ପୁରୀ ଅଫିସ,୨୫।୭: ହିମାଳୟ ପାଦଦେଶର ଘଞ୍ଚ ଜଙ୍ଗଲରେ ବିଲୁପ୍ତ ପ୍ରାୟ ଔଷଧୀୟ ବୃକ୍ଷରାଜିର ଅନୁସନ୍ଧାନ କରୁଛନ୍ତି ଦୁଇଜଣ ଓଡ଼ିଆ ଯୁବ ଗବେଷକ। ସେମାନେ ହେଲେ ପୁରୀର ବିଭୂତି ଭୂଷଣ ଚମ୍ପତି ଓ ଯାଜପୁରର ପ୍ରଭାତ କୁମାର ଦାସ। ଭାରତ ସରକାରଙ୍କ ଜୈବ ପ୍ରଯୁକ୍ତି ବିଜ୍ଞାନ ବିଭାଗର ଏକ ପ୍ରକଳ୍ପ ଅଧୀନରେ ଏହି ଗବେଷଣା କରାଯାଉଛି। ଏହି ପ୍ରକଳ୍ପ ଅନ୍ତର୍ଗତ ପ୍ରଥମ ସୋପାନରେ ହିମାଳୟର ପାର୍ବତ୍ୟାଞ୍ଚଳରୁ ଗବେଷକମାନେ ବୃକ୍ଷ ନମୁନା ସଂଗ୍ରହ କରିଛନ୍ତି। ଭୁବନେଶ୍ୱରସ୍ଥିତ ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟର ଏହି ଦୁଇ ଯୁବ ଗବେଷକଙ୍କୁ ପ୍ରକଳ୍ପର ଏକ ସହଯୋଗୀ କେନ୍ଦ୍ରୀୟ ଅନୁଷ୍ଠାନ ହିମାଳୟ ବନ ଅନୁସନ୍ଧାନ ପ୍ରତିଷ୍ଠାନ ସହାୟତା ଯୋଗାଇ ଦେଉଛି। ପ୍ରାଧ୍ୟାପକ ଡ. ପ୍ରତାପ ଚନ୍ଦ୍ର ପଣ୍ଡାଙ୍କ ତତ୍ତ୍ୱାବଧାନରେ ପ୍ରକଳ୍ପଟି ଚାଲିଛି। ସମ୍ପୃକ୍ତ ଔଷଧୀୟ ବୃକ୍ଷର ସନ୍ଧାନ ପରେ ଏହାର ସଂରକ୍ଷଣ ଉପରେ କାର୍ଯ୍ୟ କରାଯିବ। ବିଭିନ୍ନ ଋତୁରେ ଏହି ବୃକ୍ଷର ସ୍ଥିତି ଓ ପରିବର୍ତ୍ତନ ସମ୍ପର୍କରେ ପ୍ରଥମେ ଜାଣିବାକୁ ଚେଷ୍ଟା କରାଯାଉଛି। ଋତୁ ଅନୁଯାୟୀ ଏହି ବୃକ୍ଷର ସହନଶୀଳତା ମାତ୍ରା କମ୍, ବେଶୀ ହୋଇଥାଏ। ଏଣୁ ଏ ସମ୍ପର୍କରେ ସବିଶେଷ ତଥ୍ୟ ସଂଗ୍ରହ କରାଯିବ। ଏହି ବୃକ୍ଷ ହିମାଳୟର ପ୍ରାକୃତିକ ପରିବେଶରେ ବଢ଼ିଥାଆନ୍ତି। ଏହାର କଳ୍ପନାତୀତ ଔଷଧୀୟ ଗୁଣ ରହିଛି। ଏବେ ଏସବୁ ଦୁର୍ଲଭ ହେଲାଣି। ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଁ ବ୍ୟବହୃତ ଔଷଧରେ ଏହାର ମିଶ୍ରଣ କରାଯାଏ। ମଧୁମେହ ଏବଂ କର୍କଟ ରୋଗର ପ୍ରତିରୋଧକ ଓ ପ୍ରତିଷେଧକ ପ୍ରସ୍ତୁତିରେ ଏହି ବୃକ୍ଷର ଅଂଶବିଶେଷ ବ୍ୟବହାର ହୋଇଥାଏ। ଏହି ବୃକ୍ଷ ବିଶ୍ୱସ୍ତରରେ ମାନ୍ୟତାପ୍ରାପ୍ତ ହୋଇଥିଲେ ମଧ୍ୟ ଏହାର ନାମକୁ ସାର୍ବଜନୀନ କରାଯାଇପାରିବ ନାହିଁ। ଜୈବ ପ୍ରଯୁକ୍ତି ବିଜ୍ଞାନର ବିନା ଅନୁମତିରେ ଗବେଷଣା ସମୟରେ ବୃକ୍ଷ ସମ୍ପର୍କରେ କୁହାଯାଇପାରିବ ନାହିଁ ବୋଲି ବିଭୂତି କହିଛନ୍ତି।