ବାରଙ୍ଗ,୨୮।୩(ଡି.ଏନ୍.ଏ.):ଦୀର୍ଘଦିନର ବ୍ୟବଧାନ ପରେ ନନ୍ଦନକାନନରେ ଆରମ୍ଭ ହୋଇଛି ପଶୁପକ୍ଷୀ ଅଦଳବଦଳ ପ୍ରକ୍ରିୟା। ଏହି ପ୍ରକ୍ରିୟାରେ ନନ୍ଦନକାନନରୁ ସୋମବାର ଅପରାହ୍ନରେ ଦୁଇ ସାଧାରଣ (ନାଲି) ବାଘ ମିଜୋରାମର ଆଇଜଲ ଚିଡିଆଖାନାକୁ ପଠାଯାଇଛି। କେନ୍ଦ୍ରୀୟ ଚିଡ଼ିଆଖାନା କର୍ତ୍ତୃପକ୍ଷଙ୍କ ଅନୁମୋଦନକ୍ରମେ ନନ୍ଦନକାନନ କର୍ତ୍ତୃପକ୍ଷ ଜନ୍ତୁ ଅଦଳବଦଳ ପ୍ରକ୍ରିୟାରେ ଗୋଟିଏ ୫ବର୍ଷର ଅଣ୍ଡିରା ସାଧାରଣ(ନାଲି) ବାଘ ‘କୁନ୍ଦନ’ ଓ ଅନ୍ୟଟି ୫ବର୍ଷର ମାଈ ସାଧାରଣ(ନାଲି) ବାଘୁଣୀ ‘ଆଦାଶ୍ୟା’ଙ୍କୁ ପଠାଇଛନ୍ତି। ଏହି ବାଘ ନେବା ପାଇଁ ଆଇଜଲ ଚିଡିଆଖାନାର ୮ଜଣିଆ ଦଳ ଗତ ଶୁକ୍ରବାର ରାତିରେ ନନ୍ଦନକାନନରେ ପହଞ୍ଚତ୍ଥିଲେ। କେନ୍ଦ୍ରୀୟ ଚିଡ଼ିଆଖାନା କର୍ତ୍ତୃପକ୍ଷଙ୍କ ଚିଠି ନନ୍ଦନକାନନରେ ପହଞ୍ଚିବାରୁ କର୍ତ୍ତୃପକ୍ଷ ସୋମବାର ଦିନ କୁନ୍ଦନ ରହୁଥିବା ୩୦ନମ୍ବର ଏନକ୍ଲୋଜର ଓ ଆଦାଶ୍ୟା ରହୁଥିବା ବାଘ ସଫାରୀ ଫିଡିଙ୍ଗ ଚାମ୍ବରରେ ଦୁଇଟି ଯନ୍ତା ଭିତରେ ଜୀବନ୍ତ କୁକୁଡା ଓ ମଇଁଷି ମାଂସ ରଖି ଦୁଇଟି ବାଘକୁ କାବୁକରିବାରେ ସକ୍ଷମ ହୋଇଥିଲେ। ପରେ କ୍ରେନ ସାହାଯ୍ୟରେ ମିଜୋରାମରୁ ଆସିଥିବା ଦୁଇଟି ଟ୍ରକ ଯୋଗେ ପଠାଇଥିଲେ। ଏହି ଦୁଇ ବାଘ ପ୍ରତିବଦଳରେ ଜନ୍ତୁ ଅଦଳବଦଳ ପ୍ରକ୍ରିୟାରେ ସେଠାରୁ ତିନି ପ୍ରଜାତିର ୫ଜନ୍ତୁ (ହଳେ ହିଲକ ଗିବନ, ହଳେ ଘୁଷୁରି ଲାଞ ମାକେକ ଓ ଗୋଟିଏ ମାଈ ହିମାଳୟ କଳାଭାଲୁ) ନନ୍ଦନକାନନକୁ ଆସିବ। ଏହି ନୂତନ ଅତିଥି ଜୁନ ମାସରେ ଆଣିବା ପାଇଁ ନନ୍ଦନକାନନ କର୍ତ୍ତୃପକ୍ଷ ସ୍ଥିର କରିଛନ୍ତି।
