ଅନୁଗୋଳ ଅଫିସ, ୪।୩: ଅନୁଗୋଳ ସଭାଘରଠାରେ ‘ଆମ ପୋଖରୀ’ ନେଇ କ୍ଲଷ୍ଟରସ୍ତରୀୟ କର୍ମଶାଳା ଶୁକ୍ରବାର ଅନୁଷ୍ଠିତ ହୋଇଯାଇଛି। ଏହି କର୍ମଶାଳାରେ ଜଳାଶୟ ପୁନରୁଦ୍ଧାର କରାଯିବା ସମ୍ପର୍କରେ ଆଲୋଚନା ହୋଇଥିଲା। ରାଜ୍ୟରେ ଥିବା ୨ ହଜାର ପରିତ୍ୟକ୍ତ ପୋଖରୀ ପୁନଃଜୀବନ ପାଇବା ସହ ସହରାଞ୍ଚଳରେ ଥିବା ଜଳାଶୟ ସୁରକ୍ଷିିତ ରହିବା ଉପରେ ଗୁରୁତ୍ୱ ଦିଆଯାଇଥିଲା। ସେହିପରି ପାଣି ଓ ମାଟି ପରସ୍ପର ସଂସ୍ପର୍ଶରେ ରହିଲେ ଆଦର୍ରତା ବଢ଼ିବା ସହ ପ୍ରଦୂଷଣ ରୋକାଯାଇ ପାରିବ ବୋଲି କର୍ମଶାଳାରେ ମୁଖ୍ୟ ଅତିଥି ଭାବେ ଯୋଗଦେଇଥିବା ଗୃହ ଓ ନଗର ଉନ୍ନୟନ ବିଭାଗ ସଚିବ ସାଗରିକା ପଟ୍ଟନାୟକ କହିଥିଲେ। ବିଭିନ୍ନ ଜଳାଶୟକୁ କିଭଳି ସୌନ୍ଦର୍ଯ୍ୟକରଣ କରାଯିବ ସେ ନେଇ କାର୍ଯ୍ୟକ୍ରମରେ ଯୋଗଦେଇଥିବା ଆର୍ଏମ୍ସି ସହ ୭ ପୌର ଓ ୬ ଏନ୍ଏସିର ପ୍ରଶାସନିକ ଅଧିକାରୀଙ୍କ ସହ ବିଭିନ୍ନ ବିଭାଗୀୟ ଅଧିକାରୀ ଓ ଜନ ପ୍ରତିନିଧିଙ୍କୁ ସଚିବ ଅବଗତ କରିଥିଲେ।
ଅନୁଗୋଳ ପୌରପାଳିକାରେ ଅନୁଷ୍ଠିତ ଏହି କର୍ମଶାଳାକୁ ରାଜ୍ୟ ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ, କେନ୍ଦ୍ର ସରକାରଙ୍କ ନ୍ୟାଶନାଲ ଇନଷ୍ଟିଟ୍ୟୁଟ୍ ଅଫ ଅର୍ବାନ୍ ଆଫେୟାର୍ସ ଆୟୋଜନ କରିଥିଲେ। ଏଥିରେ ଅନୁଗୋଳ ସମେତ ଢେଙ୍କାନାଳ, କେନ୍ଦୁଝର ଓ ବୌଦ୍ଧ ଜିଲାର ପୌରପାଳିକା ଓ ଏସ୍ଏସି ସହିତ ରାଉରକେଲା ମହାନଗର ନିଗମର ଅଧିକାରୀ ଓ ଜନପ୍ରତିନିଧିମାନେ ଯୋଗଦେଇଥିଲେ। ମୁଖ୍ୟତଃ ସହରାଞ୍ଚଳରେ ଥିବା ଜଳାଶୟଗୁଡ଼ିକ ଜରାଜୀର୍ଣ୍ଣ ଅବସ୍ଥାରେ ଥିବାରୁ ଲୋକମାନେ ଏହାକୁ ଆବର୍ଜନାସ୍ଥଳରେ ପରଣତ କରିଦେଲେଣି। ଏହାକୁ କିଭଳି ନୂତନ ଜୀବନ ପ୍ରଦାନ କରାଯିବ ସେ ନେଇ କର୍ମଶାଳା ଆୟୋଜନ କରାଯାଇଛି। ଏହି ପୁନରୁଦ୍ଧାର କାର୍ଯ୍ୟରେ ମହିଳା ସ୍ବୟଂ ସହାୟକ ଗୋଷ୍ଠୀ(ଏସ୍ଏଚ୍ଜି)ଙ୍କୁ ନିୟୋଜିତ କରାଯିବ। ଜଳାଶୟ ନୂତନ ଜୀବନଦାନ ପାଇବାକୁ ଥିବାବେଳେ ସୌନ୍ଦର୍ଯ୍ୟ କରଣ ମଧ୍ୟ କରାଯିବ। କୌଣସି ପାଠ୍ୟକ୍ରମରେ ସ୍ନାତକ ପଢ଼ିଥିବା ଯୁବପିଢ଼ି ଏଥିରେ ସୁପଭାଇଜର ଭାବେ କାମ ତୁଲାଇବେ। ଲୋକମାନେ ଏହି ଆମ ପୋଖରୀକୁ ନିଜ ପୋଖରୀ ଭାବି କାର୍ଯ୍ୟ କରିବା ଆବଶ୍ୟକ। କାର୍ଯ୍ୟକ୍ରମରେ ଯୋଗଦେଇଥିବା ଅନୁଗୋଳ ନଗରପାଳ ଅକ୍ଷୟ କୁମାର ସାମନ୍ତ କହିଲେ, ପୋଖରୀ ଗୁଡ଼ିକ ପୁନରୁଦ୍ଧାର କରାଗଲେ ପ୍ରଦୂଷଣ ମୁକ୍ତ ସହର ହୋଇପାରିବ। ଅନ୍ୟତମ ଅତିଥି ଭାବେ ଉପସ୍ଥିତ ପିଏଚଡି ସୁପରିଣ୍ଟେଣ୍ଡିଂ ଇଞ୍ଜିିନିୟର ବିକାଶ ବେହେରା ପାଣିର ଅପବ୍ୟବହାର ପ୍ରତି ସଜାଗ ହେବା ଦରକାର। ପାଣି ଉପରେ ନିର୍ଭର କରୁଥିବା ଜୀବଜନ୍ତୁ ବିପଦରେ ପଡ଼ିଲେ ଆମ ସମାଜ ପ୍ରତି ମଧ୍ୟ ଏହା ବିପଦ ବୋଲି ସେ କହିଥିଲେ। ଅନୁଗୋଳ ପୌର ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ କର୍ମଶାଳାର ତାତ୍ପର୍ଯ୍ୟ ସମ୍ପର୍କରେ ଅବଗତ କରିଥିଲେ। ଏହି କର୍ମଶାଳାରେ ରାଉରକେଲା ମହାନଗର ନିଗମ(ଆରଏମ୍ସି) ସହ ଅନୁଗୋଳ ପୌରପାଳିକା, ଢେଙ୍କାନାଳ ପୌରପାଳିକା, ତାଳଚେର ପୌରପାଳିକା, କେନ୍ଦୁଝର ପୌରପାଳିକା, ଆନନ୍ଦପୁର ପୌରପାଳିକା, ଯୋଡ଼ା ପୌରପାଳିକା, ବଡ଼ବିଲ ପୌରପାଳିକା, ହିନ୍ଦୋଳ ବିଜ୍ଞାପିତ ଅଞ୍ଚଳ ପରିଷଦ, ଆଠମଲ୍ଲିକ ବିଜ୍ଞାପିତ ଅଞ୍ଚଳ ପରିଷଦ, ବୌଦ୍ଧଗଡ଼ ବିଜ୍ଞାପିତ ଅଞ୍ଚଳ ପରିଷଦ, କାମାକ୍ଷାନଗର ବିଜ୍ଞାପିତ ଅଞ୍ଚଳ ପରିଷଦ, ଭୁବନ ବିଜ୍ଞାପିତ ଅଞ୍ଚଳ ପରିଷଦ, ଚମ୍ପୁଆ ବିଜ୍ଞାପିତ ଅଞ୍ଚଳ ପରିଷଦର ଅଧିକାରୀମାନେ ଯୋଗଦେଇଥିଲେ। ଏଥିସହ ପୌର ନିର୍ବାହୀ ଯନ୍ତ୍ରୀ, ପୌର ନିର୍ବାହୀ କନିଷ୍ଠ ଯନ୍ତ୍ରୀ, ମେୟର, ପୌରାଧ୍ୟକ୍ଷ, ନଗରପାଳ, କାଉନସିଲର ଓ ଅର୍ବାନ ପ୍ଲାନରମାନେ କାର୍ଯ୍ୟକ୍ରମରେ ଉପସ୍ଥିତ ଥିଲେ।