ଲଣ୍ଡନ,୪।୮: ନେଦରଲ୍ୟାଣ୍ଡ ଉପକୂଳରୁ ପ୍ରାୟ ୩,୮୦୦ କାର ନେଇ ଯାଉଥିବା ଏକ ମାଲବାହୀ ଜାହାଜରେ ବ୍ୟାପକ ଅଗ୍ନିକାଣ୍ଡ ପରେ ଉଦ୍ଧାର ହୋଇଥିବା ୨୦ଜଣ ଭାରତୀୟ କ୍ରୁ ସଦସ୍ୟ ସୁରକ୍ଷିତ ଭାବେ ଘରକୁ ଫେରିଥିବାବେଳେ ଏହି ଘଟଣାରେ ମୃତ୍ୟୁ ହୋଇଥିବା ଜଣେ ନାବିକଙ୍କ ମୃତଦେହ ଫେରାଇ ଆଣାଯାଇଛି। ଭାରତୀୟ ଅଧିକାରୀମାନେ ଏହି ସୂଚନା ଦେଇଛନ୍ତି। ଜୁଲାଇ ୨୫ରେ ଜର୍ମାନରୁ ଇଜିପ୍ଟ ଅଭିମୁଖେ ପାନାମା ପଞ୍ଜିକୃତ ଜାହାଜରେ ଫ୍ରେମାଣ୍ଟ ହାଇୱେରେ ନିଆଁ ଲାଗିଯିବା ପରେ ଜଣେ ଭାରତୀୟ କ୍ରୁ ସଦସ୍ୟଙ୍କର ମୃତ୍ୟୁ ଘଟିଥିବା ବେଳେ ୨୦ଜଣ ଆହତ ହୋଇଥିଲେ। ନିଆଁ ଲାଗିବା ସମୟରେ ଅନେକ ସଦସ୍ୟ ପାଣିକୁ ଡେଇଁ ପଡିବାକୁ ବାଧ୍ୟ ହୋଇଥିଲେ। ଏହି ଜାହାଜଟି ସମ୍ପୂର୍ଣ୍ଣ ଭାବରେ ଭାରତୀୟ କ୍ରୁ ସଦସ୍ୟମାନଙ୍କ ଦ୍ୱାରା ପରିଚାଳିତ ହୋଇଥିଲା।
ହେଗରେ ଥିବା ଭାରତୀୟ ଦୂତାବାସ ମାଇକ୍ରୋବ୍ଲଗିଂ ପ୍ଲାଟଫର୍ମ ଏକ୍ସ (ଟୁଇଟର) ରେ କହିଛି ଯେ ଗତ ସପ୍ତାହରେ ଫ୍ରେମାଣ୍ଟ ହାଇୱେ ଜାହାଜରୁ ଉଦ୍ଧାର ହୋଇଥିବା ୨୦ ଜଣ ଭାରତୀୟ କର୍ମଚାରୀ ନିରାପଦରେ ଭାରତ ଫେରିଛନ୍ତି। ଏହି କଠିନ ସମୟରେ ସେମାନଙ୍କର ସମର୍ଥନ ଏବଂ ସାହାଯ୍ୟ ପାଇଁ ଡଚ କର୍ତ୍ତୃପକ୍ଷଙ୍କୁ ଧନ୍ୟବାଦ, ତଥା ଆମର ନାବିକମାନଙ୍କୁ ଧୈର୍ଯ୍ୟ ଏବଂ ସାହସ ପାଇଁ ଧନ୍ୟବାଦ। ଏଥିରେ କୁହାଯାଇଛି, ଦୁର୍ଭାଗ୍ୟବଶତଃ ଦେହାନ୍ତ ହୋଇଥିବା ଜଣେ କ୍ରୁ ସଦସ୍ୟଙ୍କ ମୃତଦେହକୁ ଫେରାଇ ଦିଆଯାଉଛି।
