ଚଣ୍ଡିଖୋଲ/ଛତିଆ,୧୭ା୧୦(ଡି.ଏନ୍.ଏ.): ମା’ ବିରଜାଙ୍କ ଦର୍ଶନ ପାଇଁ ଯାଜପୁର ବିରଜା କ୍ଷେତ୍ରକୁ ବାହାରିଥିଲେ ଭୁବନେଶ୍ୱର ଶହୀଦନଗର ଅଞ୍ଚଳର ଏକ ପରିବାର। ହେଲେ ମା’ଙ୍କ ଦର୍ଶନ ପୂର୍ବରୁ ଘଟିଲା ମର୍ମନ୍ତୁଦ ସଡ଼କ ଦୁର୍ଘଟଣା। ଫଳରେ ଅକାଳରେ ଚାଲିଗଲା ୨ ଯାଆଙ୍କ ଜୀବନ। ମୃତ ୨ ଯାଆ ହେଲେ ଭୁବନେଶ୍ୱର ଶହୀଦ ନଗର ଅଞ୍ଚଳର ରଜନୀକାନ୍ତ ପାଢ଼ୀଙ୍କ ସ୍ତ୍ରୀ ଗୀତାଞ୍ଜଳି ପାଢ଼ୀ(୬୬) ଓ ଅବନୀକାନ୍ତ ପାଢ଼ୀଙ୍କ ସ୍ତ୍ରୀ ଶୁଚିସ୍ମିତା ପାଢ଼ୀ(୫୩)। ୧୬ ନଂ. ଜାତୀୟ ରାଜପଥର ଯାଜପୁର ଜିଲା ବୈରୀ ଥାନା ଅନ୍ତର୍ଗତ ଛତିଆ ନିକଟରେ ରବିବାର ସକାଳ ପ୍ରାୟ ୮ଟାରେ ଘଟିଛି ଏହି ମର୍ମନ୍ତୁଦ ସଡ଼କ ଦୁର୍ଘଟଣା। ମୃତ ମହିଳା ଦ୍ୱୟ ପୂର୍ବତନ ମନ୍ତ୍ରୀ ତଥା ଭାଜପା ନେତ୍ରୀ ସୁରମା ପାଢ଼ୀଙ୍କ ଭାଉଜ ବୋଲି ଜଣାପଡ଼ିଛି।
ସୂଚନା ଅନୁସାରେ, ଭୁବନେଶ୍ୱରରୁ ଏକ ଟାଭେରା ଗାଡ଼ି (ନଂ.ଓଡି-୦୨-ଏଏଲ୍- ୭୮୩୪)ରେ ସମ୍ପୃକ୍ତ ପରିବାର ବାହାରିଥିଲେ। ସେମାନେ ବୈରୀ ଥାନା ଅନ୍ତର୍ଗତ ଛତିଆ ନିକଟ ଭଟିଆ ଛକରେ ଗାଡ଼ି ରଖି ଚା’ ପିଉଥିଲେ। ଏହି ସମୟରେ ଗାଡ଼ିର ଡ୍ରାଇଭର କାକରା ପିଠା ଆଣିବା ପାଇଁ ରାସ୍ତାର ଅପରପାର୍ଶ୍ୱକୁ ଯାଇଥିଲେ। ତେବେ ଡ୍ରାଇଭର ଗାଡ଼ିର ହ୍ୟାଣ୍ଡ୍ ବ୍ରେକ୍ ପକାଇ ନ ଥିବାରୁ ଗାଡ଼ିଟି ରାସ୍ତାର ଡାହାଣ ପାର୍ଶ୍ୱକୁ ଗଡ଼ିବା ଆରମ୍ଭ କରିଥିଲା। ଏହା ଦେଖି ଭୟଭୀତ ହୋଇ ଗାଡ଼ିରେ ବସିଥିବା ୨ ଯାଆ ଗୀତାଞ୍ଜଳି ଓ ଶୁଚିସ୍ମିତା ଗାଡ଼ିର ଡୋର ଖୋଲି ରାସ୍ତାର ଡାହାଣ ପାର୍ଶ୍ୱକୁ ଡେଇଁ ପଡ଼ିଥିଲେ। ଦୁର୍ଭାଗ୍ୟବଶତଃ ଏହି ସମୟରେ କଟକ ଆଡୁ ଆସୁଥିବା ଏକ ମାଲ୍ ବୋଝେଇ ଟ୍ରକ୍ (ନଂ.ଏପି-୨୬-ଟିଡି-୫୪୪୫) ସେମାନଙ୍କ ଉପରେ ଚଢ଼ି ଯାଇଥିଲା। ଫଳରେ ଘଟଣାସ୍ଥଳରେ ଉଭୟଙ୍କର ମୃତ୍ୟୁ ହୋଇଥିଲା। ଏହାଦେଖି ଟ୍ରକ୍ ଡ୍ରାଇଭର ସେ ସ୍ଥାନ ଛାଡ଼ି ଦୌଡ଼ି ପଳାଇଥିଲେ। ସ୍ଥାନୀୟ ଲୋକେ ତାଙ୍କୁ କାବୁ କରିଥିଲେ। ବୈରୀ ଥାନାଧିକାରୀ ସଂଘମିତ୍ରା ନାୟକ ଓ ଛତିଆ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚତ୍ ଗାଡ଼ି ଦୁଇଟିକୁ ଜବତ କରି ଥାନାକୁ ନେଇଥିଲେ। ବଡ଼ଚଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ତେବେ ଟାଭେରା ଡ୍ରାଇଭରଙ୍କ ଅବହେଳା ଯୋଗୁ ଏପରି ଘଟଣା ଘଟିଲା ବୋଲି ଅଭିଯୋଗ ହୋଇଛି। ଏ ସମ୍ପର୍କରେ ମୃତକଙ୍କ ପରିବାର ପକ୍ଷରୁ ଗୋପାଳକୃଷ୍ଣ ପାଢ଼ୀଙ୍କ ଏତଲାକ୍ରମେ ପୋଲିସ ନଂ.୧୭୫/୨୨ରେ ମାମଲା ରୁଜୁ କରିଛି। ଅନ୍ୟପକ୍ଷରେ ଏହି ଛକରେ ବେଆଇନ ଭାବେ ଜାତୀୟ ରାଜପଥକୁ ଲାଗି ବିଭିନ୍ନ ଦୋକାନ ରହିଛି। ଫଳରେ ଏଠାରେ ବାରମ୍ବାର ଦୁର୍ଘଟଣା ଘଟୁଛି। ତେଣୁ ଦୋକାନଗୁଡ଼ିକୁ ତୁରନ୍ତ ଉଚ୍ଛେଦ ପାଇଁ ଦାବି ହୋଇଛି।
