ମାଲକାନଗିରି,୩ା୧୧(ଦୁର୍ଯ୍ୟୋଧନ ପାତ୍ର): ଛତିଶଗଡ଼ ସୁକ୍ମା ଜିଲାରେ ମାଓବାଦୀଙ୍କ ଆକ୍ରମଣରେ ୨ ଯବାନ ରବିବାର ଗୁରୁତର ହୋଇଛନ୍ତି। ଏହାସହ ସେମାନଙ୍କ ବନ୍ଧୁକ ମଧ୍ୟ ମାଓବାଦୀମାନେ ଛଡାଇ ନେଇଥିବା ଜଣାପଡିଛି। ଗୁରୁତର ଦ୍ୱୟ ହେଲେ କର୍ତ୍ତମ ଦେବା ଓ ସୋଢି କୁନା । ଏହି ଖବର ଜଣାପଡିବା ପରେ ପୋଲିସ କର୍ମଚାରୀମାନେ ପହଞ୍ଚି ସେମାନଙ୍କୁ ପ୍ରଥମେ ଜଗରଗୋଣ୍ଡା ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ତେବେ ଅବସ୍ଥା ଗୁରୁତର ଥିବାରୁ ସେମାନଙ୍କୁ ହେଲିକପ୍ଟର ଯୋଗେ ରାୟପୁର ସ୍ଥାନାନ୍ତର କରାଯାଇଥିବା ସୁକୁମା ଏସ୍ପି କିରଣ ଚୌହାନ ସୂଚନା ଦେଇଛନ୍ତି ।
ସୂଚନା ଅନୁଯାୟୀ, ସୁକ୍ମା ଜିଲା ଜଗରଗୋଣ୍ଡା ସାପ୍ତାହିକ ହାଟ ଚାଲିଥିବା ସମୟରେ ସେଠାରେ ଡିଆରଜିର ଯବାନ ପହରା ଦେଉଥିଲେ। ଏହି ସମୟରେ ସେଠାରେ କେତେକ ସଶସ୍ତ୍ର ମାଓବାଦୀ ପହଞ୍ଚି ପହରା ଦେଉଥିବା ୨ ଯବାନଙ୍କ ଉପରେ ଅତର୍କିତ ଆକ୍ରମଣ କରିଥିଲେ। ଫଳରେ ଘଟଣାସ୍ଥଳରେ କର୍ତ୍ତମ ଦେବା ଓ ସୋଢି କୁନା ଗୁରୁତର ହୋଇଥିଲା ବେଳେ ତାଙ୍କ ବନ୍ଧୁକ ମଧ୍ୟ ମାଓବାଦୀମାନେ ଛଡାଇ ନେଇ ଯାଇଛନ୍ତି।