କେନ୍ଦୁଝର,୧୧ା୧୦(ନରେଶ ଚନ୍ଦ୍ର ପଟ୍ଟନାୟକ): ବୁଧବାର ସ୍ବତନ୍ତ୍ର ପୋକ୍ସୋ କୋର୍ଟ ଜଜ୍ ଶୁଭଶ୍ରୀ ତ୍ରିପାଠୀ ଏକ ନାବାଳିକା ବଳାତ୍କାର ମାମଲାର ଶୁଣାଣି କରି ଜଣେ ୨୦ ବର୍ଷ ଯୁବକ ମହା ଟୁଡୁଙ୍କୁ ୨୦ ବର୍ଷ ଜେଲ ଓ ୨୩ ହଜାର ଟଙ୍କା ଜରିମାନା ଆଦେଶ କରିଛନ୍ତି। ଫାଇନ ଅନାଦେୟ ଆଉ ଏକ ବର୍ଷ ତିନି ମାସ ଦଣ୍ଡ ଆଦେଶ କରିଛନ୍ତି।
ପ୍ରକାଶ ଯେ, ୧୦ ମେ’ ୨୦୧୯ରେ ନାବାଳିକା ତାଙ୍କ ପିଉସୀଙ୍କ ଘରକୁ ମେଳା ଦେଖିବାକୁ ଯାଇଥିବା ବେଳେ ରାତିରେ ମହା ତାଙ୍କୁ ଉଠାଇ ଘରକୁ ନେଇଯାଇଥିଲେ। ସେଠାରେ ବିବାହର ପ୍ରତଶ୍ରୁତି ଦେଇ ନାବାଳିକାଙ୍କୁ ବଳାତ୍କାର କରିଥିଲେ। ଘରକୁ ନ ଫେରିବାରୁ ପରିବାର ଲୋକ ଖୋଜାଖୋଜି କରି ଦୋଷୀଙ୍କ ଘରୁ ପାଇଥିଲେ। ତେବେ ଦୋଷୀ ସେମାନଙ୍କୁ ମାରଧର କରିବାରୁ ପରିବାର ଲୋକେ ଆନନ୍ଦପୁର ଥାନାରେ ଏତଲା ଦେଇଥିଲେ। ପୋଲିସ କେସ୍ ନମ୍ବର ୯୧/୨୦୧୯ ରେ ପୋକ୍ସୋ ଆଇନରେ ମାମଲା ରଜୁ କରି ମହାଙ୍କୁ ଗିରଫ କରି କୋର୍ଟଚାଲାଣ କରିଥିଲା। ଏ ନେଇ ୧୬ ଜଣ ସାକ୍ଷୀଙ୍କ ବୟାନ ଓ ପୋଲିସ ରିପୋର୍ଟକୁ ଆଧାର କରି ଉପରୋକ୍ତ ଦଣ୍ଡାଦେଶ କରିଥିବା ସତନ୍ତ୍ର ପବ୍ଲିକ ପ୍ରସିକ୍ୟୁଟର ଗଣେଶ ପ୍ରସାଦ ମହାପାତ୍ର କହିଛନ୍ତି। ସେହିପରି ପୀଡ଼ିତାଙ୍କୁ ୬ ଲକ୍ଷ ଟଙ୍କା କ୍ଷତିପୂରଣ ଦେବାକୁ ମାନ୍ୟବର କୋର୍ଟ ଆଦେଶ କରିଥିବା ଶ୍ରୀ ମହାପାତ୍ର କହିଛନ୍ତି।