ଭୁବନେଶ୍ୱର,୨୧ା୧୦(ବ୍ୟୁରୋ): ରାଜ୍ୟରେ ଦକ୍ଷିଣ ପଶ୍ଚିମ ମୌସୁମୀ ସକ୍ରିୟ ରହିଛି। ନଭେମ୍ବର ପହିଲା ପୂର୍ବରୁ ଏହା ପ୍ରତ୍ୟାବର୍ତ୍ତନ କରିବା ସମ୍ଭାବନା କ୍ଷୀଣ। ଅକ୍ଟୋବରରେ ଲଗାତର ଲଘୁଚାପ ଯୋଗୁ ମୌସୁମୀ ଅଧିକ ବଳବାନ ହୋଇଛି। ବିଭିନ୍ନ ପ୍ରାନ୍ତରେ ତୁହାକୁ ତୁହା ବର୍ଷା ଲାଗିରହିଛି। ଚଳିତବର୍ଷ ମୌସୁମୀ ପ୍ରତ୍ୟାବର୍ତ୍ତନ ସମସ୍ତ ରେକର୍ଡକୁ ଭାଙ୍ଗିବାକୁ ଯାଉଛି। ଗତ ୩ ମାସରେ ୧୦ ଲଘୁଚାପ ସୃଷ୍ଟି ହୋଇଛି। ଅକ୍ଟୋବର ୨୬ରେ ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ଆଉ ଏକ ଲଘୁଚାପ ସୃଷ୍ଟି ହେବ ବୋଲି ପାଣିପାଗ ବିଭାଗ ଅନୁମାନ କରିଛି। ଏଥିଯୋଗୁ ଅକ୍ଟୋବର ୨୯ ଯାଏ ଉପକୂଳ ସମେତ ଦକ୍ଷିଣ ଓଡ଼ିଶାର ଅନେକ ଜିଲାରେ ବର୍ଷା ହୋଇପାରେ। ବାୟୁମଣ୍ଡଳର ଆର୍ଦ୍ରତା ୪୦ ପ୍ରତିଶତକୁ ଖସି ଆସିଲେ ମୌସୁମୀ ପ୍ରତ୍ୟାହାର ଘୋଷଣା କରାଯାଇଥାଏ। ରାଜ୍ୟରେ ଶୀତର ଆଗମନ ହୋଇଥାଏ। ତେବେ ଏବେ ସୁଦ୍ଧା ବାୟୁମଣ୍ଡଳର ଆର୍ଦ୍ରତା ୮୦ରୁ ୯୦ ପ୍ରତିଶତ ମଧ୍ୟରେ ରହୁଛି, ଯାହାକି ବର୍ଷା ପାଇଁ ପାଗ ଅନୁକୂଳ ରଖୁଛି।
ସାଧାରଣତଃ ଅକ୍ଟୋବର ଦ୍ୱିତୀୟ ସପ୍ତାହ ଅର୍ଥାତ୍ ୧୫ରୁ ୧୭ ତାରିଖ ମଧ୍ୟରେ ରାଜ୍ୟରୁ ମୌସୁମୀ ପ୍ରତ୍ୟାବର୍ତ୍ତନ ନେଇ ପାଣିପାଗ ବିଭାଗ ପକ୍ଷରୁ ଘୋଷଣା କରାଯାଇଥାଏ। ଏହି ସମୟରେ ବାତ୍ୟାର ଆଶଙ୍କା ରହିଥାଏ। ଅକ୍ଟୋବରରୁ ନଭେମ୍ବର ୭ ପର୍ଯ୍ୟନ୍ତ ଓଡ଼ିଶାକୁ ବାତ୍ୟା ଭୟ ରହିଥାଏ। ମୌସୁମୀ ଫେରିବା ବିଳମ୍ବ ହେଉଥିବାରୁ ନଭେମ୍ବରରେ ମଧ୍ୟ ବାତ୍ୟା ଆଶଙ୍କା ସହ ଶୀତ ଉପରେ ପ୍ରଭାବ ପଡ଼ିପାରେ। ପାଣିପାଗ ବିଶେଷଜ୍ଞଙ୍କ କହିବା ହେଲା, ଦକ୍ଷିଣ ଚାଇନା ସାଗରରେ ସୃଷ୍ଟି ହୋଇଥିବା ବାତ୍ୟା ଡିପ୍ରେଶନରେ ପରିଣତ ହୋଇ ଦକ୍ଷିଣ ପଶ୍ଚିମ ଦିଗକୁ ଗତି କରୁଛି। ଏଥିଯୋଗୁ କେନ୍ଦ୍ରୀୟ ବଙ୍ଗୋପସାଗରରେ ବାରମ୍ବାର ଲଘୁଚାପ ସୃଷ୍ଟି ହେବା ସହ ରାଜ୍ୟର ଜଳବାୟୁକୁ ପ୍ରଭାବିତ କରୁଛି। ନଭେମ୍ବରରୁ ରାଜ୍ୟରେ ଶୀତ ଋତୁ ଅନୁଭୂତ ହୋଇଥାଏ। କିନ୍ତୁ ଏହି ବର୍ଷ ଡିସେମ୍ବରରେ ମଧ୍ୟ ସେତେଟା ଶୀତ ଅନୁଭୂତ ହେବ ନାହିଁ ବୋଲି ଅନୁମାନ କରାଯାଇଛି।
ଅନ୍ୟପକ୍ଷରେ ରାଜ୍ୟ ଅର୍ଥନୀତି ମଧ୍ୟ ପ୍ରଭାବିତ ହେବା ଆଶଙ୍କା ସୃଷ୍ଟି ହୋଇଛି। କୃଷି ରାଜ୍ୟ ଅର୍ଥ ବ୍ୟବସ୍ଥାର ପ୍ରମୁଖ ଅଂଶ। ଜୁଲାଇରେ ନିଅଣ୍ଟିଆ ବର୍ଷା ଯୋଗୁ ଧାନ ରୁଆ ବେଉଷଣ ବିଳମ୍ବ ହୋଇଥିଲା। ଅଗଷ୍ଟରେ ପ୍ରବଳ ବର୍ଷା ଉପକୂଳବର୍ତ୍ତୀ ଜିଲାଗୁଡିକର ଧାନ ଫସଲକୁ ଧୋଇନେଲା। ଲଗାତର ଲଘୁଚାପ ଚାଷୀଙ୍କ ପାଇଁ ବିପଦ ସୃଷ୍ଟି କରିଚାଲିଛି। ଅଗଷ୍ଟରୁ ଅକ୍ଟୋବର ମଧ୍ୟରେ ରାଜ୍ୟରେ ୧୦ଟି ଲଘୁଚାପ ସୃଷ୍ଟି ହୋଇଛି। ଅଗଷ୍ଟରେ ୫ଟି, ସେପ୍ଟେମ୍ବରରେ ଗୋଟିଏ ଏବଂ ଅକ୍ଟୋବରରେ ଏ ପର୍ଯ୍ୟନ୍ତ ୪ଟି ଲଘୁଚାପ ସୃଷ୍ଟି ହୋଇ ସାରିଲାଣି। ଅଗଷ୍ଟରେ ପ୍ରବଳ ବର୍ଷା ଯୋଗୁ ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତ୍ସିଂହପୁର, ପୁରୀ, ଖୋର୍ଦ୍ଧା, କଟକ ଜିଲାରେ ବନ୍ୟା ଧାନ ଫସଲକୁ କ୍ଷତିଗ୍ରସ୍ତ କରିଛି। ଲଗାତର ଲଘୁଚାପ ଯୋଗୁ କେବଳ ଧାନ ନୁହେଁ, ତୈଳବୀଜ ଓ ପନିପରିବା ଫସଲ
ମଧ୍ୟ କ୍ଷତିଗ୍ରସ୍ତ ହୋଇଛି। ଏହି କାରଣରୁ କାର୍ତ୍ତିକ ମାସ ନ ହେଉଣୁ ପନିପରିବା ଦର ଆକାଶ ଛୁଆଁ ରହିଛି। ଚଳିତବର୍ଷ କରୋନା ଯୋଗୁ ଶିଳ୍ପ ଓ ଅନ୍ୟାନ୍ୟ ବ୍ୟବସାୟ ମାନ୍ଦା ରହିଛି। ଚାଷ କାର୍ଯ୍ୟକୁ ସରକାର ଲକ୍ଡାଉନ କଟକଣାରୁ କୋହଳ କରିଥିବାରୁ ଲୋକମାନେ କୃଷି କ୍ଷେତ୍ରରେ ଭଲ ଦି’ ପଇସା ଲାଭ ପାଇବା ଆଶାରେ ଅଧିକ ନିବେଶ କରିଛନ୍ତିି। ତେବେ ଲଗାତର ଲଘୁଚାପ ବର୍ଷା ସେହି ଆଶାକୁ ମଧ୍ୟ ଧୂଳିସାତ କରିଦେଉଛି। ବର୍ଷା ଉପକୂଳ ଜିଲାଗୁଡିକରେ ଧାନ ଫସଲକୁ ଉଜାଡି ଦେଇଛି। କେତେକ ଜିଲାରେ ଧାନ ଫସଲ ଥୋଡ଼ ହୋଇଛି। ଏହି ସମୟରେ ଅଧିକ ବର୍ଷା କିମ୍ବା ପବନ ହେଲେ ତାହା ଅଗାଡିରେ ପରିଣତ ହେବା ସହ ସମ୍ପୂର୍ଣ୍ଣ ବରବାଦ ହୋଇଯିବ। ଆଉ ଏକ ଲଘୁଚାପ ଆଶଙ୍କା ଥିବାରୁ ଚାଷୀକୁଳ ଭୟଭୀତ ହୋଇଯାଇଛନ୍ତି।