ପାରାଦୀପ,୧୩।୩(ସ୍ବ.ପ୍ର.):ପାରାଦୀପରେ ଭୂତଳ ଜଳସ୍ତର ହ୍ରାସ ପାଇବାରେ ଲାଗିଛି। ଦ୍ରୁତ ଶିଳ୍ପାୟନ ଓ ଆଧୁନିକ ଜୀବନ ଶୈଳୀ ଏହାର ପ୍ରମୁଖ କାରଣ ବୋଲି କୁହାଯାଉଛି। ପାରାଦୀପ ସହର ନିକଟ ଗ୍ରାମଞ୍ଚଳରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି। ଏହି ସହର ପାଖରେ ଥିବା ନୂଆଗଡ଼ ଓ ପାରାଦୀପଗଡ଼ ପଞ୍ଚାୟତରେ ଏବେ ଭୟଙ୍କର ଜଳାଭାବ ଦେଖାଦେଇଛି। ଏଠାକାର ପ୍ରାୟ ୯୦ ପ୍ରତିଶତ ପରିବାର ବୋତଲ ପାଣି କିଣି ପିଉଛନ୍ତି। ଗାଁରେ ଥିବା ନଳକୂପଗୁଡ଼ିକରୁ ଆଉ ପୂର୍ବଭଳି ପାଣି ବାହାରୁନାହିଁ। ଯେଉଁଠି ପାଣି ବାହାରୁଛି ସେହି ପାଣି ଲବଣାକ୍ତ ଓ ଲୁହା ଗନ୍ଧ ହେଉଛି। ସେଥିରେ ପୋଷାକ ସଫା କଲେ କପଡା ରଙ୍ଗ ନାଲିଆ ଭଳି ଦେଖାଯାଉଛି ବୋଲି ନୂଆଗଡ ବାସିନ୍ଦା ପ୍ରମୋଦ ଜେନା କୁହନ୍ତି। ତାଙ୍କ ସୂଚନା ଅନୁସାରେ, ନୂଆଗଡ ଗ୍ରାମରେ ଏବେ ୪୭୫ ପରିବାର। ପ୍ରାୟ ସବୁ ପରିବାର ବୋତଲ ପାଣି କିଣୁଛନ୍ତି। ସେହି ଗ୍ରାମରେ ସୌଦାମିନୀ ପ୍ରଧାନ ନାମକ ମହିଳା ଦୋକାନୀ କୁହନ୍ତି ଦିନକୁ ଗୋଟିଏ ଗାଡି ପାଣି ବୋତଲ ବିକୁଛନ୍ତି। ଗ୍ରାମର ଦିଲୀପ ସ୍ବାଇଁ କୁହନ୍ତି.ତାଙ୍କର ୧୦୦୦ ଫୁଟ ଗଭୀର ନଳକୂପ ଥିଲା। ଦୀର୍ଘଦିନ ଧରି ସେହି ପାଣି ବ୍ୟବହାର କରୁଥିଲେ। ଗତବର୍ଷ ଠାରୁ ସେହି ପାଣି ପାଟିରେ ଦେଇ ହେଉନାହିଁ। ଗଡ ବଜାରରେ ମଧ୍ୟ ସମାନ ଅବସ୍ଥା। ଉକ୍ତ ସ୍ଥାନରେ ୧୪ ଶହ ଫୁଟ ଖୋଳିଲା ପରେ ଯାଇ ମଧୁର ପାଣି ମିଳୁଛି ବୋଲି ବାସିନ୍ଦା ରମେଶ ତ୍ରିପାଠୀ କୁହନ୍ତି।
ସୂଚନାଯୋଗ୍ୟ, ଏହି ଦୁଇ ପଞ୍ଚାୟତ ମଧ୍ୟରେ ଏକଦା ୧୦ରୁ ଅଧିକ ନଦୀ, ଯୋର ଓ ସଇରାତ ଥିଲା। ଶିଳ୍ପାୟନ ପ୍ରଭାବରେ ଆଉ ଜଳଉତ୍ସ ନାହିଁ। ହଳଦୀପାଣି, ନୟନଯୋରୀ, ଶାମୁକାତିମୁଣ୍ଡା ଯୋର ଅଦୃଶ୍ୟ ହୋଇଗଲାଣି। ମଝିରେ ଅଛି ତାଳଦଣ୍ଡା କେନାଲ। ସେହି ପାଣି କେବଳ ଶିଳ୍ପସଂସ୍ଥା ପାଇଁ ପାଣି ଯୋଗାଉଛି। ଅପରପକ୍ଷେ ସାଧାରଣ ଲୋକ ଭୂତଳଜଳ ବ୍ୟବହାର କରୁଛନ୍ତି। ଏହାବାଦ୍ ବଡ କମ୍ପାନୀତ୍ଗୁଡିକ ମଧ୍ୟ ଭୂତଳଜଳ ବ୍ୟବହାର କରୁଥିବା ଅଭିଯୋଗ ହେଉଛି। ସେଥିପାଇଁ ପାଣି ହ୍ରାସ ପାଉଛି ବୋଲି ସରକାରୀ ଭାବେ କୁହାଯାଇଛି। ଜନସ୍ବାସ୍ଥ୍ୟ ବିଭାଗ କନିଷ୍ଠ ଯନ୍ତ୍ରୀ ମାନସ ମୁର୍ମୁଙ୍କୁ ପଚାରିଲେ କୁହନ୍ତି, ୩ ବର୍ଷ ହେଲା ଜଳସ୍ତର ଏମିତି ହ୍ରାସ ପାଇବାରେ ଲାଗିଛି। ଏଥିରେ ସେମାନେ କିଛି କରିପାରିବେ ନାହିଁ ବୋଲି କହି ନିରାଶକ୍ତ କରିଛନ୍ତି। ପାରାଦୀପ ବନ୍ଦରର ବରିଷ୍ଠ ଯନ୍ତ୍ରୀ ଗଙ୍ଗାଧର ସେଠୀଙ୍କ ମତରେ ଆଧୁନିକ ଜୀବନଶୈଳୀ ମଧ୍ୟ କେତେକାଂଶରେ ଦାୟୀ। ୨୦୦୦ ମସିହା ପୂର୍ବରୁ ବହୁ ଲୋକ ବାହାରେ ସ୍ନାନ ଓ ଶୌଚ କରୁଥିଲେ। ସେତେବେଳେ ଜଣେ ଲୋକ ଦିନକୁ ୫ ଲିଟର ପାଣି ବ୍ୟବହାର କରୁଥିଲେ। ଏବେ ଜଣେ ୨୨୦ ଲିଟର ପାଣି ଆବଶ୍ୟକ କରୁଛି। ଜଳ ଉତ୍ସ ଯେତିକି ଅଛି ଆମେ ତାକୁ ନଷ୍ଟ କରିବାରେ ଲାଗିଛେ। ଆଗକୁ ଆହୁରି ଭୟଙ୍କର ସ୍ଥିତି ହେବା ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ ।