ଶ୍ରୀନଗର,୨୫।୯ : ଜମ୍ମୁ-କଶ୍ମୀରର କୁଲଗାମ ଜିଲାରେ ସୁରକ୍ଷା ବାହିନୀ ଦୁଇଟି ଆତଙ୍କବାଦୀ ମଡ୍ୟୁଲର ପର୍ଦ୍ଦାଫାଶ କରିଛନ୍ତି। ଏହା ସହିତ ପୋଲିସ ୫ ଜଣ ହାଇବ୍ରିଡ ଆତଙ୍କବାଦୀଙ୍କୁ ଗିରଫ କରିଛି। ପୋଲିସ ଏହି ସୂଚନା ପ୍ରଦାନ କରିଛି। ସେମାନଙ୍କଠାରୁ ଦୁଇଟି ପିସ୍ତଲ, ତିନୋଟି ହ୍ୟାଣ୍ଡ ଗ୍ରେନେଡ, ଗୋଟିଏ ୟୁବିଜିଏଲ ଏବଂ କିଛି ଗୁଳି ଜବତ କରାଯାଇଛି। ଏହା ବ୍ୟତୀତ ଆତଙ୍କବାଦୀଙ୍କ ନିକଟରୁ ୧୨ ରାଉଣ୍ଡ ପିସ୍ତଲ ଏବଂ ୨୧ ରାଉଣ୍ଡ ଏକେ-୪୭ ମଧ୍ୟ ଜବତ କରାଯାଇଛି।
ଅଧିକାରୀ କହିଛନ୍ତି ଗିରଫ ଆତଙ୍କବାଦୀମାନେ ଆଦିଲ ହୁସେନ ୱାନି, ସୁହେଲ ଅହମ୍ମଦ ଡାର, ଇତମାଦ ଅହମ୍ମଦ ଲାୱେ, ମେହେରାଜ ଅହମ୍ମଦ ଲୋନ ଏବଂ ସାବର ଅହମ୍ମଦ ଖାର ବୋଲି ଜଣାପଡିଛି। କାଇମୋ ପୋଲିସ ଷ୍ଟେଶନରେ ଏଫଆଇଆର ପଞ୍ଜୀକୃତ ହୋଇଛି ଏବଂ ଘଟଣାର ତଦନ୍ତ ଚାଲିଛି। ଏହି ଆତଙ୍କବାଦୀମାନେ ଲଶ୍କର-ଇ-ତୋଏବା ସହିତ ଜଡିତ ଥିବା ସୂଚନା ମିଳିଛି।
ହାଇବ୍ରିଡ ଆତଙ୍କବାଦୀ ମଡ୍ୟୁଲ ପୋଲିସ ଏବଂ ସୁରକ୍ଷା କର୍ମଚାରୀଙ୍କ ପାଇଁ ଅନେକ ମୁଣ୍ଡବିନ୍ଧାର କାରଣ ହୋଇଛି। ଏହି ଆତଙ୍କବାଦୀମାନଙ୍କର କୌଣସି ପୂର୍ବ ଅପରାଧିକ ଇତିହାସ ନାହିଁ। ସେମାନେ ଲୋକମାନଙ୍କ ମଧ୍ୟରେ ସାଧାରଣ ମଣିଷ ପରି ବାସ କରନ୍ତି ଏବଂ ଜନଗହଳି ପୂର୍ଣ୍ଣ ଅଞ୍ଚଳରେ ବୋମା ବିସ୍ଫୋରଣ କରି ପଳାୟନ କରନ୍ତି। ଏହି ଘଟଣା ପରେ ସେମାନେ ପୁନର୍ବାର ସାଧାରଣ ଲୋକଙ୍କ ପରି ଜୀବନଯାପନ ଆରମ୍ଭ କରନ୍ତି। ସେମାନଙ୍କୁ ଚିହ୍ନିବା ବହୁତ କଷ୍ଟକର। ଏହି କାରଣରୁ ସେମାନଙ୍କୁ ହାଇବ୍ରିଡ ଆତଙ୍କବାଦୀ କୁହାଯାଇଥାଏ।