କଥାରେ ଅଛି ରଖେ ହରି ତ ମାରେ କିଏ। ଖେଳୁ ଖେଳୁ ରେଳଧାରଣାକୁ ଚାଲି ଆସିଥିଲା ଜଣେ ୨ ବର୍ଷର ଶିଶୁ। ଏପରିକି ସେ ଟ୍ରେନ୍ ଚକାତଳେ ଫସି ଯାଇଥିଲା। ହେଲେ ଲୋକୋ ପାଇଲଟ୍ଙ୍କ ଉପସ୍ଥିତ ବୁଦ୍ଧି ଯୋଗୁ ପିଲାଟିକୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ଘଟଣାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଭିଡିଓଟି ଟ୍ରେନ୍ ରହିବା ପରର। ଏଥିରେ ଶିଶୁଟିକୁ ଟ୍ରେନ୍ ଚକାତଳେ ଥିବା ଦେଖାଯାଉଛି।
ଘଟଣାଟି ଫରିଦାବାଦ ନିକଟ ବଲ୍ଲଭଗଡ଼ ରେଳଷ୍ଟେଶନର। ଏହା ବ୍ୟସ୍ତ ବହୁଳ ଷ୍ଟେଶନ ମଧ୍ୟରୁ ଅନ୍ୟତମ ବୋଲି କୁହାଯାଉଥିଲେ ହେଁ କରୋନା ଯୋଗୁ ଏବେ ଏହା ପ୍ରାୟତଃ ଖାଲି ରହୁଛି। ଅପରପକ୍ଷେ ଶିଶୁପୁତ୍ରଟି ନିଜର ୧୪ ବର୍ଷର ଭାଇ ସହ ରେଳଧାରଣା ପାଖରେ ଖେଳୁଥିଲା। ହେଲେ ସାନଭାଇକୁ ଛାଡ଼ି ବଡ଼ଭାଇ କିଛି ସମୟ ପାଇଁ ପଳାଇଥିଲେ। ଏହି ସମୟରେ ଦିଲ୍ଲୀରୁ ଆଗ୍ରା ଯାଉଥିବା ଏକ ମାଲବାହୀ ଟ୍ରେନ୍ ଆଗକୁ ଶିଶୁଟି ଚାଲିଆସିଥିଲେ। ଏହା ଦେଖି ଲୋକୋ ପାଇଲଟ ଡରି ଯାଇଥିଲେ। ସେ ତତ୍କ୍ଷଣାତ ଜରୁରୀକାଳିନ ବ୍ରେକ୍ ଲଗାଇଥିଲେ। ହେଲେ ଟ୍ରେନ୍ଟି ନିଜର ଗତିରେ ଥିବାରୁ ଇଞ୍ଜିନଟି ଶିଶୁ ଉପର ଦେଇ ଚାଲି ଯାଇଥିଲା।
ଟ୍ରେନ୍ର ଉଭୟ ପାଇଲଟ୍ ବାହାରକୁ ଆସି ଶିଶୁଟିକୁ ନିରାପଦ ଅବସ୍ଥାରେ ଦେଖିଥିଲେ। ହେଲେ ସେ କାନ୍ଦିବାରେ ଲାଗିଥିଲା। ପରେ ତାଙ୍କୁ ସାବଧାନତାର ସହ ବାହାରକୁ ବାହାର କରାଯାଇ ମା’ଙ୍କୁ ଦିଆଯାଇଥିଲା। ଏଥିସହ ରେଳ ବିଭାଗର ଅଧିକାରୀଙ୍କୁ ସୂଚନା ଦିଆଯାଇଥିଲା। ଶିଶୁଟି ସୁରକ୍ଷିତ ଥିବାରୁ ଲୋକୋ ପାଇଲଟମାନଙ୍କୁ ପୁରସ୍କୃତ କରାଯିବ ବୋଲି ଜଣାପଡ଼ିଛି।
ଦେଖନ୍ତୁ ଭିଡିଓ