କୋକସରା,୬।୩(ଡି.ଏନ.ଏ.): କଳାହାଣ୍ଡି ଜିଲା କୋକସରା ବ୍ଲକ ମହାଜନଗୁଡା ସିଉନି ଗାଁ ୨୬ ନଂ. ଜାତୀୟ ରାଜପଥ ରାସ୍ତା ମଝିରେ ରବିବାର କାକୁଡି ବୋଝେଇ ପିକଅପ୍ ଧକ୍କାରେ ଜଣେ ଯୁବକଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଗୁରୁତର ଅବସ୍ଥାରେ ଭବାନୀପାଟଣା ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ଅନ୍ୟ ଯୁବକଙ୍କ ମୃତ୍ୟୁ ଘଟିଛି। ମୃତ ୨ଯୁବକ ହେଲେ ମୋଟେର ପଞ୍ଚାୟତ କୁସୁମଖୁଣ୍ଟି ବାଟିଗୁଡାର ଦୁର୍ଯ୍ୟୋଧନ ଧଙ୍ଗଡା ମାଝି (୨୧) ଓ ଚିଣ୍ଟୁ ବାଗ (୨୩)। ଭବାନୀପାଟଣା ଓ କୋକସରା ଡାକ୍ତରଖାନାରେ ମୃତଦେହ ବ୍ୟବଚ୍ଛେଦ ପରେ ପରିବାରବର୍ଗ ହସ୍ତାନ୍ତାର କରାଯାଇଛି। ଅନ୍ୟପକ୍ଷେରେ ସୋମବାର ପରିବାରବର୍ଗ ଏବଂ ସମ୍ପର୍କୀୟମାନେ ୪ ଲକ୍ଷ କ୍ଷତିପୂରଣ ଦାବିରେ ଦୁଇ ମୃତଦେହ ମୋଟେର ଛକରେ ରଖି ରାସ୍ତା ଅବରୋଧ କରିଥିଲେ। ଅପରାହ୍ନ ୩ଟାରୁ ରାସ୍ତା ଅବରୋଧ ଯୋଗୁ ଭବାନୀପାଟଣା ଜୟପୁର ମୁଖୀଗୁଡା ମଧ୍ୟରେ ଗାଡି ଚଳାଚଳ ବ୍ୟାହତ ହୋଇଥିଲା।
ଖବରପାଇ ଘଟଣାସ୍ଥଳରେ ଧର୍ମଗଡ ଉପଖଣ୍ଡ ପୋଲିସ ଅଧିକାରୀ ଧିରଜ କୁମାର ଚୋପଦାର, ଆମପାଣି ଥାନାଧିକାରୀ ଚତୁର୍ଭୁଜ ନାଏକ, କୋକସରା ଥାନାଧିକାରୀ ପ୍ରସନ୍ନ କୁମାର ବେହେରା ଓ ପୋଲିସ କର୍ମଚାରୀ ପହଞ୍ଚି ସ୍ଥିତି ଉପରେ ନଜର ରଖିବା ସହ ବୁଝାଶୁଝା ଜାରି ରଖିଥିଲେ। ଘଟଣା ସମ୍ପର୍କରେ ଖବର ପାଇ କୋକସରା ବ୍ଲକ ଉପାଧ୍ୟକ୍ଷ ରାଜୀବ ଅଗ୍ରୱାଲ ପହଞ୍ଚତ୍ ଦୁଇ ମୃତକ ପରିବାର ସହ ଆଲୋଚନା କରିଥିଲେ। ଉଭୟ ପରିବାରକୁ ଗାଡି ମାଲିକ ପକ୍ଷରୁ କ୍ଷତିପୂରଣ ବାବଦରେ ୬୦ ହାଜର, ରେଡ଼କ୍ରସରୁ ୨୦ ହଜାର ଓ ବ୍ଲକ ଉପାଧ୍ୟକ୍ଷ ୨୦ ହଜାର ମୋଟ ୧ ଲକ୍ଷ ଲେଖାଏ ୨ ମୃତକ ପରିବାରକୁ କ୍ଷତିପୂରଣ ଦେବା ପାଇଁ ପ୍ରତିଶ୍ରୁତି ଦେବା ସହ ଦୁର୍ଘଟଣା ଜନିତ ମୃତ୍ୟୁରେ ବୀମା ରାଶି ପାଇଁ ବ୍ୟବସ୍ଥା କରାଯିବା ନେଇ କହିବା ପରେ ରାସ୍ତା ଅବରୋଧ ଅପରାହ୍ନ ୫ଟାରେ ହଟିଥିଲା। ୨ ଘଣ୍ଟା ଜାତୀୟ ରାଜପଥ ଅବରୋଧ ଯୋଗୁ ରାସ୍ତାର ଦୁଇ କଡ଼ରେ ଅନେକ ଗାଡିମୋଟର ଅଟକି ରହିଥିଲା। ଦୁର୍ଘଟଣା ଘଟାଇଥିବା ଗାଡି ଓ ଡ୍ରାଇଭରଙ୍କୁ କୋକସରାରେ ପୋଲିସ ଅଟକ ରଖିଛି।
