ଭୋପାଳ,୩୦।୧୦(ଆଇଏଏନ୍ଏସ୍): ମଧ୍ୟପ୍ରଦେଶର ଇନ୍ଦୋରରେ ମୋବାଇଲ ଫୋନ୍ ଚୋରି ସନ୍ଦେହରେ ୨ ଜଣ ନାବାଳକଙ୍କୁ ଟ୍ରକ୍ରେ ବାନ୍ଧି ରାସ୍ତାରେ ଘୋଷାଡ଼ିବା ଭଳି ଦୁଃଖଦ ଘଟଣା ଦେଖିବାକୁ ମିଳିଛି। ଶୁକ୍ରବାର ଇନ୍ଦୋର ସହରର ରାଜେନ୍ଦ୍ରନଗର ଅଞ୍ଚଳରେ ଥିବା ଏକ ପରିବା ବଜାରରେ କେତେଜଣ ଲୋକ ୨ ନାବାଳକଙ୍କୁ ଏଭଳି ନିଷ୍ଠୁର ଦଣ୍ଡ ଦେଉଥିବାବେଳେ ଅନ୍ୟମାନେ ତାହା ଉପଭୋଗ କରୁଥିଲେ। ସୋସିଆଲ ମିଡିଆରେ ଭାଇରାଲ ହୋଇଥିବା ଭିଡିଓରେ ପିଲା ଦୁଇଜଣଙ୍କ ହାତଗୋଡ଼ ଦଉଡ଼ିରେ ବନ୍ଧାଯାଇ ସେମାନଙ୍କୁ ନିର୍ଦ୍ଦୟ ଭାବେ ଟ୍ରକ୍ ଦ୍ୱାରା ଘୋଷାଡ଼ି ନିଆଯାଉଛି। ଏହାଠାରୁ ଆହୁରି ପରିତାପର ବିଷୟ ଏହା ଯେ, ସେଠାରେ ଉପସ୍ଥିତ ଲୋକେ ଏହି ଦୃଶ୍ୟକୁ ମୋବାଇଲ ଫୋନ୍ରେ ଉତ୍ତୋଳନ କରିବା ସହ ଟ୍ରକ୍ ପଛରେ ଧାଉଁଥିବା ଦେଖାଯାଇଛି। ଭିଡିଓ ଭାଇରାଲ ହେବା ପରେ ସ୍ଥାନୀୟ ପୋଲିସ ନିଜ ଆଡୁ ମାମଲା ରୁଜୁ କରି ତଦନ୍ତ ଚଳାଇଛି। ଏଥିରେ ସମ୍ପୃକ୍ତ ବ୍ୟକ୍ତିଙ୍କୁ ଗିରଫ କରିବା ଲାଗି ତନାଘନା ଚାଲିଥିବା ଜଣେ ପୋଲିସ ଅଧିକାରୀ କହିଛନ୍ତି।
ସୂଚନାଯୋଗ୍ୟ, ଗତ ୨୪ ତାରିଖରେ କ୍ଷେତରୁ କପା ଚୋରି କରିବା ଅଭିଯୋଗରେ ଜଣେ ଲୋକଙ୍କୁ ଖୁଣ୍ଟରେ ବାନ୍ଧି ନିର୍ଘାତ ମାଡ଼ ମରାଯାଉଥିବାର ଭିଡିଓ ଭାଇରାଲ ହୋଇଥିଲା। ଗତ ଅଗଷ୍ଟରେ କାଠ ଚୋରି ଅଭିଯୋଗରେ ବିଦିଶା ଜିଲା ବନ କର୍ମଚାରୀ ଗୁଳି ଚଳାଇବାରୁ ଜଣେ ଆଦିବାସୀଙ୍କର ମୃତ୍ୟୁ ହେବା ସହ ଅନ୍ୟ ୩ ଜଣ ଆହତ ହୋଇଥିଲେ।