ନୂଆପଡ଼ା ଅଫିସ/ଖଡ଼ିଆଳ, ୨୧।୧୧(ଡି.ଏନ.ଏ.):ନୂଆପଡ଼ା ଜିଲା ଖଡ଼ିଆଳ ବ୍ଲକ ଅନ୍ତର୍ଗତ ରିଷିଗାଁରେ ସୁମିତ୍ରା ଦଳ ନାମକ ମହିଳାଙ୍କୁ ହତ୍ୟା କରିବା ଅଭିଯୋଗରେ ତାଙ୍କ ସ୍ବାମୀ ଚିତମନ ଦଳ, ଶ୍ୱଶୁର ଦ୍ରୋଣ ଓ ଶାଶୁ ପୁନେଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି। ବାପା ଓ ଜେଜେମା’ଜେଜେବାପା ଜେଲ ଯିବା ପରେ ଏବେ ଅସହାୟ ହୋଇ ପଡିଛନ୍ତି ଚିତମନଙ୍କ ଦୁଇ ଝିଅ ଲକ୍ଷ୍ମୀ ଓ ଅଷ୍ଟମୀ। ସାନ ଭଉଣୀ ଅଷ୍ଟମୀ ଅଷ୍ଟମ ଶ୍ରେଣୀରେ ପଢ଼ୁଥିବା ବେଳେ ଘର ସବୁ ଦାୟିତ୍ୱ ବଡ଼ ଭଉଣୀ ଲକ୍ଷ୍ମୀଙ୍କ ଉପରେ। ଘରେ ଯାହାକିଛି ଥିଲା କେଶ ଲଢ଼ି ସରିଯାଇଛି। ଏବେ ଖାଇବାକୁ ଚାଉଳ ମୁଠେ ମଧ୍ୟ ନାହିଁ। ଲକ୍ଷ୍ମୀ ମୂଳ ଲାଗି ପେଟକୁ ଦାନା ଯୋଗାଡ଼ କରୁଥିବା ବେଳେ ଏବେ ତାହା ମଧ୍ୟ ବନ୍ଦ ହୋଇଛି। ଫଳରେ ସବୁଦିନ ଖାଇବାକୁ ମିଳୁନାହିଁ ବୋଲି ଉଭୟେ କହିଛନ୍ତି। ମାସେ ତଳେ ଅଷ୍ଟମୀଙ୍କ ପେଟ ରୋଗ ବାହାରିଥିଲା। ଖଡ଼ିଆଳ ଉପଖଣ୍ଡ ଚିକିତ୍ସାଳୟରେ ଦେଖାଇ ଔଷଧ ଖାଇଲେ ମଧ୍ୟ କମିନାହିଁ। ଏବେ ପେଟ ବଢିବାକୁ ଲାଗୁଛି। ଟଙ୍କା ନ ଥିବାରୁ ଅଧିକ ଚିକିତ୍ସା କରି ହେଉନାହିଁ। ସ୍ମାର୍ଟ କାର୍ଡ ଥିଲେ ମଧ୍ୟ କାମକୁ ଆସୁନି। ସାନ ଭଉଣୀର ଦେଖାରେଖା କରିବା ପାଇଁ ଲକ୍ଷ୍ମୀ କୌଣସି କାମକୁ ଯାଇପାରୁନି, ଫଳରେ ଅଭାବରେ ରହିବାକୁ ବାଧ୍ୟ ହେଉଛନ୍ତି। ଏ ନେଇ ଖଡ଼ିଆଳ ଡାକ୍ତରଖାନାର ଇନଚାର୍ଜ ରଞ୍ଜିତ ରାଉତଙ୍କୁ ପଚାରିବାରୁ ଏକ ଡାକ୍ତରୀ ଦଳ ପଠାଇ ତଦନ୍ତ କରିବେ ଓ ଆବଶ୍ୟକ ଚିକିତ୍ସା ସୁବିଧା ଯୋଗାଇ ଦେବେ ବୋଲି କହିଛନ୍ତି। ତାଙ୍କର ପଡି କାର୍ଡ ଥିଲେ ମଧ୍ୟ ୩ ମାସ ହେଲା ଚାଉଳ ପାଇ ନ ଥିବା ଅଭିଯୋଗ କରିଛନ୍ତି। ମାଟି ଘର ଭାଙ୍ଗିବାକୁ ବସିଲାଣି। କାନ୍ଥରୁ ମାଟି ଖସି ପଡୁଛି। ଏବେ ତାଙ୍କ ପାଇଁ ଆହା ସାହା କେହି ନାହାନ୍ତି। ପ୍ରଶାସନ ଏଦିଗରେ ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଥିବା ବେଳେ ପ୍ରାପ୍ୟ ଖାଦ୍ୟ ଯୋଗାଇ ଦେବାକୁ ସ୍ଥାନୀୟ ସରପଞ୍ଚ ପ୍ରତିଶ୍ରୁତି ଦେଇଛନ୍ତି।
