ନୂଆଦିଲ୍ଲୀ, ୧୦।୫ : ବଙ୍ଗୋପସାଗରର ଦକ୍ଷିଣପୂର୍ବ ଉପକୂଳରୁ ଉଠିଥିବା ବାତ୍ୟା ଆସାନି ର ପ୍ରଭାବ ଅନୁଭୁତ ହେବା ଆରମ୍ଭ ହୋଇଛି। ଆନ୍ଧ୍ରପ୍ରଦେଶ, ଓଡିଶା, ତେଲେଙ୍ଗାନା ଏବଂ ତାମିଲନାଡୁରେ ପବନ ସହିତ ବର୍ଷା ଆରମ୍ଭ ହୋଇଛି। ଏହି ସମୟରେ ଏକ ଉପଗ୍ରହ ଚିତ୍ର ଅସୁବିଧାକୁ ବଢ଼ାଇ ଦେଇଛି ।
ଏହି ଚିତ୍ର ଦେଖିବା ପରେ ପାଣିପାଗ ବିଜ୍ଞାନୀମାନେ କହିଛନ୍ତି ଯେ ଭାରତ ମହାସାଗରର ଦକ୍ଷିଣ ଭାଗରେ ଆଉ ଏକ ଘୂର୍ଣ୍ଣିବଳୟ ସୃଷ୍ଟି ହୋଇଛି। ବୈଜ୍ଞାନିକମାନେ କହିଛନ୍ତି ଯେ ଭାରତ ମହାସାଗରରେ ଆସାନି ସହିତ ଅନ୍ୟ ଏକ ଘୂର୍ଣ୍ଣିବଳୟ ଶୀଘ୍ର ରୂପ ନେଉଛି। ଦକ୍ଷିଣ ଆଫ୍ରିକାର ଦେଶ ସେଚେଲ୍ସ ଦ୍ୱାରା ଏହାର ନାମ କରିମ୍ ରଖାଯାଇଛି।
ଏହା ବର୍ତ୍ତମାନ ୧୧୨ କିଲୋମିଟର ବେଗରେ ଗତି କରୁଛି। ପରେ ଏହାର ବେଗ ଘଣ୍ଟାପ୍ରତି ୧୪୦ କିଲୋମିଟରରେ ପହଞ୍ଚିବାର ସମ୍ଭାବନା ରହିଛି ବୋଲି ପାଣିପାଗ ବିଭାଗ ପକ୍ଷରୁୂ ପୂର୍ବାନୁମାନ କରାଯାଇଛି।
ଅସାନିର ପ୍ରଭାବ ଭାରତର ଦକ୍ଷିଣ ରାଜ୍ୟରେ ଦେଖାଯାଉଥିବାବେଳେ କରିମ୍ ଅଷ୍ଟ୍ରେଲିଆ ଆଡକୁ ଗତି କରୁଛି। ତେବେ ପାଣିପାଗ ବିଜ୍ଞାନୀଙ୍କ ଅନୁଯାୟୀ କରିମ୍ ଶୀଘ୍ର ଦୁର୍ବଳ ହେବ। ଏହାଦ୍ୱାରା ଅଧିକ କ୍ଷତି ହେବାର ଆଶଙ୍କା ନାହିଁ।
ପାଣିପାଗ ବିଜ୍ଞାନୀଙ୍କ ଅନୁଯାୟୀ, ସମାନ୍ତରାଳ ଭାବେ ଉତ୍ତର ଏବଂ ଦକ୍ଷିଣ ଦିଗରେ ବିପରୀତ ମାର୍ଗରେ ଗତି କରୁଥିବା ଦୁଇ ବାତ୍ୟା ସୃଷ୍ଟି ହେବା କିଛି ନୂଆ ଘଟଣା ନୁହେଁ। ୧୦୧୯ରେ, ବଙ୍ଗୋପସାଗରରୁ ଉଠିଥିବା ଘୂର୍ଣ୍ଣିବଳୟ ଫନି ବହୂ କ୍ଷୟକ୍ଷତି ସୃଷ୍ଟି କରିଥିଲା। ଏହି ସମୟରେ, ଭାରତ ମହାସାଗରର ଦକ୍ଷିଣ ଭାଗରେ ବାତ୍ୟା ଲୋର୍ନା ରୂପ ନେଇଥିଲା। ଫନି ଘଣ୍ଟା ପ୍ରତି ୨୫୦ କିଲୋମିଟର ବେଗରେ ଗତି କରୁଥିବାବେଳେ ଲୋର୍ନା ଘଣ୍ଟା ପ୍ରତି ୭୦ କିଲୋମିଟର ବେଗରେ ଗତି କରିଥିଲେ।
ପାଣିପାଗ ବିଜ୍ଞାନୀ ଡକ୍ଟର ଶମ୍ଭୁ ଦ୍ୱିବେଦୀଙ୍କ ଅନୁଯାୟୀ, ଯେତେବେଳେ ଦୁଇଟି ବାତ୍ୟା ସୃଷ୍ଟି ହୁଏ, ସେତେବେଳେ ସେମାନଙ୍କର ଚିତ୍ର ପ୍ରାୟ ସମାନ ହୋଇଥାଏ। ଉଭୟ ସମାନ ଦ୍ରାଘିମା ଉପରେ ଘୂର୍ଣ୍ଣନ କରନ୍ତି, କିନ୍ତୁ ଉଭୟର ଭିନ୍ନ ଦିଗ ରହିଥାଏ। ଉପଗ୍ରହ ଫଟୋରେ ଏହା ଦେଖିବାକୁ ମିଳେ। ଏହା ନୁହେଁ ଯେ କେବଳ ଭାରତ ମହାସାଗରରେ ଦୁଇଟି ଘୂର୍ଣ୍ଣିବଳୟ ଏକାସାଙ୍ଗରେ ଘଟିଥାଏ ।
ପଶ୍ଚିମ ପ୍ରଶାନ୍ତ ମହାସାଗରରେ ମଧ୍ୟ ଏହା ଦେଖାଯାଏ। ଅବଶ୍ୟ, ଏହା ପୂର୍ବ ପ୍ରଶାନ୍ତ ମହାସାଗରରେ କିମ୍ବା ଆଟଲାଣ୍ଟିକ ମହାସାଗରରେ ହୁଏ ନାହିଁ। କାରଣ ବିଷୁବ ରେଖାର ଦକ୍ଷିଣ ଅକ୍ଷାଂଶରେ ଟ୍ରପିକାଲ ସାଇକ୍ଲୋନ ସୃଷ୍ଟି ହୁଏ ନାହିଁ। ଏଗୁଡ଼ିକ ହେଉଛି ଘୂର୍ଣ୍ଣିବଳୟ ଯାହା ଉଷ୍ମ ଟ୍ରପିକାଲ ମହାସାଗରରେ ଘଣ୍ଟା ପ୍ରତି ୧୧୯ରୁ ଅଧିକ କିଲୋମିଟର ବେଗରେ ଗତି କରେ ଏବଂ ପ୍ରବଳ ବର୍ଷା ସହିତ ଆସେ। ଏଭଳି ସାମୁଦ୍ରିକ ଝଡ଼ ଯୋଗୁ ବନ୍ୟା, ଭୂସ୍ଖଳନ ଦ୍ୱାରା ଅଧିକ କ୍ଷତି ହୋଇଥାଏ ।