ନୂଆଦିଲ୍ଲୀ,୬ା୧: ମାଇକ୍ରୋବ୍ଲଗିଂ ସାଇଟ୍ ଟୁଇଟରରେ ଆକାଉଣ୍ଟ ଖୋଲିଥିବା ୨୦କୋଟି ୟୁଜର୍ସଙ୍କ ଡେଟା ଲିକ୍ ହୋଇଯାଇଛି। ହ୍ୟାକରମାନେ ଟୁଇଟର ବ୍ୟବହାରକାରୀଙ୍କ ଆକାଉଣ୍ଟରୁ ସେମାନଙ୍କ ନାମ, ଇ-ମେଲ୍ ଆଡ୍ରେସ୍, ଆକାଉଣ୍ଟ ତିଆରି ତାରିଖ ଓ ଫଲୋଅର୍ସଙ୍କ ସମ୍ପର୍କରେ ତଥ୍ୟ ହାସଲ କରିବାରେ ସକ୍ଷମ ହୋଇଛନ୍ତି। ଏହି ବିଷୟ ପ୍ରଘଟ ହେବା ପରେ ୟୁଜର୍ସଙ୍କ ପ୍ରାଇଭେସିକୁ ନେଇ ପ୍ରଶ୍ନ ଉଠିଛି। ସାଇବର ଇଣ୍ଟେଲିଜେନ୍ସ କମ୍ପାନୀ କ୍ଲାଉଡ୍ସେକ୍ ଅନୁସାରେ ଟୁଇଟରରୁ ଲିକ୍ ହୋଇଥିବା ତଥ୍ୟର ଦୁରୁପଯୋଗ କରାଯାଇପାରେ। ଲଗ୍ଇନ୍ ଏପିଆଇ ଜରିଆରେ ୟୁଜର୍ସଙ୍କ ଫୋନ୍ ନମ୍ବର ଓ ଇ-ମେଲ୍ ଆଇଡିକୁ ମଧ୍ୟ ହ୍ୟାକର୍ସ ବ୍ୟବହାର କରିପାରନ୍ତି। ପ୍ରଘଟ ହୋଇଥିବା ଡେଟାବେସ୍ ସମ୍ପର୍କରେ ପ୍ରଥମେ ଗତ ଡିସେମ୍ବର ୨୩ରେ ବିଜ୍ଞାପନ ଦିଆଯାଇଥିଲା। ସାଇବର କ୍ରାଇମ୍ ଫୋରମ୍ ବ୍ରିଚ୍ଡ ଫୋରମ୍ସରେ ‘ରାୟୁସି’ ୟୁଜରନେମ୍ର ଜଣେ ବ୍ୟକ୍ତି ଏହାକୁ ବିକ୍ରି ପାଇଁ ପୋଷ୍ଟ କରିଥିଲେ। ସିମ୍ ସ୍ବାପିଂ, କ୍ରିପ୍ଟୋ ସ୍କାମ୍, ବିଇସି ସ୍କାମ୍, ଫିଶିଂ କ୍ୟାମ୍ପେନ, ଭେରିଫାଏଡ୍ ୟୁଜରନେମ୍ ବିକ୍ରି ଆଦିରେ ଏହି ଡେଟା କାମରେ ଆସିବ ବୋଲି ସେ ଉଲ୍ଲେଖ କରିଥିଲେ। ଜାନୁୟାରୀ ୧ରେ ଉକ୍ତ ଫୋରମ୍ରେ ‘ହୋଲିଗନ୍’ ୟୁଜରନେମ୍ ବ୍ୟବହାର କରି ଆଉ ଜଣେ ବ୍ୟକ୍ତି ସମାନ ଡେଟାକୁ ଅପ୍ଡେଟ୍ ପରେ ବିକ୍ରି ପାଇଁ ଘୋଷଣା କରିଛନ୍ତି।