ଭୁବନେଶ୍ୱର,୮।୩: ସ୍ଥାନୀୟ କଳିଙ୍ଗ ଷ୍ଟାଡିୟମରେ ଆଗକୁ ଦୁଇଟି ଜାତୀୟ ହକି ଚାମ୍ପିୟନଶିପ୍ ଆୟୋଜନ ହେବ। ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ଏବଂ ନାଭାଲ ଟାଟା ହକି ଏକାଡେମୀର ମିଳିତ ଆନୁକୂଲ୍ୟରେ ପ୍ରଥମ ହକି ଇଣ୍ଡିଆ ଜୁନିୟର ମହିଳା ଏକାଡେମୀ ଜାତୀୟ ଚାମ୍ପିୟନଶିପ୍ ଓ ପ୍ରଥମ ହକି ଇଣ୍ଡିଆ ସବ୍ଜୁନିୟର ମହିଳା ଏକାଡେମୀ ଜାତୀୟ ଚାମ୍ପିୟନଶିପ୍ ଆୟୋଜନ ହେବ। କଳିଙ୍ଗ ଷ୍ଟାଡିୟମରେ ମାର୍ଚ୍ଚ ୧୭ ତାରିଖରୁ ଏହି ଦୁଇଟି ଟୁର୍ନାମେଣ୍ଟ ଆରମ୍ଭ ହେବ ।
ଜୁନିୟର ମହିଳା ଏକାଡେମୀ ଜାତୀୟ ଚାମ୍ପିୟନଶିପ୍ ୧୭ରୁ ୨୬ ମାର୍ଚ୍ଚ ମଧ୍ୟରେ ଆୟୋଜନ ହେବ। ସେହିପରି ସବ୍ ଜୁନିୟର ମହିଳା ଏକାଡେମୀ ଜାତୀୟ ଚାମ୍ପିୟନଶିପ୍ ମାର୍ଚ୍ଚ ୧୭ରୁ ୨୫ ତାରିଖ ମଧ୍ୟରେ ଖେଳାଯିବ। ଜୁନିୟର ମହିଳା ଚାମ୍ପିୟନଶିପ୍ରେ ୬ ଦିନଧରି ପୁଲ୍ ମ୍ୟାଚ୍ ଖେଳାଯିବ। ୨୩ ତାରିଖରେ କ୍ୱାର୍ଟର ଫାଇନାଲ ମ୍ୟାଚ୍ଗୁଡିକ ଖେଳାଯିବ। ଏହାପରେ ଦୁଇଟି ସେମିଫାଇନାଲ ଓ ଫାଇନାଲ ଯଥାକ୍ରମେ ୨୫ ଓ ୨୬ ତାରିଖରେ ଖେଳାଯିବ। ଏହି ଟୁର୍ନାମେଣ୍ଟରେ ମୋଟ ଉପରେ ୧୫ଟି ଦଳ ଅଂଶଗ୍ରହଣ କରିବେ। ସେହିପରି ସବ୍ଜୁନିୟର ମହିଳା ଏକାଡେମୀ ଚାମ୍ପିୟନଶିନ୍ରେ ୬ ଦିନ ଧରି ପୁଲ୍ ମ୍ୟାଚ୍ ଅନୁଷ୍ଠିତ ହେବ। ୨୪ ତାରିଖରେ ସେମିଫାଇନାଲ ଖେଳାଯିବ। ୨୫ ତାରିଖରେ ଫାଇନାଲ ଏବଂ ତୃତୀୟ ଓ ଚତୁର୍ଥ ସ୍ଥାନ ପାଇଁ ମ୍ୟାଚ୍ ଖେଳାଯିବ। ଏଥିରେ ୧୦ଟି ଦଳ ଅଂଶଗ୍ରହଣ କରିବେ।
ପୂର୍ବରୁ କଳିଙ୍ଗ ଷ୍ଟାଡିୟମରେ ହକି ବିଶ୍ୱକପ୍ ସମେତ ଏକାଧିକ ବିଶ୍ୱସ୍ତରୀୟ ଟୁର୍ନାମେଣ୍ଟ ସଫଳତାର ସହ ଆୟୋଜିତ ହୋଇଛି। ଏହି ଆଇକନିକ୍ ଷ୍ଟାଡିୟମରେ ଖେଳାଳିମାନେ ନିଜର ପ୍ରତିଭା ତଥା ଦକ୍ଷତା ପ୍ରମାଣ କରିବାର ସୁଯୋଗ ପାଇବେ । କଳିଙ୍ଗ ଷ୍ଟାଡିୟମରେ ଏହି ଦୁଇ ଟୁର୍ନାମେଣ୍ଟ ଆୟୋଜନ କରିବା ନେଇ ଆମେ ବେଶ୍ ଉତ୍ସାହିତ ଅଛୁ ବୋଲି କ୍ରୀଡ଼ା ଓ ଯୁବସେବା ବିଭାଗ ପ୍ରମୁଖ ସଚିବ ବିଶାଳ କୁମାର ଦେବ କହିଛନ୍ତି। ଏକାଡେମୀର ଖେଳାଳିମାନଙ୍କୁ ସେମାନଙ୍କ କୌଶଳ ଦେଖାଇବାର ସୁଯୋଗ ମିଳିବ ଓ ସେମାନେ ଦକ୍ଷ ହକି ଖେଳାଳି ହୋଇ ବାହାରିବେ ବୋଲି ସେ ଆଶାପ୍ରକାଶ କରିଛନ୍ତି।
