ଭଞ୍ଜନଗର,୧୯।୭(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଆସିଷ୍ଟାଣ୍ଟ ସେସନ୍ସ ଜଜ ସୋମାଲିନା ମିଶ୍ର ମଙ୍ଗଳବାର ସାରେ ୨୦୧୭ରେ ପୋଲିସକୁ ଗୁଳି କରି ହତ୍ୟା ଉଦ୍ୟମ ମାମଲାର ବିଚାର କରି ୨ଜଣ ଅଭିଯୁକ୍ତଙ୍କୁ ୧୦ ବର୍ଷ ସଶ୍ରମ କାରାଦଣ୍ଡାଦେଶ ଶୁଣାଇଛନ୍ତି। ଅଭିଯୁକ୍ତ ଦ୍ୱୟ ହେଲେ ଗାଙ୍ଗପୁର ଥାନା ଅନ୍ତର୍ଗତ ସିଆରିମାଳର ଅପରାଧୀ ଲମ୍ବୁ ତାରିଣୀ ଏବଂ ତାଙ୍କ ସହଯୋଗୀ ଟୁକୁନା ପଢ଼ିଆରୀ। ରାୟ ପ୍ରକାଶ ପରେ ଅଭିଯୁକ୍ତ ଦ୍ୱୟ ଲମ୍ବୁ ଏବଂ ଟୁକୁନାଙ୍କୁ କଡା ସୁରକ୍ଷା ମଧ୍ୟରେ ଜେଲ ହାଜତକୁ ପଠାଇ ଦିଆଯାଇଛି। ଅଭିଯୁକ୍ତମାନେ ୨୦୧୭ ଏପ୍ରିଲ ୩୦ ତାରିଖ ଭୋର ସମୟରେ ପୋଲିସ ଉପରକୁ ଗୁଳି ଚଳାଇ ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଥିଲା। ଏହି ମାମଲାରେ ଆଉ ଜଣେ ଅଭିଯୁକ୍ତ ଫେରାର ଅଛନ୍ତି।
ଯେ, ଲମ୍ବୁଙ୍କ ନାମରେ ୨୦୧୭ ପୂର୍ବରୁ ଜିଲାର ବିଭିନ୍ନ ଥାନାରେ ଏକାଧିକ ମାମଲା ଥିଲା। ତେଣୁ ପୋଲିସର ମୋଷ୍ଟ ୱାଣ୍ଟେଡ଼ ତାଲିକାରେ ଲମ୍ବୁ ଥିଲା। ଘଟଣା ଦିନ ଲମ୍ବୁ ସିଆରିମାଳରେ ଥିବା ପୋଲିସ ଖବର ପାଇଥିଲା। ସୋରଡ଼ା ଏବଂ ଗାଙ୍ଗପୁର ପୋଲିସ ମିଳିତ ଭାବେ ଲମ୍ବୁଙ୍କୁ ଗିରଫ ପାଇଁ ଚଢାଉ କରିଥିଲା। ଏହି ସମୟରେ ଲମ୍ବୁ ପୋଲିସକୁ ଗୁଳିମାଡ କରି ଫେରାର ହେବା ପାଇଁ ଯୋଜନା କରିଥିଲା। ପୋଲିସ ଆତ୍ମରକ୍ଷା ପାଇଁ ପାଲଟା ଗୁଳି ଚାଳନା କରିଥିଲା। ଫଳରେ ଲମ୍ବୁ ଗୁରୁତର ଆହତ ହୋଇଥିଲେ। ଏହାପରେ ପୋଲିସ ଲମ୍ବୁ ଏବଂ ତାର ସହଯୋଗୀ ଟୁକୁନାଙ୍କୁ ଗିରଫ କରିଥିଲା। ଲମ୍ବୁଙ୍କୁ ଚିକିତ୍ସା ପାଇଁ ବ୍ରହ୍ମପୁର ବଡ ମେଡିକାଲକୁ ନିଆଯାଇଥିଲା। ଲମ୍ବୁର ଡାହାଣ ଗୋଡ଼ରେ ପ୍ରବଳ ଆଘାତ ଲାଗିଥିବା ଯୋଗୁଁ ସେଠାରେ ତାର ଗୋଟିଏ ଗୋଡକୁ କାଟି ଦିଆଯାଇଥିଲା। ଲମ୍ବୁ ସୁସ୍ଥ ହେବା ପରେ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଥିଲା। ସେହି ଦିନଠାରୁ ଲମ୍ବୁ ଜେଲରେ ବନ୍ଦୀ ଜୀବନ ବିତାଉଥିବା ବେଳେ ଟୁକୁନା ଜାମିନରେ ଥିଲେ। ବିଭିନ୍ନ ଦଫାରେ ଅଭିଯୁକ୍ତ ଦ୍ୱୟଙ୍କୁ ମଙ୍ଗଳବାର ୧୦ ବର୍ଷ ସଶ୍ରମ କାରାଦଣ୍ଡ ସହ ୧୦ ହଜାର ଟଙ୍କା ଜରିମାନା ପକାଯାଇଛି। ଜରିମାନା ଅର୍ଥ ଅନାଦେୟ ଅଧିକ ୩ ମାସ କାରାଦଣ୍ଡ ଭୋଗିବା ପାଇଁ ବିଚାରପତି ରାୟରେ ନିର୍ଦ୍ଦେଶ ଦେଇଛନ୍ତି। ସରକାରଙ୍କ ପକ୍ଷରୁ ବରିଷ୍ଠ ଆଇନଜୀବୀ ଉଷାକାନ୍ତ ପଟ୍ଟନାୟକ, ଲମ୍ବୁଙ୍କ ପାଇଁ ଆଇନଜୀବୀ ଖରାଂଶୁ ଶେଖର
ଦାସ, ଟୁକୁନା ପାଇଁ ଆଇନଜୀବୀ ଅଶ୍ୱିନୀ କୁମାର ପାଣିଗ୍ରାହୀ, ସୁନନ୍ଦ ତ୍ରିପାଠୀ
ମକଦ୍ଦମା ପରିଚାଳନା କରୁଥିଲେ।