କାକଟପୁର(ଶୁଭଦର୍ଶନ ମିଶ୍ର)/ଅସ୍ତରଙ୍ଗ (ପ୍ରଦୀପ୍ତ କୁମାର ଦୀକ୍ଷିତ), ୧୬ା୧୦: ପୁରୀ ଜିଲା କାକଟପୁର ଜଳସମ୍ପଦ ବିଭାଗ ଅଧୀନସ୍ଥ ଦେବୀ ନଦୀବନ୍ଧ ରାସ୍ତାରେ ୨ଶହ ଫୁଟ ଲମ୍ବ ପର୍ଯ୍ୟନ୍ତ ଫାଟ ସୃଷ୍ଟି ହୋଇଛି। ଏଥିଯୋଗୁ ନଦୀ ତଟବର୍ତ୍ତୀ ଓ ତଳିଆ ଅଞ୍ଚଳ ଲୋକେ ଆତଙ୍କିତ ହୋଇପଡ଼ିଛନ୍ତି। ଏହା ଏକ ସମ୍ବେଦନଶୀଳ ବନ୍ଧ ଭାବେ ଜଣାଶୁଣା। ବାଉରିଆକଣଠାରୁ ଖଣ୍ଡାସାହି ଓ ଷାଠିଏବାଟି ମଧ୍ୟରେ ବିପୁଳ ଅର୍ଥ ବ୍ୟୟରେ ନଦୀବନ୍ଧ ସୁଦୃଢ଼ୀକରଣ ଯୋଜନାରେ ଏହି ନଦୀବନ୍ଧ ନିର୍ମାଣ କରାଯାଇଥିଲା। ଏବେ ରାସ୍ତାର ବିଭିନ୍ନ ସ୍ଥାନରେ ଫାଟ ଦେଖିବାକୁ ମିଳିଛି। ବିଶେଷକରି ବାଉରିଆକଣଠାରେ ବନ୍ଧର ୨ଶହ ଫୁଟ ଲମ୍ବର ପିଚୁ ରାସ୍ତାରେ ଫାଟ ସୃଷ୍ଟି ହୋଇଛି। ତେବେ ନିମ୍ନମାନର କାର୍ଯ୍ୟ ସାଙ୍ଗକୁ ଠିକ କମ୍ପାକ୍ସନ କରା ନ ଯାଇ ରାସ୍ତା ନିର୍ମାଣ କରାଯାଇଥିବାରୁ ବନ୍ୟାଜଳ ଛାଡ଼ିବା ପରେ ଏଭଳି ସ୍ଥିତି ଉପୁଜିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। କାକଟପୁର ଅଞ୍ଚଳକୁ ବନ୍ୟା ଦାଉରୁ ବାଉରିଆକଣ ଦେବୀ ନଦୀବନ୍ଧ ରକ୍ଷା କରିଥାଏ। ଯଦି ଏହି ବନ୍ଧ ଅଧିକ ଧସିଯାଏ ବା ବନ୍ଧରେ ବଡ଼ଧରଣର ଫାଟ ସୃଷ୍ଟି ହୁଏ ତା’ହେଲେ ଅନେକ ଗ୍ରାମ ନଦୀଗର୍ଭରେ ଲୀନ ହୋଇଯିବ। ତେଣୁ ନଦୀତଟବର୍ତ୍ତୀ ବାସିନ୍ଦା ନିଜକୁ ସୁରକ୍ଷିତ ମଣୁ ନ ଥିବାବେଳେ ଚିନ୍ତିତ ହୋଇପଡ଼ିଛନ୍ତି। ତୁରନ୍ତ ନଦୀବନ୍ଧ ରାସ୍ତା ମରାମତି କରାଯିବା ନିମନ୍ତେ ଅଞ୍ଚଳବାସୀ ଦାବି କରିଛନ୍ତି। କାକଟପୁର ଜଳସେଚନ ବିଭାଗ ଉପଖଣ୍ଡ ଭାରପ୍ରାପ୍ତ ସହନିର୍ବାହୀ ଯନ୍ତ୍ରୀ ପ୍ରଭାତ ଦାଶ କହିଛନ୍ତି, ଏ ନେଇ ବିଭାଗୀୟ ଉଚ୍ଚ ଅଧିକାରୀଙ୍କୁ ଅବଗତ କରାଯାଇଛି। ଚେନ୍ନାଇସ୍ଥିତ ଓସେନ୍ ଇଞ୍ଜିନିୟରିଂ ସଂସ୍ଥାର ଅଧିକାରୀମାନେ ସେହି ସ୍ଥାନ ଗସ୍ତ କରି ବନ୍ଧ ଫାଟିଥିବା ସ୍ଥାନର ମୃତ୍ତିକା ପରୀକ୍ଷା କରିଛନ୍ତି। ଶୀଘ୍ର ସମ୍ପୃକ୍ତ ସ୍ଥାନର ମରାମତି କରାଯିବ।