ଯାଜପୁର ଅଫିସ,୨୧ା୨:ଯାଜପୁର ଟାଉନ୍ସ୍ଥିତ ନରସିଂହ ଚୌଧୁରୀ(ଏନ୍ସି) ସ୍ବୟଂଶାସିତ କଲେଜର ନବୀକରଣ ପାଇଁ ଉଚ୍ଚଶିକ୍ଷା ବିଭାଗ ପକ୍ଷରୁ ସୋମବାର ୨୦କୋଟି ୮୮ ଲକ୍ଷ ୪୨ ହଜାର ଟଙ୍କା ମଞ୍ଜୁର ହୋଇଛି। ଏଥିରେ କଲେଜର ସ୍ପୋର୍ଟସ କମ୍ପ୍ଲେକ୍ସ ଏବଂ ପ୍ରଶାସନିକ, ବିଜ୍ଞାନ ଓ ବାଣିଜ୍ୟ ଗୃହର ନବୀକରଣ ସମେତ ଆଲୁମ୍ନି ଗୃହ ଉପରେ ଦ୍ୱିତୀୟ ମହଲା ନିର୍ମାଣ ହେବ। ହେଲେ ନିକଟରେ କେନ୍ଦୁଝର କଲେଜକୁ ବିଶ୍ୱବିଦ୍ୟାଳୟ ମାନ୍ୟତା ମିଳିଥିଲେ ହେଁ ଦୀର୍ଘଦିନର ପ୍ରତିଶ୍ରୁତି ଏନ୍ସି କଲେଜ ଏଥିରୁ ବାଦ୍ ପଡିଥିବାରୁ ଜିଲାବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ଉଚ୍ଚଶିକ୍ଷା ବିଭାଗର ନିର୍ଦ୍ଦେଶନାମା (୭୩୦୬/୨୦ା୨ା୨୦୨୩) ଅନୁସାରେ ଏନ୍ସି କଲେଜର ସ୍ପୋର୍ଟସ୍ କମ୍ପ୍ଲେକ୍ସ ପାଇଁ ୮ କୋଟି ୨୬ ଲକ୍ଷ ୩୯ ହଜାର ଟଙ୍କାର ଅନୁମୋଦନ ହୋଇଛି। ଏହି ପ୍ରକଳ୍ପରେ ସ୍ପୋର୍ଟସ କୋର୍ଟ ୱାର୍କ ପାଇଁ ୫ କୋଟି ୭୨ ଲକ୍ଷ ୧୭ ହଜାର ୬୫୪ ଟଙ୍କା, ଉଦ୍ୟାନ ଆଦି ପାଇଁ ୮୧ ଲକ୍ଷ ୪୩ ହଜାର ୨୧୫ ଟଙ୍କା, ଡ୍ରେନେଜ ପାଇଁ ୩୦ ଲକ୍ଷ ୬୬ ହଜାର ୮୮୬ ଟଙ୍କା ଅଟକଳ କରାଯାଇଛି। ସେହିପରି ପୁରୁଣା ବିଜ୍ଞାନ ଓ ବାଣିଜ୍ୟ ବ୍ଲକର ନବୀକରଣ ପାଇଁ ୭୩ ଲକ୍ଷ ୪୪ ହଜାର ୫୮୭ ଟଙ୍କା, ପୁରୁଣା ପ୍ରଶାସନିକ ଗୃହର ପିଭିସି ୱିଣ୍ଡୋ, ଫ୍ଲସ୍ ଡୋର୍, ସିକ୍ୟୁରିଟି ଗ୍ରିଲ୍, କାନ୍ଥରେ ନୂତନ ପ୍ଲାଷ୍ଟର, ପେଣ୍ଟ, ସିଲିଂ, ଫ୍ଲୋର ଆଦି ନିର୍ମାଣ ପାଇଁ ୫ କୋଟି ୩୧ ଲକ୍ଷ ୩୮ ହଜାର ୧୬୨ ଟଙ୍କା, ଆଲୁମିନି ଗୃହରେ ଦ୍ୱିତୀୟ ମହଲା ଏବଂ କାଫେଟେରିଆ ନିର୍ମାଣ ପାଇଁ ୧ କୋଟି ୭୨ ଲକ୍ଷ ୪ ହଜାର ୬୮୧ ଟଙ୍କା, ଇଲେକ୍ଟ୍ରିକାଲ ୱାର୍କ ପାଇଁ ୧ କୋଟି ୮୫ ଲକ୍ଷ ୧୨ ହଜାର ୭୯୬ ଟଙ୍କା, ପିଏଚ୍ ପର୍ସନ ପାଇଁ ୯୨ ଲକ୍ଷ ଟଙ୍କା ବ୍ୟୟ ଅଟକଳ ହୋଇଛି। ପୂର୍ବରୁ ଜାତୀୟ ଅନ୍ତର୍ଜାତୀୟସ୍ତରର ପରିବେଶ ସୃଷ୍ଟି କଲା ଭଳି ପ୍ଲାନ ପ୍ରସ୍ତୁତ କରାଯିବ ବୋଲି ଯେଉଁ ପ୍ରତିଶ୍ରୁତି ଦିଆଯାଇଥିଲା, ତାହା ଏବେ ସାକାର ହେବାକୁ ଯାଉଛି। ତେବେ ଉକ୍ତ ଅନୁଦାନକୁ ନେଇ ଠିକାଦାରି ରାଜନୀତି ନ କରି ଠିକ ଭାବେ ବିନିଯୋଗ ହୋଇପାରିଲେ ସରକାରଙ୍କ ମହତ୍ ଉଦ୍ଦେଶ୍ୟ ପ୍ରତିପାଦିତ ହୋଇପାରିବ ବୋଲି ମତପ୍ରକାଶ ପାଇଛି ା
ଗତ ସାଧାରଣ ନିର୍ବାଚନ ପୂର୍ବରୁ ଏନ୍ସି ସ୍ବୟଂଶାସିତ ସରକାରୀ ଡିଗ୍ରୀ କଲେଜକୁ ବିଶ୍ୱବିଦ୍ୟାଳୟ ମାନ୍ୟତା ଦିଆଯିବାକୁ ନେତୃବର୍ଗ ଘୋଷଣା କରିଥିଲେ। କିନ୍ତୁ ବିଡ଼ମ୍ବନା ଯେ, ଏହି ପ୍ରତିଶ୍ରୁତି କାର୍ଯ୍ୟକାରୀ ହୋଇ ନ ଥିବାବେଳେ ଏହି କଲେଜରେ ବର୍ଷ ସାରା ଅଧ୍ୟାପକ ପଦବୀ ଖାଲି ପଡ଼ୁଛି। ଆବଶ୍ୟକତାଠାରୁ ୫୦ ପ୍ରତିଶତ ଅଧ୍ୟାପକ ପଦବୀ ଖାଲି ପଡ଼ିଥିବା ସୂଚନା ମିଳିଛି। ତେବେ କଲେଜର ନବୀକରଣ ହେବା ପରେ ସମସ୍ତ ସମସ୍ୟାର ସମାଧାନ ହୋଇପାରିବ ବୋଲି ଅଞ୍ଚଳବାସୀ ଆଶା ବ୍ୟକ୍ତ କରିଛନ୍ତି।