ରୂପସା,୧୬।୯(ଡି.ଏନ.ଏ.)-ଲଘୁଚାପ ଜନିତ ଲଗାଣ ବର୍ଷା ଯୋଗୁ ବାଲେଶ୍ୱର ସଦର ବ୍ଲକ ଅନ୍ତର୍ଗତ କସିପଦା ପଞ୍ଚାୟତର ୨୦ରୁ ଊର୍ଦ୍ଧ୍ୱ ପରିବାର ପାଣି ଘେରରେ ଜୀବନ ବିତାଉଛନ୍ତି। ଗାଁ ରାସ୍ତାରେ ପାଣିଜମି ରହିବା ସହ ଅଧିକାଂଶ ଲୋକଙ୍କ ଘରେ ବର୍ଷା ଜଳ ଲହଡ଼ି ଖେଳୁଥିବା ଦେଖିବାକୁ ମିଳିଛି। ଗ୍ରାମରେ ଡ୍ରେନେଜ ବ୍ୟବସ୍ଥା ନ ଥିବାରୁ କସିପଦା ଓ ହତିଆଡ଼ିହା ଗ୍ରାମରେ ବ୍ୟାପକ କ୍ଷୟକ୍ଷତି ହୋଇଛି। ଲୋକେ ବଞ୍ଚତ୍ବା ପାଇଁ ଦୁଇଦିନ ହେଲା ସଂଘର୍ଷ କରୁଛନ୍ତି। ହାତିଆଡିହା ଗ୍ରାମର ବାବୁଲି ପଣ୍ଡା, ଯୁଗଳ କିଶୋର ପଣ୍ଡା, ଅଶୋକ ଗୋଛାୟତ, ହରିଜନ ସାହିର ନୀଳକଣ୍ଠ ପଣ୍ଡିତ, କୃଷ୍ଣ ଚନ୍ଦ୍ର ପଣ୍ଡିତ, ସୁଦାମ ପଣ୍ଡିତ, କସିପଦା ଗ୍ରାମର ବିଜୟ ପରିଡ଼ା, ଗୌର ପରିଡ଼ା, ସମୀର ପରିଡା, ସୁକାନ୍ତ ପରିଡ଼ା, ବିଦ୍ୟାଧର ବେହେରା ପ୍ରମୁଖ ବ୍ୟାପକ କ୍ଷୟକ୍ଷତିର ସମ୍ମୁଖୀନ ହୋଇଛନ୍ତି। ଏହି ପରିବାର ସବୁ ପାଣି ଘେରରେ ଥିବାବେଳେ ଘର ଭିତରେ ପାଣି ପଶି ଲକ୍ଷାଧିକ ଟଙ୍କାର ଅସବାବପତ୍ର ନଷ୍ଟ ହୋଇଛି। ଏକାଧିକ ଘର ମଧ୍ୟ ଭାଙ୍ଗିଯାଇଥିବା ଅଭିଯୋଗ ହୋଇଛି। ଲୋକମାନେ ବଞ୍ଚତ୍ବା ପାଇଁ ଦୁଇଦିନ ହେଲା ସଂଘର୍ଷ କରୁଛନ୍ତି। ଘରେ, ଚୁଲିରେ ସବୁଠି ପାଣି। ରନ୍ଧାବଢା ସବୁ ବନ୍ଦ। ପିଲାଛୁଆ ଭୋକରେ ଆଉଟୁପାଉଟୁ ହେଉଛନ୍ତି। ଏହି କ୍ଷତିଗ୍ରସ୍ତ ପରିବାର ଲୋକଙ୍କ ପାଇଁ ରନ୍ଧା ଖାଦ୍ୟ ସହିତ ଏହି ଗ୍ରାମରେ ଡ୍ରେନେଜ ବ୍ୟବସ୍ଥା କରିବା ପାଇଁ ଗ୍ରାମବାସୀ ଦାବି କରିଛନ୍ତି। ପ୍ରଶାସନ ପକ୍ଷରୁ ବିପନ୍ନ ପରିବାରଙ୍କୁ ସହାୟତା ପ୍ରଦାନ ପାଇଁ ଅନୁରୋଧ କରାଯାଇଛି।
