![](https://www.dharitri.com/wp-content/uploads/2020/11/birds-.jpg)
ଯାଜପୁର ଅଫିସ/କାଳିଆପାଣି, ୨୫ା୧୧(ଡି.ଏନ.ଏ.): ଟାଟା ଷ୍ଟିଲ୍ ମାଇନିଂ ପକ୍ଷରୁ ଗ୍ରୋ ୱିଥ୍ ନେଚର୍ ସହଯୋଗରେ ବୁଧବାର ସୁକିନ୍ଦା କ୍ରୋମାଇଟ୍ ଖଣିରେ ଏକ ପକ୍ଷୀ ଦର୍ଶନ ଅଧିବେଶନ (ବାର୍ଡ ୱାଚିଂ ସେସନ୍) ଆୟୋଜନ କରାଯାଇଥିଲା। ଏଥିରେ ବିଶିଷ୍ଟ ପକ୍ଷୀ ବିଜ୍ଞାନୀ ଡକ୍ଟର ଜୁଷ୍ଟୁସ୍ ଜୋସୁଆ ଏବଂ ଗ୍ରୋ ୱିଥ୍ ନେଚର୍ର ପ୍ରତିଷ୍ଠାତା ଓ ଅଧ୍ୟକ୍ଷ ତଥା ବନ୍ୟଜନ୍ତୁ ଓ ଜୀବଜଗତ ଗବେଷଣା ଜୀବବିଜ୍ଞାନୀ ମିସ୍ ଗାୟତ୍ରୀ ଦେବୀଙ୍କ ସହ ପକ୍ଷୀ ପ୍ରେମୀ ଭାବେ ପରିଚିତ ଏବଂ ଝାଡ଼ଖଣ୍ଡରେ ପକ୍ଷୀମାନଙ୍କ ଉପରେ ଏକ ପୁସ୍ତକ ରଚନା କରିଥିବା ଭାରତ ସରକାରଙ୍କ ପରିବେଶ ଓ ଜଙ୍ଗଲ ମନ୍ତ୍ରଣାଳୟର ଡେପୁଟି ଡାଇରେକ୍ଟର ଜେନେରାଲ୍ (ଡିଡିଜି) ଏ.ଟି. ମିଶ ସାମିଲ ହୋଇଥିଲେ। ଟାଟା ଷ୍ଟିଲ୍ ମାଇନିଂ ଲିମିଟେଡ୍ର ପରିଚାଳନା ନିର୍ଦ୍ଦେଶକ ପଙ୍କଜ ସତିଜା ଏବଂ ଟିଏସ୍ଏମ୍ଏଲ୍ର ଅନ୍ୟାନ୍ୟ ଅଧିକାରୀମାନେ ବଡ଼ ଉତ୍ସାହର ସହିତ ଏହି ଅଧିବେଶନରେ ସହଯୋଗ କରିଥିଲେ। ସ୍କୁଲ ଛାତ୍ରୀଛାତ୍ର ଏବଂ ପରିବାର ସଦସ୍ୟମାନଙ୍କ ସମେତ ପ୍ରାୟ ୫୦ ଅଂଶଗ୍ରହଣକାରୀ ଏହି ଅଧିବେଶନରେ ଭାଗ ନେଇଥିଲେ। ଡିଡିଜି ଏ.ଟି. ମିଶ୍ର କହିଥିଲେ ପକ୍ଷୀମାନେ ସର୍ବଦା ଅନୁପ୍ରାଣିତ କରିଛନ୍ତି। ସେମାନଙ୍କ ସହିତ ସମୟ ବିତାଇବାର କୌଣସି ସୁଯୋଗକୁ ସେ ହାତଛଡ଼ା କରନ୍ତି ନାହିଁ । କାଳିଆପାଣି ଅଞ୍ଚଳରେ ବହୁ ପକ୍ଷୀଙ୍କୁ ଦେଖିଥିବାରୁ ସେ ବହୁତ ଖୁସି ମନେ କରୁଛନ୍ତି। ଟାଟା ଷ୍ଟିଲ୍ ମାଇନିଂ ଲିମିଟେଡ୍ର ପରିଚାଳନା ନିର୍ଦ୍ଦେଶକ ପଙ୍କଜ ସତିଜା କହିଛନ୍ତି,ପକ୍ଷୀ ହେଉଛନ୍ତି ଏକ ସୁସ୍ଥକର ପରିବେଶର ପ୍ରତୀକ। ପରିବେଶରେ ପକ୍ଷୀମାନଙ୍କ ଉଲ୍ଲେଖନୀୟ ଉପସ୍ଥିତିକୁ ଏହି ଅଧିବେଶନରେ ଦେଖିବାକୁ ମିଳିଥିଲା । ପ୍ରତିଥର ଆମେ ଆୟୋଜନ କରୁଥିବା ପକ୍ଷୀ ଦର୍ଶନ ଅଧିବେଶନ ସମସ୍ତଙ୍କ ପାଇଁ ଏକ ସୁଖଦ ଅନୁଭବ। ଡକ୍ଟର ଜୁଷ୍ଟୁସ୍ ଜୋସୁଆ କହିଛନ୍ତି, ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଯେ ପକ୍ଷୀମାନଙ୍କୁ ଅଧିକ ଧ୍ୟାନ ଦେବା ଲାଗି ସେମାନଙ୍କ ସମ୍ପର୍କରେ ଉତ୍ତମ ସୂଚନା ସଂଗ୍ରହ କରିବା ଦରକାର । ଯାହା କେବଳ ସେମାନଙ୍କ ସଂରକ୍ଷଣ ପାଇଁ ନୁହେଁ ବରଂ ଜଳବାୟୁ ପରିବତ୍ତର୍ର୍ନ ସମସ୍ୟାକୁ ମୁକାବିଲା କରିବାରେ ସହାୟକ ହେବ। ଗାୟତ୍ରୀ ଦେବୀ କହିଛନ୍ତି, ପକ୍ଷୀମାନଙ୍କ ସହିତ ତାଙ୍କ ସ୍ବତନ୍ତ୍ର ସମ୍ପର୍କ ରହିଛି। ଏହି ଅଧିବେଶନରେ ସେମାନଙ୍କ ପାଇଁ ଅଭୁଲା ଅନୁଭବ ଥିଲା।