ଯାଜପୁର,୫ା୯(ହର୍ଷବର୍ଦ୍ଧନ ବେହେରା): ଯାଜପୁର ଜିଲାରେ ଅଗଷ୍ଟରେ ଆବଶ୍ୟକତାଠାରୁ ୨୦ ପ୍ରତିଶତ କମ୍ ବର୍ଷା ଧାନ ଫସଲକୁ ଉଜାଡ଼ି ଦେଇଛି। ଧାନଗଛ ସବୁ ହଳଦିଆ ହେବାକୁ ବସିଛି। ଜୁଲାଇରେ ଆବଶ୍ୟକତାଠାରୁ ୩୭% କମ୍ ବର୍ଷା ହୋଇଥିଲା। ଏବେ ପୁଣି ବର୍ଷା ଅଭାବ ଚାଷୀକୁଳଙ୍କୁ ଅଡୁଆରେ ପକାଇଛି। ଏବେ ଧାନଗଛରେ କ୍ଷୀର ଢୋକିବା ଆରମ୍ଭ ହେଉଥିବାବେଳେ ବର୍ଷା ଧୋକା ଦେଇଛି। ଗତବର୍ଷ ଖରିଫ ଋତୁରେ ଲଘୁଚାପ ଜନିତ ଅଦିନିଆ ବର୍ଷାରେ ଚାଷୀଙ୍କ ଧାନ ଓ ଅଣଧାନ ନଷ୍ଟ ହୋଇଯାଇଥିଲା। ସେହି କ୍ଷୟକ୍ଷତି ଭରଣା ପାଇଁ ଚାଷୀ ଚଳିତବର୍ଷ ଅଣ୍ଟା ଭିଡିଥିବାବେଳେ ବର୍ଷାଭାବରୁ ଧାନଗଛ ପୋଡ଼ିଯିବାକୁ ବସିଲାଣି।
ଯାଜପୁର ଜିଲା କଳିଙ୍ଗନଗରରେ ସିମେଣ୍ଟ ଏବଂ ଷ୍ଟିଲ କାରଖାନାଗୁଡ଼ିକ ଗଢ଼ିଉଠିଛି। ଏହାବାଦ ଜିଲାର ଧର୍ମଶାଳା ତହସିଲ ଅଧୀନରେ ଜଙ୍ଗଲ ଜମିରେ ଶତାଧିକ ବେଆଇନ କଳାପଥର ଖାଦାନ ଚାଲିଛି। ଏଠାରେ ଜଙ୍ଗଲ ସୃଷ୍ଟି ବଦଳରେ ଜଙ୍ଗଲ କାଟି ବିପୁଳ କୋଟି ଅର୍ଥ ଲୋଭରୁ ବେଆଇନ କଳାପଥର କାରବାରକୁ ପ୍ରୋତ୍ସାହିତ କରାଯାଉଛି। ବିିଭିନ୍ନ ନିର୍ବାଚନ ଆସିଲେ ବେଆଇନ ପଥର ବ୍ୟବସାୟୀମାନଙ୍କୁ ଗୋଟିଏରୁ ୩ଟି ଲେଖାଏ ପଞ୍ଚାୟତର ନିର୍ବାଚନ ଦାୟିତ୍ୱ ଦିଆଯାଉଛି ବୋଲି ଅଭିଯୋଗ ହେଉଛି। ସେମାନେ ବିପୁଳ ଅର୍ଥରେ ଭୋଟରମାନଙ୍କୁ ଆକୃଷ୍ଟ କରି ବଡ଼ ବ୍ୟବଧାନରେ ଶାସକ ଦଳର ପ୍ରାର୍ଥୀଙ୍କୁ ବିଜୟୀ କରାଇବାରେ ପ୍ରମୁଖ ଭୂମିକା ନେଉଥିବା ଚର୍ଚ୍ଚା ହେଉଛି। ତେଣୁ ସେମାନେ ଜଙ୍ଗଲ କାଟିଲେ ବି କିଛି ଫରକ ପଡୁନାହିଁ। ହେଲେ ଜଙ୍ଗଲ ଧ୍ୱଂସର କୁପରିଣାମ ସ୍ବରୂପ ଜଳବାୟୁ ପରିବର୍ତ୍ତନ ଦେଖାଦେଇ ନାନା ପ୍ରାକୃତିକ ଦୁର୍ବିପାକ ଘଟୁଛି। ଦେଶକୁ ଖାଦ୍ୟ ଯୋଗାଇ ଥିବା ଚାଷୀମାନେ ନାହିଁ ନଥିବାର ସମସ୍ୟାର ସମ୍ମୁଖୀନ ହେଉଛନ୍ତି।
ଅନ୍ୟପକ୍ଷେ କଳାପଥର ଖାଦାନରେ ବିସ୍ଫୋରଣ ଏବଂ ପରିବହନ ସମୟରେ ଉତ୍କଟ ପ୍ରଦୂଷଣ, ବିପୁଳ ପରିମାଣରେ ଜୀବାଶ୍ମ ଇନ୍ଧନର ବ୍ୟବହାର ଯୋଗୁ ପରିବେଶ ନଷ୍ଟ ହେଉଥିବା କୁହାଯାଉଛି। ଏହାବାଦ୍ କମ୍ପାନୀଗୁଡ଼ିକରେ ପ୍ରତିଷ୍ଠିତ କେତେକ ତାପଜ ବିଦ୍ୟୁତ୍ କେନ୍ଦ୍ର ଯୋଗୁ ବାୟୁମଣ୍ଡଳରେ ସବୁଜଗୃହ ବାଷ୍ପର ପରିମାଣ ବୃଦ୍ଧିପାଉଛି। ସୂର୍ଯ୍ୟାଲୋକର ଅବଲୋହିତ ରଶ୍ମିକୁ ଶୋଷଣ ଓ ଧାରଣ କରିବାର କ୍ଷମତା ଏହି ବାଷ୍ପର ଅଧିକ ଥିବାରୁ ତାହା ବାୟୁମଣ୍ଡଳର ଉତ୍ତାପ ବୃଦ୍ଧି କରିବାରେ ସାହାଯ୍ୟ କରୁଛି ବୋଲି ମତପ୍ରକାଶ ପାଇଛି। କମ୍ପାନୀରୁ ନିର୍ଗତ ବର୍ଜ୍ୟବସ୍ତୁ ଓ ବିଷାକ୍ତ ପାଣିରେ ଜମିର ଉର୍ବରତା ନଷ୍ଟ ହେଉଛି। ଏହିସବୁ ପ୍ରାକୃତିକ ବିପର୍ଯ୍ୟୟରେ ଫସଲ ହାନି ହେବା ସହ ବହୁ ଧନଜୀବନ ନଷ୍ଟ ହେଉଛି। ବିଡ଼ମ୍ବନା ଯେ, ଅଗଷ୍ଟରେ ମଧ୍ୟ କଳାପଥର ଖାଦାନରେ ଭରପୂର ଧର୍ମଶାଳା ବ୍ଲକରେ ସର୍ବନିମ୍ନ ୧୭୧ ମିମି ବର୍ଷା ରେକର୍ଡ କରାଯାଇଛି। ଆଶ୍ଚର୍ଯ୍ୟର କଥା, ଅଗଷ୍ଟରେ ଏହି ବ୍ଲକ ଅଞ୍ଚଳରେ ୪ରୁ ୧୩ ତାରିଖ, ୧୫, ୧୬, ୨୦, ୨୧ ଏବଂ ୨୬ରୁ ୩୧ ତାରିଖ ପର୍ଯ୍ୟନ୍ତ ବୁନ୍ଦାଏ ବି ବର୍ଷା ହୋଇ ନ ଥିବା ରେକର୍ଡରୁ ସୂଚନା ମିଳିଛି। ଏହି ତଥ୍ୟ ଅବଲୋକନ କଲେ ଜିଲାର ବୁଦ୍ଧିଜୀବୀମାନଙ୍କ ମଧ୍ୟରେ ଆଲୋଡ଼ନ ସୃଷ୍ଟି କରିଛି। କେବଳ ସେତିକି ନୁହେଁ, ଚଳିତ ବର୍ଷ ଜୁଲାଇରେ ଏହି ବ୍ଲକ ଅଞ୍ଚଳରେ ମାତ୍ର ୧୦୮ ମିମି ବର୍ଷା ହୋଇଥିଲା। ଏଥିରେ ଜୁଲାଇ ୨ରୁ ୫, ୭ରୁ ୧୩, ୧୭ରୁ ୧୯ ଏବଂ ୨୫,୨୯ ଓ ୩୦ ତାରିଖରେ ବୁନ୍ଦାଏ ବି ବର୍ଷାପାଣି ଏହି ବ୍ଲକ ଅଞ୍ଚଳରେ ପଡ଼ିନାହିଁ। ପ୍ରାୟତଃ ବର୍ଷର ଜୁନ, ଜୁଲାଇ ଓ ଅଗଷ୍ଟର ବର୍ଷାକୁ ଚାଷୀ ଧାନଚାଷ ପାଇଁ ଅନେଇ ବସିଥାନ୍ତି। କିନ୍ତୁ ଚଳିତ ମାସ ମୌସୁମୀ ପ୍ରବାହ ଶୁଷ୍କ ହେବା ଏବଂ ରୌଦ୍ରତାପ ହେବା କାରଣରୁ ଅନେକ ଜମିରେ ମାଟି ଫାଟି ଆଁ କଲାଣି। ଅଣଜଳସେଚିତ ଅଞ୍ଚଳରେ ଧାନ ଚାଷ ବହୁଳ ଭାବେ କ୍ଷୟକ୍ଷତି ହେବା ଆଶଙ୍କା ଦେଖାଦେଇଛି। ଆସନ୍ତା ୪/୫ ଦିନ ମଧ୍ୟରେ ଭଲ ଅସରାଏ ବର୍ଷା ନ ହେଲେ ଧାନଗଛ ସବୁ ମରିଯବ ବୋଲି ଚାଷୀମାନେ କୋହଭରା କଣ୍ଠରେ ପ୍ରକାଶ କରିଛନ୍ତି।