୍ଟ ବ୍ୟାଙ୍କ ଭଳି କମ୍ପାନୀ ଏହାକୁ ସ୍ବାଗତ କରିଥିବା ଜଣାପଡିଛି। ଅନ୍ୟପକ୍ଷରେ ଅଣବ୍ୟାଙ୍କିଙ୍ଗ୍ ପେମେଣ୍ଟ ସଂସ୍ଥାଗୁଡ଼ିକୁ ଆର୍ଟିଜିଏସ୍ ଓ ଏନ୍ଇଏଫ୍ଟି ସେବା ପ୍ରଦାନ ପାଇଁ ଅନୁମତି ଦିଆଯାଇଛି। ଫଳରେ ସେମାନେ ଆର୍ଟିଜିଏସ୍ ଓ ଏନ୍ଇଏଫ୍ଟି ଆଦି ପାଣ୍ଠି ପ୍ରେରଣ କ୍ଷେତ୍ରରେ ଉପଯୁକ୍ତ ସେବା ପ୍ରଦାନ କରିପାରିବେ। ଏ ସମ୍ପର୍କରେ ଦାସ କହିଛନ୍ତି ,ବର୍ତ୍ତମାନଠାରୁ ଅଣବ୍ୟାଙ୍କିଙ୍ଗ୍ ପେମେଣ୍ଟ ସଂସ୍ଥାଗୁଡ଼ିକ ରିଜର୍ଭ ବ୍ୟାଙ୍କ ଦ୍ୱାରା ପରିଚାଳିତ କେନ୍ଦ୍ରୀକୃତ ପେମେଣ୍ଟ ବ୍ୟବସ୍ଥା (ସିପିଏସ୍)ର ସଦସ୍ୟ ହୋଇପାରିବେ।