କୁଆମରା,୧୪।୧୦(ଡି.ଏନ.ଏ.): ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକ ଦେଇ ପ୍ରବାହିତ ଦେଓ ନଦୀ କୂଳରେ ଅବସ୍ଥିତ ଜୟପୁର ପଞ୍ଚାୟତର ସହରସାହି ଓ ମଠସାହି ଗ୍ରାମ ଦୁଇଟି ନଦୀ ଗର୍ଭରେ ଲୀନ ହେବା ଆଶଙ୍କା ପ୍ରକାଶ ପାଇଛି। ପ୍ରତିବର୍ଷ ନଦୀ କୂଳ ଖାଇବା ଯୋଗୁ ଏହି ଦୁଇ ଗାଁ ପ୍ରତି ବିପଦ ଦେଖାଦେଇଛି। ୧୯୯୯ ମହାବାତ୍ୟା ପରଠାରୁ ପ୍ରତିବର୍ଷ ଉକ୍ତ ନଦୀର ଦୁଇ କୂଳ ଖାଇବାରେ ଲାଗିଥିଲେ ମଧ୍ୟ ପ୍ରତିକାର ବ୍ୟବସ୍ଥା କରାଯାଉନାହିଁ। ଏଥିପାଇଁ ସ୍ଥାନୀୟ ଲୋକେ ଆତଙ୍କିତ ଅବସ୍ଥାରେ ଦିନ କାଟୁଛନ୍ତି। ଉକ୍ତ ଦୁଇ ଗ୍ରାମରେ ପାଖାପାଖି ୫ଶହ ଲୋକ ବାସ କରୁଥିବା ବେଳେ ବର୍ଷା ଦିନେ ବାତ୍ୟା ନାଁ ଶୁଣିଲେ ଭୟରେ ଗାଁ ଛାଡ଼ି ଅନ୍ୟତ୍ର ପଳାଇ ଯାଆନ୍ତି। ଏହି ୨ଗ୍ରାମର ଲୋକେ ଆଦିବାସୀ ସମ୍ପ୍ରଦାୟର ହୋଇଥିବା ବେଳେ ସମସ୍ତେ ଦିନ ମଜୁରିଆ। ୯୦ ପ୍ରତିଶତ ଝୁମ୍ପୁଡ଼ି ଘର ଥିବା ବେଳେ ଦୀର୍ଘ ୨୨ ବର୍ଷ ମଧ୍ୟରେ ୬/୭ ଥର ବାତ୍ୟା ଓ ବନ୍ୟା ଯୋଗୁ ଅନେକଙ୍କର ବାସଗୃହ ମାଟିରେ ମିଶିଯାଇଛି। ବିଗତ ୧୦ ବର୍ଷ ମଧ୍ୟରେ କେତେ ଯେ ବାସଗୃହ ନଦୀ ଗର୍ଭକୁ ଗଲାଣି ତାର ହିସାବ ନାହିଁ। ସେହିପରି ନଦୀର ଦୁଇ କୂଳ ଖାଇବା ଯୋଗୁ ଏକର ଏକର ଜମି ନଦୀ ଗର୍ଭରେ ଲୀନ ହୋଇ ଯାଇଛି। ଅନ୍ୟ ପକ୍ଷରେ ଉକ୍ତ ନଦୀର ପଶ୍ଚିମ ପାର୍ଶ୍ୱରେ ଉଦଳା ବ୍ଲକର କଇଁସାରି ଗ୍ରାମ ଅବସ୍ଥିତ। ନଦୀଠାରୁ ଗାଁର ପାଖାପାଖି ଦୂରତ୍ୱ ୫ଶହ ମିଟର ହୋଇଥିବା ବେଳେ ପ୍ରତି ବର୍ଷ ନଦୀ କୂଳ ଖାଇ ଗାଁ ଆଡ଼କୁ ମାଡ଼ି ଆସୁଛି। ଏହି ଗ୍ରାମର ନଦୀ କୂଳରେ ଥିବା ଚାଷ ଜମି ମଧ୍ୟ ନଦୀରେ ମିଶିଲାଣି। ଉକ୍ତ ନଦୀଟି କମ୍ ଓସାରିଆ ହୋଇଥିବାରୁ ଅଧିକ ସ୍ରୋତ ଯୋଗୁ ସାମାନ୍ୟ ବନ୍ୟାରେ ମଧ୍ୟ କୂଳ ଖାଉଛି। ଉକ୍ତ ନଦୀ କିରିକିଚିଆଠାରେ ସୋନ ନଦୀରେ ମିଶିଛି। ବର୍ଷା ଋତୁରେ ସୋନ ନଦୀର ଉପର ମୁଣ୍ଡରେ ପାଣି ଛାଡ଼ିଲେ ଏହି ନଦୀର ପାଣି ଠେଲି ହୋଇ ଗାଁ ଗଣ୍ଡାର କ୍ଷତି ଘଟାଉଛି। ମହାବାତ୍ୟା, ଫାଇଲିନ ଭଳି ପ୍ରାକୃତିକ ବିପର୍ଯ୍ୟୟରେ ଅନେକ ବାସଗୃହ ଓ ଚାଷଜମି ବାଲିଚର ହୋଇଥିଲେ ମଧ୍ୟ ଅଦ୍ୟାବଧି ତାହାର ପୁନରୁଦ୍ଧାର ହୋଇ ପାରିନାହିଁ। ତେବେ ଗ୍ରାମ ଓ ଚାଷ ଜମିର ସୁରକ୍ଷା ପାଇଁ ନଦୀ ଦୁଇ ପାର୍ଶ୍ୱରେ ପଥର ପ୍ୟାକିଂ ପାଇଁ ଗ୍ରାମବାସୀ ଦାବି କରିଛନ୍ତି।