ଭୁବନେଶ୍ୱର,,୨୬।୭(ବ୍ୟୁରୋ): କରୋନା ଓ ଲକ୍ଡାଉନ୍ ଯୋଗୁ ଲକ୍ଷ ଲକ୍ଷ ଲୋକ ଚାକିରି ହରାଇଛନ୍ତି। ବହୁ ଶିକ୍ଷିତ ଯୁବତୀଯୁବକ ବାହାର ରାଜ୍ୟ ଓ ଦେଶରୁ ଘରକୁ ଫେରି ବେକାର ବସିଛନ୍ତି। ଏବେ ସେମାନେ ନୂଆ ଚାକିରି ପାଇବା ଆଶାରେ ଇଣ୍ଟରନେଟ୍ ଓ ସୋସିଆଲ ମିଡିଆରେ ଖୋଜାଖୋଜି କରୁଛନ୍ତି। ଏହାର ସୁଯୋଗ ନେଇ ସାଇବର ଠକମାନେ ସକ୍ରିୟ ହୋଇପଡିଛନ୍ତି। ଚାକିରି ଯୋଗାଇ ଦେବା ନଁାରେ ଏକାଧିକ ଫେକ୍ ଓ୍ବେବ୍ସାଇଟ୍ ଖୋଲି ଠକେଇ କରୁଛନ୍ତି। ଏହିଭଳି ଏକ ଠକେଇର ଶିକାର ହୋଇଛନ୍ତି ପଟିଆ ଫାଲ୍କନ୍ ରେସିଡେନ୍ସିରେ ରହୁଥିବା ପଙ୍କର କୁମାର ଦାଶ। ତାଙ୍କଠାରୁ ସାଇବର ଠକମାନେ ୨୦ ଲକ୍ଷରୁ ଅଧିକ ଟଙ୍କା ଲୁଟି ନେଇଛନ୍ତି। ସେ ଏନେଇ ପ୍ରଥମେ ଇନ୍ଫୋସିଟି ଥାନାର ଦ୍ୱାରସ୍ଥ ହୋଇଥିଲେ। ପରେ କଟକ ସାଇବର ଥାନାରେ ଅଭିଯୋଗ କରିଛନ୍ତି। ପୋଲିସ ତଦନ୍ତ ଆରମ୍ଭ କରିଥିଲେ ମଧ୍ୟ କିଛି ବି ସୁରାକ ପାଇପାରୁନି।
ଅଭିଯୋଗ ଅନୁଯାୟୀ, ପଙ୍କଜ ଏକ ଘରୋଇ ସଂସ୍ଥାରେ ଜେନେରାର ମ୍ୟାନେଜର(ଜିଏମ) ଅଛନ୍ତି। ସେ ଏକ ଭଲ କମ୍ପାନୀର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ) କିମ୍ବା ଭାଇସ୍ ପ୍ରେସିଟେଣ୍ଟ ପଦ ସନ୍ଧାନରେ ଥିଲେ। ଏଥିପାଇଁ ସେ ଗୁଗଲ୍ରେ ସର୍ଚ୍ଚ କରିବାବେଳେ ଏକ ଓ୍ବେବ୍ସାଇଟ୍ (www.recruitmentzone.in) ପାଇଥିଲେ। ସେଥିରେ ସେ ନିଜର ବାୟୋଡାଟା ଅପ୍ଲୋଡ଼ କରିଥିଲେ। କିଛିଦିନ ପରେ ପଙ୍କଜଙ୍କ ମୋବାଇଲ୍ ଫୋନ୍କୁ ଏକ କଲ୍ ଆସିଥିଲା। ଏକ ବଡ଼ କମ୍ପାନୀରେ ସିଇଓ ଚାକିରି ପାଇଁ ଯୋଗ୍ୟ ବିବେଚିତ ହୋଇଥିବା କହିବା ସହ ଏହି ସହଯୋଗ ପାଇଁ ତାଙ୍କ ସଂସ୍ଥା ଟଙ୍କା ନେଉଥିବା କହିଥିଲେ। କରୋନା ଆଳ ଦେଖାଇ ଅନ୍ଲାଇନ୍ରେ ପଙ୍କଜଙ୍କଠାରୁ ୨୦ ଲକ୍ଷ ୩୦ ହଜାର ଟଙ୍କାନେବା ସହ ଜାଲ୍ ରସିଦ୍ ପଠାଇଥିଲେ ଉକ୍ତ ଠକ। ହେଲେ ପରେ ଚାକିରି ନେଇ କିଛି ବି ଚିଠି ଆସି ନ ଥିଲା। ପରେ ପଙ୍କଜ କଲ୍ ଆସିଥିବା ଉକ୍ତ ନମ୍ବରକୁ ଯୋଗାଯୋଗ କରିଥିଲେ ମଧ୍ୟ ତାହା ବହୁଦିନ ଧରି ବନ୍ଦ ରହିବାରୁ ସନ୍ଦେହ ହୋଇଥିଲା। ଯାଞ୍ଚ ପରେ ଉକ୍ତ ଓ୍ବେବ୍ସାଇଟ୍ ଜାଲ୍ ବୋଲି ଜାଣିବା ପରେ ଥାନାର ଦ୍ୱାରସ୍ଥ ହୋଇଥିଲେ।
କେବଳ ପଙ୍କଜ ନୁହେଁ, ରଜଧାନୀର ୭ରୁ ଊର୍ଦ୍ଧ୍ୱ ବ୍ୟକ୍ତି ଭଳି ଠକେଇର ଶିକାର ହୋଇଥିବା ଜଣାପଡିଛଇ। କେତେଜଣ ଥାନାରେ ଅଭିଯୋଗ କରିଥିଲେ ମଧ୍ୟ ଆଉ କେତେଜଣ ଲାଜରେ ଚୁପ୍ ରହିଛନ୍ତି। ଏନେଇ କ୍ରାଇମ୍ବ୍ରାଞ୍ଚ ଏଡିଜି ସୌମେନ୍ଦ୍ର ପ୍ରିୟଦର୍ଶୀ କହିଛନ୍ତି, ଅଭିଯୋଗକୁ ଗୁରୁତ୍ୱର ସହ ନିଆଯାଇ ତଦନ୍ତ ଚାଲିଛି। ଅପରାଧୀମାନେ ଦେଶ ବାହାରେ ରହି ଏଭଳି କରୁଥିବାରୁ ଧରିବା ମୁସ୍କିଲ ହେଉଛି। ସାଇବର ଅପରାଧରୁ ରକ୍ଷା ପାଇବା ପାଇଁ ଆସନ୍ତା ସପ୍ତାହରୁ ଲୋକଙ୍କୁ ସଚେତନ କରିବୁ।