ତରଭା, ୨୪ା୪(ଡି.ଏନ.ଏ.): ନାବାଳିକାଙ୍କୁ ବିବାହ କରିଥିବା ଅଭିଯୋଗରେ ସୁବର୍ଣ୍ଣପୁର ଜିଲା ତରଭା ଥାନା ପୋଲିସ ୨ ଯୁବକଙ୍କୁ ଗିରଫ କରିଛି। ସେମାନେ ହେଲେ ନାରାୟଣ ବାଗ ଓ ପୂର୍ଣ୍ଣଚନ୍ଦ୍ର ବିଶି। ସୋନପୁର ପୋକ୍ସୋ କୋର୍ଟରେ ଜାମିନ ନାମଞ୍ଜୁର ପରେ ଉଭୟଙ୍କୁ ଜେଲ ହାଜତକୁ ପଠାଇ ଦିଆଯାଇଛି।
୨୦୨୧ ଫେବୃୟାରୀ ମାସରେ ବେଳମୁଣ୍ଡା ଗ୍ରାମର ଜଣେ ୧୭ବର୍ଷୀୟା ନାବାଳିକାଙ୍କ ବିବାହ କୁଲଥିଆପଦରର ନାରାୟଣ ବାଗଙ୍କ ସହ ହେଉଥିବା ଜଣାପଡିଥିଲା। ସିଡିପିଓ ସବିତା ଦୋରା, ସେକ୍ଟର ସୁପରଭାଇଜର ତିଳୋତ୍ତମା ବରିହା, ରୀନା ପଣ୍ଡା, ଶ୍ରଦ୍ଧାଞ୍ଜଳି ଭୋଇ, ଗ୍ରାମ୍ୟ ବାଲ୍ୟବିବାହ ନିଷେଧ କମିଟି, ତତ୍କାଳୀନ ତରଭା ଥାନା ସବଇନ୍ସପେକ୍ଟର ପ୍ରିୟଙ୍କା ବେହେରା ବେଲମୁଣ୍ଡାରେ ପହଞ୍ଚତ୍ ନାବାଳିକାଙ୍କ ମା’ବାପା ଓ ପରିବାର ସଦସ୍ୟଙ୍କୁ ବୁଝାଶୁଝା କରି ବିବାହ ବନ୍ଦ କରାଇଥିଲେ। ନାବାଳିକାଙ୍କୁ ସୋନପୁର ସିଡବ୍ଲ୍ୟୁସିଙ୍କୁ ହସ୍ତାନ୍ତର କରାଯାଇଥିଲା। କିଛିଦିନ ଅନ୍ତରେ ନାବାଳିକା ସିଡବ୍ଲ୍ୟୁସିରୁ ଫେରିବା ପରେ ପରିବାର ଲୋକେ ତାର ବିବାହ କରିଦେଇଥିଲେ। ଦ୍ୱିିତୀୟ ଘଟଣା ଘଟିଥିଲା ତରଭା ଥାନା ଅନ୍ତର୍ଗତ ବରକାନି ଗ୍ରାମରେ।ବରକାନିର ଜଣେ ୧୭ ବର୍ଷୀୟା ନାବାଳିକାକ ବିବାହ ଖୁଣ୍ଟବନ୍ଧ ନିବାସୀ ପୂର୍ଣ୍ଣଚନ୍ଦ୍ର ବିଶିଙ୍କ ସହିତ ହେଉଥିବା ଜଣାପଡିବା ପରେ ଆଇସିଡିଏସ ତରଫରୁ ବୁଝାସୁଝା କରି ବିବାହ ବନ୍ଦ କରାଯାଇଥିଲା। ହେଲେ ପରେ ଲୁଚାଛପାରେ ତାଙ୍କର ବିବାହ ସମ୍ପନ୍ନ କରାଯାଇଥିଲା। ଏହି ଦୁଇ ନାବାଳିକା ଗର୍ଭବତୀ ହୋଇ ଅଙ୍ଗନବାଡି କେନ୍ଦ୍ରରେ ପଞ୍ଜୀକୃତ କରାଇଲେ ପରେ ଘଟଣା ପ୍ରଘଟ ହୋଇଥିଲା। ଅଙ୍ଗନବାଡି କର୍ମୀ ନାବାଳିକା ଗର୍ଭବତୀ ହେବା ସମ୍ବନ୍ଧେ ସିଡିପିଓ ଦୋରାଙ୍କୁ ରିପୋର୍ଟ କରିଥିଲେ। ତତ୍କାଳୀନ ଜିଲାପାଳ ଅବୋଲି ସୁନିଲ ନରୱଣେଙ୍କ ନିର୍ଦ୍ଦେଶରେ ସିଡିପିଓ ତରଭା ଥାନାରେ ଏ ନେଇ ଏତଲା ଦେଇଥିଲେ। ଥାନାରେ ଦଫା ୩୭୬(୨)(୩) ସେକ୍ସନ ପୋକ୍ସୋ ଆକ୍ଟରେ ଦୁଇଟି ମାମଲା (୧୫୫ ଓ ୧୫୭/ତା୨୬/୬/୨୨ରିଖରେ ରୁଜୁ ହୋଇଥିଲା। ଆଇସିଡିଏସ୍ ତରଫରୁ ଘଟଣାର ତନାଘନା ହେଉଥିବା ଜାଣି ନାରାୟଣ ବାଗ ଓ ପୂର୍ଣ୍ଣଚନ୍ଦ୍ର ବିଶି ତାମିଲନାଡୁ ପଳାଇଥିଲେ। ଏମାନେ ତାମିଲନାଡୁରୁ ଫେରିଥିବା ଜଣାପଡିବା ପରେ ଶନିବାର ସକାଳେ ପୋଲିସ ଉଭୟ ଗ୍ରାମରେ ଚଢ଼ାଉ କରି ସେମାନଙ୍କୁ ଧରିଥିଲା।