ଆରଡ଼ି, ୮।୨(ଡି.ଏନ.ଏ.) ଦୁଇମାସ ହେଲା ସରକାରୀ ନଳକୂପ ଭାଙ୍ଗିଯାଇଛି। ଆଉ ଦୁଇଦିନ ହେବ ମୋଟର ପୋଡ଼ିଯିବା ଯୋଗୁ ପ୍ରକଳ୍ପ ପାଣି ମଧ୍ୟ ମିଳିପାରୁନି। ଫଳରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଆରଡ଼ି ପଞ୍ଚାୟତର ୯ ଓ ୧୦ ନଂ. ଓ୍ବାର୍ଡର ପ୍ରାୟ ୨୦୦ରୁ ଊର୍ଦ୍ଧ୍ୱ ପରିବାର। ଆଖଣ୍ଡଳମଣି ପୀଠ ପରିସରରେ ଉକ୍ତ ନଳକୂପ ଥିବାବେଳେ ଅଚଳ ଯୋଗୁ ଆସୁଥିବା ଶ୍ରଦ୍ଧାଳୁମାନେ ମଧ୍ୟ ପାଣି ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ସୋମବାର ଥିବାରୁ ପୀଠରେ ଶ୍ରଦ୍ଧାଳୁଙ୍କ ଭିଡ଼ ହୋଇଥିଲା। ଜଳ ସଙ୍କଟ ଦେଖାଯିବାକୁ ନେଇ ସ୍ଥାନୀୟ ଅଧିବାସୀ ଅସନ୍ତୋଷ ପ୍ରକାଶ କରିଛନ୍ତି। ମୋଟର ପୋଡ଼ି ଯାଇଥିଲେ ବି ଜାଣିଶୁଣି ଅଚଳ ନଳକୂପ ମରାମତି କରାଯାଉନି କି ନୂଆ ମୋଟର ଲଗାଯାଉ ନ ଥିବା ସେମାନେ କହିଛନ୍ତି। ଲୋକେ ୨୦୦ ମିଟର ଦୂରରେ ଥିବା ପାଣିକଳରୁ ବହୁ କଷ୍ଟରେ ପାଣି ଆଣୁଛନ୍ତି। ଏଠାକାର କେତେଜଣ ନେତାଙ୍କ ଇଙ୍ଗିତରେ ସମସ୍ୟା ସମାଧାନ କରାଯାଉ ନ ଥିବା କହିଛନ୍ତି ସ୍ଥାନୀୟ ଭାଜପା ନେତା ସମର ପାଢ଼ୀ। ମଙ୍ଗଳବାର ସୁଦ୍ଧା ଜଳ ସଙ୍କଟ ଦୂର ନ ହେଲେ ଆନ୍ଦୋଳନ କରାଯିବ ବୋଲି ଓ୍ବାର୍ଡମେମ୍ବର ଆର୍ତ୍ତବନ୍ଧୁ ପାଢ଼ୀ ପ୍ରକାଶ କରିଛନ୍ତି। ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ସନାତନ ସିଂଙ୍କୁ ପଚାରିବାରୁ ମଙ୍ଗଳବାର ପୋଡ଼ି ଯାଇଥିବା ମୋଟର ସ୍ଥାନରେ ନୂଆ ଲଗାଯିବ ବୋଲି କହିଛନ୍ତି।