ବ୍ରହ୍ମଗିରି,୨୬ା୧୧(ଡି.ଏନ.ଏ): ଚିଲିକାକୁ ବିଦେଶାଗତ ପକ୍ଷୀଙ୍କ ଆଗମନ ହେଉଥିବା ସମୟରେ ଏହାକୁ ଅବାଧରେ ଶିକାର କରିବାକୁ ପକ୍ଷୀ ଶିକାରୀମାନେ ମାତିଲେଣି। ଏ ନେଇ ବ୍ରହ୍ମଗିରି ବନାଞ୍ଚଳ ଅଧିକାରୀଙ୍କ ତରଫରୁ ବିଭିନ୍ନ ସ୍ଥାନରେ ପାଟ୍ରୋଲିଂ ଚାଲିଥିବାବେଳେ ଶୁକ୍ରବାର ଘଟକୁଢ଼ିରେ ଚଢ଼ାଉ ବେଳେ ୨୦ ମୃତ ପକ୍ଷୀଙ୍କୁ ବନ ବିଭାଗ ଜବତ କରିଛି। କିନ୍ତୁ ଘଟଣାସ୍ଥଳରୁ ପକ୍ଷୀ ଶିକାରୀମାନେ ଚମ୍ପଟ ମାରିଛନ୍ତି। ପ୍ରକାଶ ଥାଉକି, ଚିଲିକାକୁ ବର୍ତ୍ତମାନ ବିଦେଶୀ ପକ୍ଷୀଙ୍କ ସମାଗମ ହେବାରେ ଲାଗିଛି। ଏଥିସହ ଏହି ପକ୍ଷୀମାନେ ଚିଲିକା କୂଳବର୍ତ୍ତୀ ଗ୍ରାମଞ୍ଚଳ, ଜଳାଶୟକୁ ଖାଦ୍ୟ ଅନ୍ବେଷଣରେ ଚାଲିଆସୁଛନ୍ତି। ଏହାର ସୁଯୋଗ ନେଇ ସ୍ଥାନୀୟ ପକ୍ଷୀ ଶିକାରୀମାନେ ବିଷ, ଫାଶ ଦ୍ୱାରା ଅବାଧରେ ପକ୍ଷୀ ଶିକାର କରିଚାଲିଛନ୍ତି। ଖବରପାଇ ବ୍ରହ୍ମଗିରି ବନ ବିଭାଗ ଅଧିକାରୀ ଜନାର୍ଦ୍ଦନ ମିଶ୍ର ଓ ବନପାଳ ପ୍ରଶାନ୍ତ କୁମାର ମିଶ୍ର ମିଳିତ ଭାବେ ବନକର୍ମଚାରୀଙ୍କୁ ନେଇ ବିଭିନ୍ନ ସ୍ଥାନରେ ପାଟ୍ରୋଲିଂ କରୁଥିଲେ। ହେଲେ ଶୁକ୍ରବାର ଘଟକୁଢ଼ିଠାରେ ପକ୍ଷୀ ଶିକାର ହେଉଥିବା ଜାଣି ବନ ବିଭାଗର ଏକ ଟିମ୍ ଚଢ଼ାଉ କରିବାବେଳେ ବନ କର୍ମଚାରୀଙ୍କୁ ଦେଖି ଶିକାରୀମାନେ ମୃତ ପକ୍ଷୀକୁ ଛାଡ଼ି ଚମ୍ପଟ ମାରିଥିଲେ। ଫଳରେ ଘଟଣାସ୍ଥଳରୁ ବନ ବିଭାଗ ୨୦ଟି ମୃତ ବିଦେଶୀ ପକ୍ଷୀକୁ ଜବତ କରି ବ୍ୟବଚ୍ଛେଦ କରିଛି। ଏହି ପକ୍ଷୀ ଶିକାର ରୋକିବା ସମ୍ପର୍କରେ ରେଞ୍ଜ ଅଧିକାରୀ ଜନାର୍ଦ୍ଦନ ମିଶ୍ର କୁହନ୍ତି, ଏବେ ବିଦେଶୀ ପକ୍ଷୀଙ୍କ ଆଗମନ ବଢୁଥିବାରୁ କିଛି ଗ୍ରାମାଞ୍ଚଳରେ ଶିକାର କରୁଛନ୍ତି। ଏଥିପାଇଁ ପ୍ରତ୍ୟେକ ଦିନ ବନ ବିଭାଗ ପକ୍ଷରୁ ପାଟ୍ରୋଲିଂ ଜାରି ରଖିବୁ। ଏଥିସହ ଶିକାର ନ କରିବା ପାଇଁ ଗ୍ରାମରେ ସଚେତନତା କାର୍ଯ୍ୟକ୍ରମ ମଧ୍ୟ ଚାଲିଛି।
