ଭୁବନେଶ୍ୱର,୧୬।୧: ପ୍ରତି ବର୍ଷ ପରି ଚଳିତ ବର୍ଷ ମଧ୍ୟ ପଞ୍ଚାୟତିରାଜ ଓ ପାନୀୟଜଳ ବିଭାଗର ସହଯୋଗୀ ସଂସ୍ଥା ଓର୍ମାସ ପକ୍ଷରୁ ଏକ ୧୭ଦିନିଆ ଜାତୀୟସ୍ତରୀୟ ପ୍ରଦର୍ଶନୀ ‘ଶିଶିର ସରସ-୨୦୨୩’ର ଆୟୋଜନ କରାଯାଇଛି। ଏପରିକି ଚଳିତ ବର୍ଷ ଜାନୁୟାରୀ ୧୩ରୁ ୨୯ ତାରିଖ ପର୍ଯ୍ୟନ୍ତ ଏହି ପ୍ରଦର୍ଶନୀ ସ୍ଥାନୀୟ ବରମୁଣ୍ଡାସ୍ଥିତ ବିଜୁ ପଟ୍ଟନାୟକ ଖେଳପଡ଼ିଆରେ ଆୟୋଜିତ ହେବାକୁ ଯାଉଛି। ଉଲ୍ଲେଖଯୋଗ୍ୟ ଉକ୍ତ ପ୍ରଦର୍ଶନୀରେ ୨୪ଟି ରାଜ୍ୟ ଓ ଓଡ଼ିଶାର ୩୦ ଜିଲାର ସବୁବର୍ଗର ବ୍ୟବସାୟୀ ଅଂଶଗ୍ରହଣ କରିଥିବା ବେଳେ ଓଡ଼ିଶା ସରକାରଙ୍କ ମିଶନ ଶକ୍ତି, ଏସ୍ଏଚ୍ଜି ସମେତ ଅନେକ ସରକାରୀ ଉଦ୍ୟୋଗ ଓ ପ୍ରତିଷ୍ଠାନ ଏବଂ ବିଭାଗ ମଧ୍ୟ ସାମିଲ ହୋଇଛନ୍ତି।
ବିଶେଷକରି ଶିଶିର ସରସରେ ମୋଟ ୩୫୬ ଷ୍ଟଲ ଥିଲାବେଳେ ଓଡ଼ିଶାର ବିଭିନ୍ନ ଜିଲାରୁ ୧୦୮ ଜଣ ସବୁ ବର୍ଗର ବ୍ୟବସାୟୀ ଓ ୨୪ଟି ରାଜ୍ୟର ୧୨୦ ଜଣ ବ୍ୟବସାୟୀଙ୍କ ସାଙ୍ଗକୁ ରାଜ୍ୟ ସରକାରଙ୍କ ବିଭିନ୍ନ ବିଭାଗ ଓ ପ୍ରତିଷ୍ଠାନର ୧୦୦ଟି ଷ୍ଟଲ ମଧ୍ୟ ସାମିଲ ହୋଇଛି। ସେହିଭଳି ପ୍ରଦର୍ଶନୀ ପରିସରକୁ ଆସୁଥିବା ଦର୍ଶକଙ୍କ ଭିଡକୁ ଆଖି ଆଗରେ ରଖି ଓରମାସ ପକ୍ଷରୁ ୨୮ଟି ଫୁଡ୍ ଷ୍ଟଲର ବ୍ୟବସ୍ଥା କରାଯାଇଛି। ଏପରିକି ଚଳିତ ବର୍ଷର ପ୍ରଦର୍ଶନୀକୁ ଅଧିକ ରୋମାଞ୍ଚ ଓ ଆକର୍ଷଣୀୟ କରିବା ପାଇଁ ଓରମାସ ପକ୍ଷରୁ ପ୍ରତିଦିନ ସାଂସ୍କୃତିକ ସନ୍ଧ୍ୟା ସହ ଓ୍ବେଲଫି ଜୋନ ଏବଂ ହକି ପାଭିଲିୟନ ଭଳି ଅନେକ ସେବା ଓ ସୁବିଧା ଦର୍ଶକଙ୍କ ପାଇଁ ଆୟୋଜନ କରାଯାଇଛି।
ବିଶେଷକରି ଚଳିତ ବର୍ଷ ଏକା ସାଙ୍ଗରେ ହକି, ଶିଶିର ସରସ ଓ ଡଟ୍ ଫେଷ୍ଟ ଭଳି ପ୍ରମୁଖ ମନୋରଞ୍ଜନର ସମୟ ସବୁ ବର୍ଗର ଲୋକଙ୍କ ନିକଟରେ ପହଞ୍ଚତ୍ଛି। ସେଥିପାଇଁ ପ୍ରଦର୍ଶନୀରୁ ଭଲ କାରବାର ହେବାର ଆଶା କରାଯାଉଛି। ସେହିପରି କୋଭିଡ କଟକଣା ଯୋଗୁ ୨୦୨୦-୨୧ରେ ଶିଶିର ସରସ ହୋଇପାରି ନଥିଲା ହେଲେ ୨୦୨୧-୨୨ ବର୍ଷରେ ୮.୨ କୋଟି ଟଙ୍କା କାରବାର ହୋଇଥିଲା। କୋଭିଡ ଯୋଗୁ କାରବାର ମାନ୍ଦା ଥିଲେ ମଧ୍ୟ ବ୍ୟବସାୟୀ ସେମାନଙ୍କର ମୂଳ ସହ ଆଂଶିକ ଲାଭ ସଂଗ୍ରହ କରିବାରେ ସଫଳ ହୋଇଥିଲେ। ଏପରିକି ୨୦୧୯-୨୦ ବର୍ଷରେ ପ୍ରାୟ ୧୪ କୋଟି ଟଙ୍କାର କାରବାର ହୋଇଥିଲା।
ଚଳିତ ଥର ଭୁବନେଶ୍ୱରରେ ଏକପ୍ରକାର ମହୋତ୍ସବର ମାହଲ ରହିଥିବାରୁ କାରବାର ଭଲ ହେବା ସହ ୨୦୨୨-୨୩ରେ ପ୍ରାୟ ୨୦ କୋଟି ଟଙ୍କାର କାରବାର ହେବ ବୋଲି ଓରମାସ ପକ୍ଷରୁ ଆକଳନ କରାଯାଇଛି। ଅପରପକ୍ଷରେ ମେଳାର ୩ୟ ଦିନରେ ମଧ୍ୟ ଜନସମାଙ୍ଗମ ରହିଥିଲା। ବିଶେଷ ସୂତ୍ରରୁ ମିଳିଥିବା ସୂଚନା ଅନୁସାରେ ରବିବାର ପ୍ରାୟ ୩ କୋଟିରୁ ଅଧିକ ଟଙ୍କାର କାରବାର ହୋଇଥିବା ଆକଳନ କରାଯାଉଛି। ବିଶେଷକରି ସାରା ଦେଶର ବ୍ୟବସାୟୀ ଗୋଟିଏ ସ୍ଥାନରେ ଏକତ୍ର ହେବା ଏବଂ କ୍ରେତା ଓ ବିକ୍ରେତାଙ୍କ ମଧ୍ୟରେ ସମ୍ପର୍କ ବୃଦ୍ଧି ସାଙ୍ଗକୁ କାରବାର ମଧ୍ୟ ସେହି ତୁଳନାରେ ହୋଇଥାଏ ବୋଲି ବ୍ୟବସାୟୀମାନେ ମତପ୍ରକାଶ କରିଛନ୍ତି।